ماريۋپولدەگى جانقيار قورعاۋشىلار: پورت شاھار ءالى دە قارسىلاسۋدا

رەسەي ازوۆ تەڭىزىنىڭ جاعاسىنداعى ماريۋپول پورت شاھارىن تۇگەلگە جۋىق باقىلاۋعا العانىن ايتىپ جاتىر. بىراق، ماريۋپولدە ءالى قارسىلىق كورسەتىپ، سوڭعىنا دەيىن سوعىسۋعا بەكىنگەن ۋكراينالىق جاۋىنگەرلەر بار. «ازوۆ باتالونى» دەپ اتالعان بۇل جاۋىنگەرلەر قوسىنى قازىر قالاداعى «ازوۆستال» مەتالل قورتۋ زاۋىتىنا بەكىنگەن، جاۋعا تىزە بۇكپەيتىندەرىن حابارلاۋدا.

ماريۋپول پورت قالاسىن وزىنە قاراتۋ رەسەيدىڭ قازىرگى ستراتەگيالىق باستى ماقساتى. سەبەبى، بۇل قالانى ءوز باقىلاۋىنا الۋ ۋكراينانىڭ شىعىسى مەن وڭتۇستىك شىعىسىنا باقىلاۋ جۇرگىزۋگە مول مۇمكىندىك جاراتادى. ءماريۋپولدى باقىلاۋعا الدىق دەگەن رەسەيدىڭ مالىمدەمەلەرىمەن قاتار ۋكراينا پرەمەر-ءمينيسترى دەنيس شمىگال امەريكالىق ABC ارناسىنا سۇحبات بەرىپ: «ماريۋپول قۇلاعان جوق. ول جەردە ءبىزدىڭ قۇرالدى كۇشتەرىمىز – جاۋنگەرلەرىمىز بار. ولار سوڭىنا دەيىن ۇرىس سالادى، ولار ماريۋپولدە»، – دەدى.

ۋكراينا ءسىم باسشىسى كۋلەبانىڭ ايتۋىنشا رەسەي ءمارۋپولدى جەرمەن جەكسەن ەتۋدى شەشىپ وتىر. ال، ماريۋپول قالاسىنىڭ جەرگىلىكتى بيلىك وكىلىنىڭ BBC-گە بەرگەن مالىمەتىندە قالا تۇرعىندارى ءجۇرىپ-تۇرۋعا رۇقسات الۋ ءۇشىن ۇزىن كەزەككە تۇرۋى مۇمكىن ەكەنى، ولاردىڭ ۇيالى تەلەفوندارى تەكسەرىلۋى، ءتىپتى ەركىنەن تىس رەسەيگە اكەتىلۋى مۇمكىن ەكەنىن ايتقان.

ءتۇرلى اقپارات كوزدەرىندەگى مالىمەتتەرگە جانە Sybilline ساراپتامالىق كومپانياسىنىڭ دەرەكتەرىنە سۇيەنە وتىرىپ، قازىر ماريۋپولدە رەسەي كۇشتەرىنە باعىنباي سوعىسىپ جاتقان ۋكراينالىق ساربازداردىڭ سانى 500-800 اينالاسىندا دەۋگە بولادى. اتالعان كومپانيانىڭ ساراپشىسى جاستين كرامپ BBC تىلىشىسىنە بەرگەن جاۋابىندا، ماريۋپولدەگى ۋكراينالىق جاۋىنگەرلەر ءالى دە كوپكە شىداي الاتىنىن ايتادى، ولار يادرولىق سوققىعا قارسى بۋنكەردەن، ءتۇرلى جاسىرىن جولداردى پايدالانا وتىرىپ ۋاقىتتى ۇزارتۋعا مۇمكىندىگى بار.

قازىر سىرتقى الەم ماريۋپولدەگى بەيبىت تۇرعىنداردان كوبىرەك الاڭدايدى. سەبەبى، كوپتەن بەرى قالادان اۋقىمدى ەۆوكۋاتسيا بولعان جوق، رەسەي تارابى جارالىلار مەن بەيبىت تۇرعىنداردى ەۆاكۋاتسيالاۋعا ءدالىز قالدىرارىن ايتقانىمەن، پراكتيكالىق تۇرعىدا بۇل ىسكە اسىپ جاتقان جوق.

The Qazaq Times