تاۋەلسىز ءجۋرناليستىڭ 4 تالابى: ون كۇننەن اسا اشتىقتا وتىرعان دۋمان مۇحامەدكارىمنىڭ دەنساۋلىعى ناشارلادى

جەتىسۋ وبلىسىنىڭ ورتالىعى تالدىقورعانداعى مەكەمەدە قاماۋدا وتىرعان الماتى وبلىسىنىڭ تۇرعىنى، تاۋەلسىز جۋرناليست دۋمان مۇحاممەدكارىم تەرگەۋ ورگانىنا 4 شارت قويىپ، اشتىق جاريالاعالى ون كۇننەن استى. سىنشىل ءجۋرناليستىڭ دەنساۋلىعى ناشارلاعانى حابارلاندى. 

بۇگىن تاۋەلسىز جۋرناليست اشتىق جاريالاعانىنا ون ءبىرىنشى كۇن. قارت اكەسى الماس تىلەپوۆ پەن ادۆوكاتى عالىم نۇرپەيىسوۆتىڭ QT تىلشىسىنە حابارلاۋىنشا، جۋرناليست اشتىقتى توقتاتۋ ءۇشىن بيلىككە ءتورت تالاپ قويعان.

اتاپ ايتقاندا:

• اكەسىن قوعامدىق قورعاۋشى رەتىندە تانۋدى;
• بىلىكسىز تەرگەۋشىنى اۋىستىرۋدى;
• تەرگەۋ اياقتالعانشا دەنساۋلىق جاعدايىنا بايلانىستى ۇيقاماققا الماتىعا اۋىستىرۋدى;
• قۇقىق قورعاۋ ۇيىمدارىنىڭ جەتەكشىلەرى باقىتجان تورەعوجينا مەن ەۆگەني جوۆتيسپەن كەزدەستىرۋدى سۇراعان.

ازىرگە ءتورت شارتتىڭ ەكەۋى ورىندالۋ بارىسىندا ەكەنى ايتىلادى. اكەسىنە قوعامدىق قورعاۋشى مارتەبەسى بەرىلىپ، كوڭىلى تولماعان تەرگەۋشى وزگەرىپ جاتىر.

14 شىلدەدە دارىگەرلەردىڭ مەديتسينالىق تەكسەرىسىنىڭ قورىتىندىسى بويىنشا، ءجۋرناليستىڭ قانى قاتتى قويۋلانعان، كەز-كەلگەن ۋاقىتتا جۇرەگى توقتاپ قالۋى ابدەن مۇمكىن، ەكى بۇيرەگى قابىنعان، كەۋدە تۇسىنداعى ومىرتقاسىنىڭ شەمىرشەگى ءوسىپ كەتكەن.

دۋمان مۇحاممەدكارىمنىڭ دەنساۋلىق جاعدايى تۋرالى 14 شىلدە جاسالعان مەديتسينالىق قۇجات. فوتو: اكەسى الماس تىلەپوۆتەن

ءجۋرناليستىڭ قورعاۋ تارابىنىڭ سوزىنشە، 45 جاستاعى دۋمان مۇحاممەدكارىمگە الماتى اۋرۋحاناسىندا ەمدەلۋ قاجەت.

اپتاپ ىستىقتا اۋدان مەن تالدىقورعان اراسىندا جولدا ءجۇرىپ، قاجىعان قارت اتا-اناسىنىڭ دا دەنساۋلىعى ناشارلاعان. الماس تىلەپوۆ ۇلىنىڭ ومىرىنە الاڭداۋلى. ونىڭ سوزىنە قاراعاندا، قاماۋداعى سىرقات پەرزەنتىنىڭ ەكى كوزى شۇڭىرەيىپ كەتكەن، ازەر ءجۇرىپ-تۇرادى، سويلەۋگە شاماسى جوق، جاعدايى ناشار.

ول كەيىنگى ءبىر جىلدا ءتورت رەت «ميتينگ وتكىزۋ ءتارتىبىن بۇزدى» دەگەن ايىپپەن جيىنى 90 تاۋلىك قاماۋدا وتىردى. بۇدان سوڭ وسى جازدا بيلىك قىلمىستىق ءىس اشقان. توقاەۆ پەن ونىڭ بيلىگىن اشىق ءارى وتكىر سىنايتىن وعان پوليتسيا مۇحتار ءابليازوۆتان جۋرناليست رەتىندە سۇقبات العانىن سەبەپ ەتەدى. جاز باستالعالى قىلمىستىق كودەكستىڭ ەكى بىردەي ەكسترەميستىك بابىمەن («تىيىم سالىنعان ۇيىمنىڭ ىسىنە ارالاسۋ» / 405-باپ جانە «ەكسترەميزمدى قارجىلاندىرۋ» / 258-باپ – QT ) اۋىر ايىپ تاعىلىپ، تەرگەۋ سوتىنىڭ سانكتسياسىمەن تاعى 2 اي قاماۋعا الىندى.

دۋمان مۇحاممەدكارىم وزىنە تاعىلعان ايىپپەن كەلىسپەيدى، مۇنى قۋدالاۋ دەپ ەسەپتەيدى. قارسىلىق رەتىندە توقاەۆقا جانە ىلە اۋداندىق پوليتسيا ءبولىمىنىڭ باسشىسى بولات توتىباەۆقا «دەموكراتيا ءۇشىن مەن باس بوستاندىعىمدى بايلاۋعا دايىنمىن» دەپ حات جازعان.

تالدىقورعان قالاسىندا ورنالاسقان №71 مەكەمە. 6 اقپان 2022 جىل. فوتو: QT

تۇرعىلىقتى جەرى ىلە اۋدانىنان شالعاي تالدىقورعان قالاسىنداعى №71 مەكەمەگە قاماعان. زەينەت جاسىنداعى قارت اتا-اناسى اپتا سايىن جۇزدەگەن شاقىرىم جول ءجۇرىپ، اس-اۋقات تاسىپ ءجۇر. قۇزىرلى ورگاندار تەرگەۋ جۇرگىزىپ جاتقانىن ايتادى. ال قۇقىق قورعاۋشىلار كەڭەسى «ساياسي تۇتقىن» رەتىندە تانىعان. ازاماتتىق قوعام مۇشەلەرى دۋمان مۇحاممەدكارىمدى قورعاۋ كوميتەتىن قۇرعان.

وسىعان دەيىن اقپارات ءمينيسترى دارحان قىدىرالى ءجۋرناليستىڭ قامالىپ، اۋىر ايىپتارمەن ءىستى بولۋىن «جۋرناليستىك قىزمەتىمەن ەمەس، ساياسي كوزقاراسى ءۇشىن» دەگەن. قاڭتاردان كەيىن توقاەۆتىڭ بيلىگى نىعايىپ، «جاڭا قازاقستان» ساياسي باعدارى جاريالاعالى بەرى ەلدە جۋرناليستەرگە جاسالاتىن شابۋىل مەن قىسىم-كەدەرگى جيىلەگەن.

The Qazaq Times