ەۋروپادا پاندەميا كەزىندەگى احۋال ءارتۇرلى: فينليانديا ەلدە كوروناۆيرۋستىڭ ءتورتىنشى تولقىنى باستالعانىن جاريالاسا، ۇلىبريتانيا حالقى قالىپتى ومىرگە ورالدى.

فينليانديا ۇلتتىق دەنساۋلىق ساقتاۋ ينستيتۋتىنىڭ دەنساۋلىق ساقتاۋ دەپارتامەنتىنىڭ باسشىسى ميكا سالمينەن ەلدە «دەلتا» شتامى تەز تاراپ، ەپيدەميولوگيالىق احۋالدىڭ كۇرت ناشارلاعانىن حابارلادى. وسىعان بايلانىستى مۇندا كارانتين شەكتەۋلەرى قاتاڭداتىلدى.

فرانتسيا ۇكىمەتى COVID-19 ۆيرۋسىمەن كۇرەسۋ شارالارىن قاتاڭداتۋ تۋرالى زاڭ جوباسىن ماقۇلدادى. جوبا فرانتسيادا كافەلەرگە، مەيرامحانالارعا، ساۋدا ورتالىقتارىنا، تەاترلار مەن مۇراجايلارعا بارۋ ءۇشىن سانيتاريالىق رۇقساتتى ەنگىزۋدى، سونداي-اق مەديتسينا قىزمەتكەرلەرىن مىندەتتى تۇردە ۆاكتسيناتسيالاۋدى كوزدەيدى.

ۇلىبريتانيادا وسى اپتادان باستاپ شەكتەۋ شارالارى الىندى. ەندى تۇرعىندارعا ماسكا تاعىپ، الەۋمەتتىك قاشىقتىق ساقتاماسا دا بولادى. تۇنگى كلۋبتار، تەاتر مەن ستاديوندار كەلۋشىلەردى قابىلدايدى. قاشىقتان جۇمىس ىستەگەندەر كەڭسەگە ورالادى. ال ۆاكتسينانىڭ ەكى دوزاسىن العان بريتاندىقتار شەتەلدەن قايتىپ كەلگەندە، كارانتيننەن بوساتىلادى.

ۇلىبريتانياداعى بۇل لوكداۋن ەۋروپاداعى ەڭ ۇزاق شەكتەۋ شاراسى بولدى. قاڭتاردىڭ باسىندا ەنگىزىلگەن كارانتين ماۋسىمنىڭ اياعىندا الىنىپ تاستالۋى ءتيىس ەدى. الايدا كوروناۆيرۋستىڭ دەلتا شتامىنا بايلانىستى بۇل شەشىم كەيىنگە شەگەرىلىپ، بيلىك ەكپە سالۋ ناۋقانىن كۇشەيتتى. قازىر ۇلىبريتانيا ەۋروپا بويىنشا ۆاكتسينالاۋ قارقىنى جاعىنان الدا كەلە جاتقان ەلدەردىڭ ءبىرى سانالادى. لوكداۋننىڭ الىنۋىن اسىعا كۇتكەن جۇرت 19 شىلدەنى «ەركىندىك كۇنى» دەپ اتاپ كەتتى.

سوڭعى كۇندەرى كورولدىكتە ۆيرۋس جۇقتىرۋ دەرەكتەرى 50 مىڭ شاماسىندا تىركەلىپ وتىر. ماماندار «دەلتا شتامىنا قاتىستى جاعداي باقىلاۋدان شىعىپ كەتسە، تاۋلىكتىك ءوسىم 100 مىڭنان اسىپ كەتۋى مۇمكىن» دەيدى.

ۇلىبريتانيا – ەۋروپادا ىندەتتەن ەڭ قاتتى زارداپ شەككەن ەلدەردىڭ ءبىرى. ىندەت باستالعالى كوروناۆيرۋسپەن 5,2 ميلليون ناۋقاس تىركەلگەن، ونىڭ 129 مىڭعا جۋىعى قايتىس بولعان.

قازىر الەمدە كوروناۆيرۋستىڭ تەز تارايتىن ءارى قاۋپى جوعارى «دەلتا» ۆاريانتى ءورشىپ تۇر. ال باسىندا ۇلكەن قارقىنمەن كۇش العان ۆاكتسينالاۋ ناۋقانى كوپ ەلدە تەجەلىپ قالدى. وسىنىڭ سالدارىنان ءبىرشاما ەل كوروناۆيرۋس ۆاكتسيناسىن سالدىرۋدى مىندەتتەي باستادى.

"The Qazaq Times"