كوروناۆيرۋستىق ستاتسيونارى بار اۋرۋحانانىڭ قابىلداۋ ءبولىمى الدىنداعى جەدەل جاردەم كولىكتەرى. الماتى قالاسى، قالقامان ىقشام اۋدانى. 2021 جىل. فوتو: QT / كۇلتەگىن اسپانۇلى

قازاقستاندا ىندەت قارقىنى بۇرىن-سوڭدى بولماعان دەڭگەيدە ءورشىپ، كوروناۆيرۋس پەن وسى تەكتەس پنەۆمونياعا شالدىققاندار سانى تاعى 4542 ادامعا ارتتى. دۇيسەنبى كۇنى 60 شاقتى ادام كوز جۇمدى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 13 شىلدەدە كوروناۆيرۋس (كۆي+) جۇققان 4375 ادام، ال 12-ءسى كوروناۆيرۋس پنەۆمونياسىنا (كۆي-) شالدىققان 167 ادام تىركەلدى. قازىر ەلدە 45 مىڭنان اسا ادام (كۆي+ بويىنشا 43 795, كۆي- بويىنشا 1487) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي استانا (1128),  الماتى قالاسى (640) جانە قاراعاندى وبلىسىندا (589) تىركەلدى. بۇدان وزگە شىمكەنت (342), اتىراۋ (320), بقو (187),  ماڭعىستاۋ (180),  اقمولا (148), پاۆلودار (143) وبلىستارىندا دەرت ۇدەپ تۇر. وتكەن تاۋلىكتە 2960 ادام ايىعىپ شىعىپ، ۇيىنە جىبەرىلگەن. وسى دۇيسەنبىدە جيىنى 53 ادام قايتىس بولعان.

#COVID_پنەۆمونياسى 12 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 167 ناۋقاس ەسەپكە الىندى. ۆەدومستۆو دەرەگىنشە، سىرقاتتار اتىراۋ (25), الماتى وبلىسى (13), شقو (13), اقمولا (12), الماتى (11), استانا، قاراعاندى جانە ماڭعىستاۋ (ارقايسىندا ون-وننان) وبلىستارىندا كوپتەپ انىقتالعان. سونىمەن قوسا، 76 ادام ايىعىپ شىققان، تاعى 6 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 45 282 ناۋقاستىڭ 14,5 مىڭنان استامى اۋرۋحانادا، 30,5 مىڭى امبۋلاتورلىق باقىلاۋدا. احۋالى ناشار 880 ناۋقاستىڭ جاعدايى ناشار، ونداعى 198 ادامنىڭ ءحالى وتە اۋىر. بۇدان وزگە 116 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وتكەن كۇنگى دەرەك بويىنشا، ۆيرۋستىڭ تارالۋ قاتەرى جاعىنان استانا، الماتى، شىمكەنت قالالارى مەن اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، سقو، پاۆلودار وبلىستارى «قىزىل ايماققا» ەندى. الماتى، جامبىل، قىزىلوردا وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 466 مىڭعا، 1 تامىزدان بىلايعى كوروناۆيرۋس پنەۆمونياسى 58 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 524 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 10 640 ادام (كۆي+ / U07.1 – 4769, كۆي- / U07.2 – 3504, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 44-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 541 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"