قىرعىز وپپوزيتسياسى سوتتالىپ جاتىر

وتكەن جىلدان بەرى قاماۋدا وتىرعان قىرعىز وپپوزيتسيا وكىلدەرىنە بۇگىن سوت ۇكىمى شىقتى. بەكتۇر اسانوۆ پەن قۋانىچبەك قادىروۆقا ون ەكى جىل، ەرنەست كارىبەكوۆقا جيىرما جىل جازا بەرىلسە، داستان سارىعۇلوۆ ءتورت جىلعا قامالىپ، ونىڭ ءۇش جىلىن شارتتى تۇردە وتەۋ ۇكىمى جاريالاندى دەپ حابارلادى بي-بي-ءسيدىڭ قىرعىز قىزمەتى.

اتالعان ساياساتكەرلەردىڭ ادۆوكاتتارى بۇل ۇكىمگە قارسى شىعىپ، جوعارى سوتقا ارىزدانباقشى. سوتتالعان تاراپتار بۇل ءىستى ساياسي بۇيرىق دەپ وتىر.
سوت ۇكىمىندە ەنەرگەتيكا سالاسىنىڭ مامانى ەرنەست كارىبەكوۆ جيرما جىلعا اباقتىعا وتىراتىن بولدى. ول "مەملەكەتكە وپاسىزدىق جاساۋ", "قىلماستى جاۋىپ جاسىرۋ" باپتارى بويىنشا ايىپتالۋدا.
وپپوزيتسيا مايدانىنداعى ساياساتكەرلەر بەكتۇر اسانوۆ پەن قۋانىچبەك قادىروۆ ون ەكى جىلعا باس بوستاندىعىنان ايىرىلدى. ولار "بيلىكتى كۇشپەن باسىپ الۋعا ارەكەت جاساعان" جانە "قىلمىس جاساۋعا ارەكەتتەنگەن" دەگەن ايىپپەن سوتتالۋدا.
"بۇل بيلىكتىڭ بىزگە قاراتقان ساياسي بۇيرىعى، ءبىز تازامىز، بىردە-ءبىر فاكتى دالەلدەنگەن جوق. جەڭىس ءبىز جاقتا بولادى. بيلىك بارلىق جاساعان ىستەرى ءۇشىن جاۋاپ بەرەدى", - دەدى بەكتۇر اسانوۆ سوت ۇكىمى شىققاننان كەيىن.
قوعام قايراتكەرى داستان سارىعۇلوۆ "قىلماستى جاسىرعان" دەگەن ايىپپەن ءۇش جىلعا باس بوستاندىعىنان ايىرىلدى. سارعۇلوۆ وزىنە ارتىلعان ايىپتارمەن كەلىسپەي: "مەنى ايىپتايتىن ەشقانداي دالەلدەرى جوق. بۇل سوتتا دا انىقتالدى. بىراق، سونى بىلە تۇرا جاۋىپ، جاسىردى دەيدى. سوت ۇكىمىندە قاراما-قايشىلىقتار بار. مەن بۇلارمەن 2013 جىلى جولىققانمىن. ودان كەيىن تەلەفونمەن دە بايلانىسپادىم. ولاردىڭ ءىسىن قايتىپ جاۋىپ جاسىرا الامىن؟!" - دەدى.
وپپوزيتسيونەر قۋبانىچبەك قادىروۆ پەن بەكتۇر اسانوۆ وتكەن جىلعى ناۋرىزدا اكسىدا وتكەن ميتينگتەن كەيىن قامالعان. ەنەرگەتيكا سالاسىنىڭ مامانى ەرنەست كارىبەكوۆ، ۆيدەوتاسپاسى شىققاننان كەيىن 25 ناۋرىزدا تۇتقىندالعان. داستان سارىعۇلوۆ ماۋسىم ايىندا ۇستالىپ، جىل سوڭىندا ءۇي قاماعىنا شىققان ەدى.
ولاردىڭ ادۆوكاتتارى ايىپتالۋشىلاردىڭ مەملەكەتتىك تەلەارنالاردا تارقاتىلعان ءۇن جانە ۆيدەوكەسكىندەرى بۇرمالانعان، ارنايى جاسالعان دەپ ەسەپتەيدى.
بىراق، بيلىكتىڭ بۇل ءىس بويىنشا پىكىرى قاراما-قايشى. پرەزيدەنت المازبەك اتامباەۆ ءبىر جىل بۇرىن اكسىدا وتكەن ميتينگتەن كەيىن وپپوزيتسيا وكىلدەرىن جازالاۋ كەرەك دەگەن ەدى.
"البەتتە بۇل ادامداردى اۋرۋ دەپ قول سىلتەي سالساق بولار ەدى. بىراق مەن ولاردى قاتاڭ جازالاۋ كەرەك دەپ ويلايمىن. سەبەبى، بۇلاي جازاسىز قالۋعا بولادى دەپ ويلاماۋ كەرەك. بۇل اۋرۋ باسقالارعا دا جۇعۋى مۇمكىن. پرەزيدەنت بولعىڭ كەلسە، سايلاۋعا بار" دەگەن ەدى.
بۇل وقيعادا بيلىكتى جاقتاعان ەكسپەرتتەر «بۇل ساياساتشىلاردى شىنىندا دا مەملەكەتكە قاۋىپتى جاعداي توندىرگەنى ءۇشىن قامالدى» دەپ ەسەپتەيدى. ال، ساياساتكەر مارس ساريەۆ قامالعانداردى ساياسي تۇتقىندار دەپ ەسەپتەۋ كەرەك دەگەن پىكىر ءبىلدىردى.
ءسوز بولىپ جاتقان ءتورت ادامعا قاراتا شىققان بۇگىنگى سوت ۇكىمىنە نارازى بولعان تاراپتار، زاڭ بويىنشا ون كۇننىڭ ىشىندە قالالىق سوتقا ارىز بەرۋگە قۇقىلى.
جوعارى سوت مەملەكەتتىك قۇپيالارمەن جەكە تۇلعالارعا بايلانىستى جابىق بولعانى ايتىلدى.

“The Qazaq Times”