الەم بويىنشا كوروناۆيرۋستىڭ قاۋىپتى «دەلتا» شتامى 98 ەلدە انىقتالىپ، انتيرەكورد ورنادى. العاش رەت ءۇندىستاندا تىركەلگەن «دەلتا» قازىر دومينانت نۇسقاعا اينالعان. ول ۆيرۋستىڭ باستاپقى ۆاريانتىنا قاراعاندا ەداۋىر جۇقپالى جانە ونىڭ ءولىم قاۋپى جوعارىراق.

دۇنيەجۇزىلىك دەنساۋلىق ساقتاۋ ۇيىمى مەملەكەتتەردەگى ەكونوميكالىق احۋالدى وڭالتۋ ءۇشىن، ءارى پاندەميانى جەڭۋ ءۇشىن ۆاكتسيناتسيا ناۋقانىن مىقتاپ قولعا الۋ كەرەك دەيدى. ددسۇ باسشىسى تەدروس ادحانوم گەبرەيەسۋس: «ءبىز COVID-19 پاندەمياسىنىڭ ەڭ قاۋىپتى كەزەڭىندە تۇرمىز. «دەلتا» شتامى وتە تەز تاراپ بارادى. تىركەلگەن جاڭا ناۋقاستاردىڭ باسىم بولىگى ۆيرۋستىڭ وسى تۇرىنە شالدىققاندار. دەرتتى تۇبەگەيلى جەڭۋ ءۇشىن ءار مەملەكەتتە كەلەر جىلعا دەيىن حالىقتىڭ 70%-ى ەكپە الۋى كەرەك»، – دەيدى.

گەرمانيادا الداعى ايلاردا ۆاكتسينالاۋ قارقىنى ۇدەتىلەدى. مۇندا ەرەسەك ازاماتتاردىڭ ۇشتەن ەكى بولىگى كوۆيدكە قارسى ەكپە سالدىرعان. بۇل – ۇكىمەت جوسپارلاعان كورسەتكىشتەن دە ارتىق.

قازىردىڭ وزىندە اۋرۋ جۇقتىرۋدىڭ تەڭ جارتىسى قاۋىپتى مۋتاتسيانىڭ ۇلەسىنە ءتيىپ تۇر. مالىمەتتەر بويىنشا، گەرمانيادا اۋرۋدى جۇقتىرۋ سانى الدىمەن ازايىپ، كەيىن تاۋىلىگىنە 27 مىڭعا دەيىن جەتكەن.

گەرمانيانىڭ دەنساۋلىق ساقتاۋ ءمينيسترى يەنس شپان: «كوپ ۇزاماي، بولجام بويىنشا، گەرمانيادا «دەلتا» شتامى ءورشيدى. وسى ايدىڭ سوڭىندا 70-80%-عا جەتۋى مۇمكىن. دەلتا ۆيرۋستىڭ وزگە تۇرىنە قاراعاندا تەز جۇعاتىن شتامم ەكەنى بەلگىلى. ءبىز حالىق الدىنداعى ۋادەمىزدى ورىنداپ، ەلىمىزدىڭ ءار تۇرعىنىنا جازدىڭ اياعىنا دەيىن ەكپە سالدىرۋعا مۇمكىندىك بەرەمىز»، – دەدى.

پورتۋگاليادا «دەلتا» شتامىنىڭ تىم تەز تارالۋىنا بايلانىستى ەلدىڭ بىرقاتار ايماعىندا كومەندانتتىق ساعات ەنگىزىلدى. ەندى تۇرعىندار تۇنگى 11-دەن تاڭعى 5-كە دەيىن كوشەگە شىعا المايدى. ال كافە-مەيرامحانالار جۇمىس ۋاقىتىن قىسقارتادى. ءتارتىپتىڭ ساقتالۋىن پوليتسەيلەر قاداعالايدى.

اقش-تىڭ وكلەند قالاسىندا زووباق حايۋاناتتارىنا ۆاكتسينا سالىنا باستادى. جانۋارلارعا «زوەتيس» كومپانياسى ازىرلەگەن ەكسپەريمەنتالدى پرەپارات ەگىلىپ جاتىر. اتالعان ۆاكتسينانى امەريكانىڭ اۋىل شارۋاشىلىعى مينيسترلىگى جانە شتات ۆەتەرينارلارى ماقۇلداعان. وسى ۋاقىتقا دەيىن ونىڭ 11 مىڭنان استام دوزاسى وندىرىلگەن.

اۋستراليانىڭ جاڭا وڭتۇستىك ۋەلس شتاتىندا كوروناۆيرۋس جۇقتىرۋ بويىنشا تاۋلىكتىك رەكورد تىركەلدى. ىندەتتىڭ الدىن الۋ ماقساتىندا شتات استاناسى سيدنەيدە ەكى اپتالىق لوكداۋن جاريالاندى. سەبەبى وڭىردە «دەلتا» شتامىن جۇقتىرۋ دەرەگى ارتا باستاعان.

بۇگىنگە دەيىن اۋستراليا حالقىنىڭ تەك 8%-ى عانا ۆاكتسينا سالدىرعان. قازىر جەرگىلىكتى تۇرعىندار قاۋىپتى ينفەكتسياعا قارسى ەكپە سالدىرۋ ءۇشىن ۆاكتسينالاۋ ورتالىقتارىنا اعىلىپ جاتىر.

رەسەيدەگى احۋال دا ءماز ەمەس. ەلدە ءبىر تاۋلىكتە 24 مىڭنان استام ادام ينفەكتسياعا شالدىعىپ، 697-ءسى كوز جۇمدى. انتيرەكورد بىرنەشە كۇن قاتارىنان تىركەلدى. ناۋقاستاردىڭ كوبى ماسكەۋ مەن سانكت-پەتەربۋرگتە انىقتالعان. ەندى ماسكەۋدە جاڭا تالاپ بويىنشا رەسپيراتورلىق ۆيرۋستىق ينفەكتسيا جۇقتىرعانداردىڭ بارلىعى پتر تەست ناتيجەسى شىقپايىنشا وقشاۋلانادى. ەلدە ەكپە ەگۋ ناۋقانى دا قارقىن الدى. اپتاپ ىستىققا قاراماستان حالىق جاپپاي ۆاكتسينا قابىلداۋ ءۇشىن ۇزىن-سونار كەزەكتە تۇر.

«دەلتا» شتامى ءورشىپ تۇرعان ءۇندىستاندا سوڭعى ەكى ايدىڭ ىشىندە 200 مىڭ ادام كوروناۆيرۋستان قايتىس بولدى. وسىلايشا، اۋرۋ قۇرباندارىنىڭ جالپى سانى 400 مىڭعا جەتتى. ەلدىڭ دەنساۋلىق ساقتاۋ مينيسترلىگىنىڭ مالىمەتى بويىنشا سوڭعى ءبىر كۇننىڭ ىشىندە 853 ادام كوز جۇمىپ، 46 مىڭى ينفەكتسيا جۇقتىرعان. جەرگىلىكتى بيلىك قىركۇيەكتە ىندەتتىڭ جاڭا تولقىنى باستالادى دەگەن بولجام جاسادى.

قازاقستاندا ماۋسىمنىڭ ورتاسىنان بەرى ىندەتتىڭ تاراۋى قايتا كۇشەيدى. ەل بيلىگى مۇنى «دەلتا» ۆاريانتىنىڭ تارالۋىمەن تۇسىندىرەدى.

قازاقستاننىڭ ەپيدەميالىق كارتاسىندا «قىزىل ايماقتا» ساناۋلى اپتا بۇرىن تەك استانا عانا بولسا، قازىر تىزىمگە الماتى، شىمكەنت قالالارى، اقمولا، اتىراۋ، باتىس قازاقستان، قاراعاندى، ماڭعىستاۋ جانە پاۆلودار وبلىستارى دا ەنگەن.

"The Qazaq Times"