ۋكراينا پرەزيدەنتى ۆلاديمير زەلەنسكي رەسەي پرەزيدەنتى ۆلاديمير ءپۋتيندى قاقتىعىس بولىپ جاتقان دونباستا كەزدەسۋگە شاقىردى. 

بەينەۇندەۋىندە زەلەنسكي: «كەشە جانە بۇگىن نورمانديا تورتتىگىنىڭ كەڭەسشىلەرىنىڭ جانە TCG قاۋىپسىزدىك توبىنىڭ كەزدەسۋلەرىندە اتىستى توقتاتۋ تۋرالى تالقىلاندى. پۋتين مىرزا! مەن ءسىزدى ۋكراينانىڭ دونباسس قالاسىندا سوعىس ءجۇرىپ جاتقان كەز-كەلگەن جەردە كەزدەسۋگە شاقىرامىن»، – دەدى.

زەلەنسكي ەكى ەلدىڭ وتكەنگە جانە بولاشاققا دەگەن ءارتۇرلى كوزقاراستارىن پروبلەما رەتىندە ەمەس، مۇمكىندىك رەتىندە قاراستىرۋعا بولاتىندىعىن اتاپ ءوتتى. ۋكراينانىڭ باتىس مەملەكەتتەرى مەن ناتو-نى قولدايتىنىن، ولار ەلگە قارجىلاي كومەك كورسەتۋگە دايىن ەكەندىگىن، سونداي-اق رەسەيگە قارسى قاتاڭ سانكتسيالار سالاتىنىن دا ايتتى.

«ءبىز قورىقپايمىز، ويتكەنى بىزگە حالىقارالىق سەرىكتەستەر ۇلكەن قولداۋ كورسەتەدى. مەن امەريكا قۇراما شتاتتارىنىڭ، فرانتسيانىڭ، گەرمانيانىڭ، ۇلىبريتانيانىڭ، تۇركيانىڭ باسشىلارىمەن، ەۋروپا كەڭەسىنىڭ توراعاسىمەن جانە ناتو-نىڭ باس حاتشىسىمەن سويلەستىم. ولار ءبىزدى قارجىلاي قولداۋعا دايىن. ولار قاتاڭ سانكتسيالار ەنگىزۋگە جانە رەسەيگە قارسى قاتاڭ شەشىمدەر قابىلداۋعا دايىن»، — دەدى ۋكراينا باسشىسى.

زەلەنسكي رەسەيدى ەسكالاتسيانىڭ العىشارتتارىن قۇردى دەپ ايىپتادى. بۇل ماسەلەدە رەسەي اسكەرلەرىنىڭ ۋكراينا شەكارالارىنا جاقىن شوعىرلانۋىن دالەل رەتىندە كەلتىردى. «ەگەر بىردەڭە بولسا، ۋكراينا ءوزىن قورعاي ما؟ ءاردايىم» دەپ كيەۆتىڭ كەز كەلگەن جاعدايعا دايىن ەكەنىن ايتتى.

ناۋرىزدا دونباسستاعى جانجال قايتا ۋشىققان. ءتۇرلى حابارعا قاراعاندا، رەسەي اسكەرى ۋكراينا شەكاراسىنا جاقىن جەرلەرگە شوعىرلانا باستاعان. ماسكەۋ بۇل اسكەردىڭ ەشكىمگە قاۋىپ توندىرمەيتىنىن ايتادى. گەرمانيا كانتسلەرى انگەلا مەركەلمەن تەلەفون ارقىلى سويلەسكەن ۆلاديمير پۋتين ماسكەۋدىڭ بۇل قادامعا ءوز قاۋىپسىزدىگىن قامتاماسىز ەتۋ ءۇشىن بارعانىن ايتقان.

رەسەي 23 ناۋرىزدا اياقتالعان اسكەري جاتتىعۋلاردان كەيىن ۋكراينا شەكاراسىنا جاقىن ايماقتان اسكەر شىعارماعاندىقتان، اقش پەن ەۋرووداق بۇل جاعدايدى قاتاڭ باقىلاۋعا العان. سەبەبى شەكاراعا اسكەر جىبەرۋ – مەملەكەتتىڭ قاۋىپسىزدىگىنە نۇقسان كەلتىرۋى مۇمكىن. سونىمەن بىرگە، الەۋمەتتىك جەلىلەردە رەسەي بريانسك، ۆورونەج جانە روستوۆ وبلىستارىنا، اننەكسيالانعان قىرىمعا دا اسكەريلەر جىبەرىپ جاتقاندىعى تۋرالى حابارلامالار جاريالاندى. بۇل جاعداي حالىقارالىق قاۋىمداستىقتاردىڭ الاڭداۋشىلىعىن تۋدىردى. ال ءپۋتيننىڭ ءباسپاسوز حاتشىسى دميتري پەسكوۆ «رەسەي اسكەرلەرىنىڭ رەسەي اۋماعى ارقىلى ءوتۋى باسقا مەملەكەتتەردى مازالاماۋى كەرەك، ويتكەنى بۇل ولارعا ەشقانداي قاۋىپ توندىرمەيدى» – دەيدى.

"The Qazaq Times"