ۋكراينا پرەزيدەنتى ۆلاديمير زەلەنسكي رەسەيشىل ساياساتكەر ۆيكتور مەدۆەدچۋككە تاعىلعان ايىپ تۋرالى پىكىر ءبىلدىردى.

زەلەنسكي مەدۆەدچۋكتىڭ ۇستىنەن قوزعالعان قىلمىستىق ءىس جىلدار بويى ەلدىڭ ساياسي-ەكونوميكالىق كەڭىستىگىندە باسىمدىققا يە بولىپ كەلگەن ماگناتتار توبىنىڭ ىقپالىن شەكتەۋدىڭ باسى عانا دەيدى. سونداي-اق ول سۇحباتىندا: «سايلانباعان ەليتا وزدەرىنىڭ بيلىگى مەن بايلىعىن ۋىستان شىعارىپ الماس ءۇشىن جۇيەنى قۇردىمعا كەتىردى. بۇل – كۇرەستىڭ باسى عانا. ەلدەگى بارلىق وليگارحتار ازايىپ، ءىرى كاسىپكەر دەڭگەيىنە تۇسكەنگە دەيىن وسى سياقتى شارالار جالعاسا بەرەدى»، – دەدى.

12 مامىردا ۋكراينا پارلامەنتىنىڭ دەپۋتاتى ۆيكتور مەدۆەدچۋك پەن تاراس كوزاك مەملەكەتكە وپاسىزدىق جاسادى دەگەن كۇدىككە ءىلىندى. ۋكراينانىڭ قىلمىستىق كودەكسىنە سايكەس، كۇدىك راستالعان جاعدايدا ولار ون بەس جىلعا دەيىن باس بوستاندىعىنان ايىرىلۋى مۇمكىن.

باس پروكۋرور يرينا ۆەنەديكتوۆانىڭ مالىمەتىنشە، دەپۋتاتتار قىرىمدا ۇلتتىق رەسۋرستاردى توناپ، مەملەكەتكە قاستاندىق جاساعان. ازىرگە، ۆيكتور مەدۆەدچۋكتىڭ مەكەن-جايى انىقتالعان جوق. كەيىننەن مەدۆەدچۋكتىڭ ءباسپاسوز قىزمەتى ساياساتكەردىڭ ۋكراينادا ەكەنىن حابارلاپ، ونىڭ ءۇيى مەن كەڭسەسىندە ءتىنتۋ جۇرگىزۋ زاڭسىز دەدى. ال تاراس كوزاك رەسەيگە كەتكەن.

ۆيكتور مەدۆەدچۋك – رەسەي پرەزيدەنتى ۆلاديمير پۋتينمەن جەكە تىعىز بايلانىستاعى ۋكراين ساياساتكەرى. ول ۋكراينا شىعىسىنداعى ۋكراين اسكەريلەرى مەن رەسەي قولدايتىن سەپاراتيستەر اراسىنداعى قاقتىعىستى توقتاتۋ ءۇشىن وتەتىن كەلىسسوزگە ۇنەمى قاتىسادى.

"The Qazaq Times"