ۇزاق جىلدىق ليدەرلىك قىزمەتىنەن كەتۋ الدىندا گەرمانيانىڭ كانتسلەرى مەركەل حانىم «رەيتەرگە» ەكسكليۋزيپتى سۇحبات بەردى. سۇحباتىندا ول ءوزىنىڭ وكىلەتتى كەزەڭىندە جۇزەگە اسىرعان گەرمانيانىڭ قىتاي ساياساتى تۋرالى توقتالىپ، قىتايمەن ىنتىماقتاستىقتىڭ كەيبىر اسپەكتىلەرىندە بەيعامدىق بولعانىن مويىندادى. دەگەنمەن انگەلا مەركەل شيەلەنىستى جاعدايدان شىعۋ ءۇشىن بارلىق تاراپتارمەن بايلانىستى ساقتاۋدىڭ ماڭىزدى ەكەنىن اتاپ وتكەن.

گەرمانيا كانتسلەرى قىزمەتىندەگى 16 جىلدا مەركەل حانىم قىتايمەن بايلانىستى ساقتاۋدى تۇراقتى جالعاستىرعان ساياساتكەر. ناتيجەسىندە قىتاي گەرمانيانىڭ ەڭ ءىرى ساۋدا سەرىكتەسىنە اينالدى. سۇحباتىندا انگەلا مەركەل حانىم: «بالكىم، كەيبىر اسپەكتىلەردە ءبىزدىڭ باستاپقى كوزقاراسىمىز تىم اڭعال بولعان شىعار، بۇل كۇندەرى ءبىز مۇنى مۇقيات قاراستىردىق جانە بۇل دۇرىس بولدى»، – دەدى.

مەركەل كەلەسى كانتسلەر سايلاۋىنان باس تارتتى جانە كەلەسى ۇكىمەت قۇرىلىسىمەن قىزمەتىنەن كەتەدى. ول كەتەر الدىندا گەرمانيا جانە وزگە ەۋروپا ەلدەرىنىڭ قىتايمەن بايلانىستى جالعاستىرىپ، ءوزارا ۇيرەنۋى كەرەك دەپ ءبىلدىردى. سۇحباتىندا ول: «ءبىزدى تولىق اجىراتۋ قاتە شەشىم بولار ەدى، بۇل بىزگە زيان كەلتىرۋى مۇمكىن»، – دەگەن.

ءوز تۇسىندا قىتاي گەرمانيانىڭ ەڭ ءىرى ساۋدا سەرىكتەسى رەتىندە ءوزىنىڭ ەكونوميكالىق قارقىندى دامۋى مەن نەمىس ەكونوميكاسىنىڭ وسۋىنە دە ىقپال ەتتى. بىراق، بۇنىڭ كەرى جاعى دا بولدى، سىنشىلار گەرمانيانىڭ قىتايعا تىم تاۋەلدىلىگى ادام قۇقىعى سەكىلدى كەيبىر ماڭىزدى ۇستانىمداردا بەيجىڭگە قاراتا باتىل سىنىن شەكتەپ وتىر دەپ سانايدى.

The Qazaq Times