ەۋرووداقتىڭ 26 مۇشەسى بريۋسسەلدە شۇعىل ۆيدەو-كونفەرەنتسيا وتكىزىپ، گازاعا بەرىلەتىن گۋمانيتارلىق كومەك كولەمىن ارتتىرۋ تۋرالى شەشىم قابىلدادى.

سونداي-اق ولار يزرايل مەن پالەستينانى ەكى جاقتى قارۋلى قاقتىعىستى تەز ارادا توقتاتۋعا شاقىردى. ەو سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل: «زورلىق-زومبىلىقتىڭ بارلىق ءتۇرىن تەز ارادا توقتاتۋ جانە وق اتپاۋ رەجيمىن ەنگىزۋ باسىم باعىت بولۋى ءتيىس. ماقسات – بەيبىت تۇرعىنداردى قورعاپ، گازاعا گۋمانيتارلىق كومەك جەتكىزۋگە جول اشۋ. شەيح-دجارراح جانە شىعىس يەرۋساليمنىڭ باسقا اۋداندارىنداعى پالەستينالىق وتباسىلاردى كۇشتەپ كوشىرۋ ۇلكەن الاڭداۋشىلىق تۋدىرىپ وتىر. حالىقارالىق گۋمانيتارلىق قۇقىققا سايكەس مۇنداي ءىس-ارەكەتتەر زاڭسىز جانە جاعدايدى ۋشىقتىراتىنىن تاعى دا ەسكەرتكىم كەلەدى»، – دەدى.

بوررەل بايانداماسىندا «حاماس پەن باسقا تەرروريستىك ۇيىمداردىڭ ءيزرايلدى زىمىرانمەن اتقىلاۋىن ايىپتايمىز جانە ءيزرايلدىڭ قورعانۋعا قۇقىعى بار»، دەدى. ونىڭ بۇل مالىمدەمەسىن ۆەنگريانىڭ سىرتقى ىستەر ءمينيسترى پەتەر سييارتو بىرجاقتى دەپ ايىپتادى.

ەكى ەل اراسىندا باستالعان قاقتىعىس 10 مامىردان بەرى جالعاسىپ جاتىر. 12 مامىردا يزرايل گازا سەكتورىنا اۋەدەن شابۋىل جاساپ، حاماس توبىنىڭ كومانديرىن ءولتىردى. بۇعان جاۋاپ رەتىندە حاماس يزرايل تاراپىن راكەتامەن اتقىلادى. سونداي-اق يزرايل كوشەلەرىندە ەۆرەيلەر مەن يزرايلدىك ارابتار توبەلەسىپ، جانجالداسقان. بۇل ماسەلەدە يزرايل پرەمەرى بەنجامين نەتانياحۋمەن تەلەفون ارقىلى سويلەسكەن اقش پرەزيدەنتى دجو بايدەن حاماس توبىنىڭ راكەتا شابۋىلدارىن ايىپتاعان.

جاقىندا بۇۇ-نىڭ قاۋىپسىزدىك كەڭەسى شۇعىل وتىرىس وتكىزبەك. يزرايل پرەمەر-ءمينيسترى بينيامين نەتانياحۋ «قانشا شابۋىل قاجەت بولسا، سونشا سوققى» جاساي بەرەتىنىن مالىمدەدى.

گازانىڭ دەنساۋلىق ساقتاۋ مينيسترلىگىنىڭ مالىمەتىنشە، يزرايل تارابىنان جاسالعان زىمىران سوققىلارىنان گازادا 215 پالەستينالىق (61-ءى بالا) قازا بولدى، 1400-دەن استام ادام جارالاندى. ال گازانىڭ يزرايلگە جاساعان سوققىلارىنان 12 ادام قازا بولعان، جاراقاتتانعاندار دا بار.

"The Qazaq Times"