Euroodaqtıñ 26 müşesi Bryussel'de şwğıl video-konferenciya ötkizip, Gazağa beriletin gumanitarlıq kömek kölemin arttıru turalı şeşim qabıldadı.

Sonday-aq olar Izrail' men Palestinanı eki jaqtı qarulı qaqtığıstı tez arada toqtatuğa şaqırdı. EO sırtqı ister jäne qauipsizdik sayasatı jönindegi joğarğı ökili Jozep Borrel': «Zorlıq-zombılıqtıñ barlıq türin tez arada toqtatu jäne oq atpau rejimin engizu basım bağıt boluı tiis. Maqsat – beybit twrğındardı qorğap, Gazağa gumanitarlıq kömek jetkizuge jol aşu. Şeyh-Djarrah jäne Şığıs Ierusalimniñ basqa audandarındağı palestinalıq otbasılardı küştep köşiru ülken alañdauşılıq tudırıp otır. Halıqaralıq gumanitarlıq qwqıqqa säykes mwnday is-äreketter zañsız jäne jağdaydı uşıqtıratının tağı da eskertkim keledi», – dedi.

Borrel' bayandamasında «HAMAS pen basqa terroristik wyımdardıñ Izrail'di zımıranmen atqılauın ayıptaymız jäne Izrail'diñ qorğanuğa qwqığı bar», dedi. Onıñ bwl mälimdemesin Vengriyanıñ sırtqı ister ministri Peter Siyyarto birjaqtı dep ayıptadı.

Eki el arasında bastalğan qaqtığıs 10 mamırdan beri jalğasıp jatır. 12 mamırda Izrail' Gaza sektorına äueden şabuıl jasap, HAMAS tobınıñ komandirin öltirdi. Bwğan jauap retinde HAMAS Izrail' tarapın raketamen atqıladı. Sonday-aq Izrail' köşelerinde evreyler men izrail'dik arabtar töbelesip, janjaldasqan. Bwl mäselede Izrail' prem'eri Benjamin Netan'yahumen telefon arqılı söylesken AQŞ prezidenti Djo Bayden HAMAS tobınıñ raketa şabuıldarın ayıptağan.

Jaqında BWW-nıñ Qauipsizdik keñesi şwğıl otırıs ötkizbek. Izrail' prem'er-ministri Bin'yamin Netan'yahu «qanşa şabuıl qajet bolsa, sonşa soqqı» jasay beretinin mälimdedi.

Gazanıñ densaulıq saqtau ministrliginiñ mälimetinşe, Izrail' tarabınan jasalğan zımıran soqqılarınan Gazada 215 palestinalıq (61-i bala) qaza boldı, 1400-den astam adam jaralandı. Al Gazanıñ Izrail'ge jasağan soqqılarınan 12 adam qaza bolğan, jaraqattanğandar da bar.

"The Qazaq Times"