الماتى قالاسى «قىزىل ايماققا» ەنگەلى ەلۋ كۇننەن اسىپ، ال وسى ۋاقىت ارالىعىندا 27 807 ناۋقاس انىقتالسا دا كارانتين شەكتەۋى ءبىراز بوساڭسىدى. «باراحولكا» اتالىپ كەتكەن ساۋدا قاتارلارىنىڭ ءبىرى. 30 ءساۋىر 2021 جىل. فوتو: QT / كۇلتەگىن اسپانۇلى

كوكتەم تۋعالى قازاقستاندا 110 مىڭداي سىرقات تىركەلىپ ۇلگەردى. رەسپۋبليكانىڭ ءۇشىنشى تولقىندا قىزىل ايماققا وتكەنىنە اي تولدى. كۇندەلىكتى انىقتالىپ جاتقان ناۋقاستار سانى ەكى مىڭنان، ال ءولىم جاعدايى 20-دان ازايار ەمەس. بۇل پاندەميا كەزىندەگى ەڭ اۋىر كورسەتكىش. 

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 29 ءساۋىر كوروناۆيرۋس (كۆي+) جۇققان 2853 ادام، ال 28-ءى كۇنى كوروناۆيرۋس پنەۆمونياسىنا (كۆي-) شالدىققان 105 ادام تىركەلدى. قازىر ەلدە 42,7 مىڭنان اسا ادام (كۆي+ بويىنشا 42 235 ، كۆي- بويىنشا 495) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي الماتى قالاسى (675) مەن استانادا (566) تىركەلدى. بۇدان وزگە  قاراعاندى (255), الماتى (180), بقو (155), اقمولا (150), پاۆلودار (146), اقتوبە (130) وبلىستارى جانە شىمكەنتتە (105) دەرت دەندەپ تۇر. وتكەن تاۋلىكتە اۋرۋدان ايىققان 2626 ادام ۇيىنە جىبەرىلگەن. بۇدان وزگە بەيسەنبىدە جيىنى 30 ادام قايتىس بولعان.

#COVID_پنەۆمونياسى 28 ساۋىردە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 105 ناۋقاس ەسەپكە الىندى. ۆەدومستۆو دەرەگىنشە، جامبىل (25), الماتى (21), ششقو (11), ماڭعىستاۋ مانە اتىراۋ (ارقايسىز سەگىز-سەگىزدەن) وبلىستارىندا كوپتەپ تىركەلگەن. سونىمەن قوسا، 95 ادام ايىعىپ شىققان، تاعى 3 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 42 730 ناۋقاستىڭ 15 مىڭى اۋرۋحانادا، 27,5 مىڭى امبۋلاتورلىق باقىلاۋدا. احۋالى ناشار 763 ناۋقاستىڭ جاعدايى قيىن، ونداعى 196 ادامنىڭ ءحالى وتە اۋىر. بۇدان وزگە 112 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان سقو، قوستاناي مەن تۇركىستان وبلىسى «جاسىل ايماقتا». الماتى، شقو، جامبىل، اقتوبە، ماڭعىستاۋ وبلىستارى مەن شىمكەنت «سارى»، ال اتىراۋ، اقمولا، بقو، پاۆلودار، قىزىلوردا،  قاراعاندى وبلىستارى، الماتى قالاسى مەن استانا «قىزىل ايماقتا» تۇر.

ۇكىمەت مالىمەتىنشە، وسى كوكتەمدە گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە كەمىندە 2,5 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىندا تابىلعان كەيستەر سانى – 75 مىڭ سىرقات جانە 615 ءولىم جاعدايى. بۇل ناۋرىز ايىنان ەكى ەسەگە ارتىق. جالپى كوكتەمنىڭ ەكى ايىندا 110 مىڭ (كۆي+ 106 مىڭ، كۆي- 3,5 مىڭ) ناۋقاس انىقتالدى، 1062 ادام (كۆي+ 896, كۆي- 166) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 320 مىڭعا، 1 تامىزدان بىلايعى كوروناۆيرۋس پنەۆمونياسى 53 مىڭعا تاقاعان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 372,5 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 6081-ءى (كۆي+ / U07.1 – 3668, كۆي- / U07.2 – 794, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 47-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 1 ملن 184 مىڭ ادام كوروناۆيرۋسقا قارسى رەسەيلىك Sputnik V جانە وتاندىق QazVac ۆاكتسيناسىنىڭ العاشقى دوزاسىن العان.

"The Qazaq Times"