فوتو: eadaily.com

بريتانيانىڭ حالىقارالىق سىبايلاس جەمقورلىققا قارسى ۇيىمى رەسەيدىڭ ون ءتورت ازاماتىنا سانكتسيا ەنگىزۋ تۋرالى شەشىم شىعاردى. بۇعان دەيىن وسى ازاماتتار اقش-تاعى انتيرەسەيلىك «ماگيتسكي تىزىمىنە» دە ەنگىزىلگەن.

مالىمەتتەر بويىنشا، اتالعان تۇلعالارعا قاتىستى شەكتەۋ شارالارى «2007 جىلى جۇزەگە اسىرىلعان سالىقتى قايتارۋدىڭ الاياقتىق سحەماسى ارقىلى رەسەي مەملەكەتتىك قاراجاتىنا 230 ميلليون دوللارعا بالاما سومانى ۇرلاعانى ءۇشىن» ەنگىزىلگەن. بۇل قاراجاتتىڭ ءبىر بولىگى شەتەلگە شىعارىلعان. سونىمەن قاتار، قارا تىزىمگە گۆاتەمالا كونگرەسى توراعاسىنىڭ ءبىرىنشى ورىنباسارى (ەلدىڭ ءبىر پالاتالى پارلامەنتى) فەليپە الەحوس لورەنسانا جانە Albanisa كومپانياسىنىڭ ۆيتسە-پرەزيدەنتى جانە نيكاراگۋا ۇلتتىق ازاتتىق ساندينيستا مايدانىنىڭ بۇرىنعى قازىناشىسى حوسە فرانسيسكو لوپەس سەنتەنو كىردى. ولاردىڭ ۇلىبريتانياداعى اكتيۆتەرى تابىلعان جاعدايدا بۇعاتتالىپ، پاتشالىققا كىرۋگە تىيىم سالىنادى.

رەسەي ازاماتتارىنا ەنگىزىلگەن سانكتسيالىق تىزىمدە:

  • جەمقورلىقپەن كۇرەس باسقارماسى باسشىسىنىڭ ورىنباسارى ارتەم كۋزنەتسوۆ;
  • تەرگەۋ دەپارتامەنتىنىڭ بۇرىنعى تەرگەۋشىسى پاۆەل كارپوۆ;
  • تەرگەۋشىلەر ستانيسلاۆ گورديەۆسكي مەن ولەگ ۋرجۋمتسەۆ;
  • سالىق ينسپەكتسيالارىنىڭ باسشىلارى ولگا ستەپانوۆا، ونىڭ كۇيەۋى ۆلادلەن ستەپانوۆ جانە ەلەنا حيمينا;
  • زاڭگەرلەر اندرەي پاۆلوۆ جانە يۋليا مايوروۆا;
  • «گراند-اكتيۆ» باس ديرەكتورى الەكسەي شەشەنيا;
  • كاسىپكەرلەر ۆياچەسلاۆ حلەبنيكوۆ جانە ۆيكتور ماركەلوۆ;
  • «امبەباپ جيناق بانكىنىڭ» بىرلەسكەن يەلەرى دميتري كليۋەۆ پەن گەننادي پلاكسين بار.

ۇلىبريتانيانىڭ سىرتقى ىستەر ءمينيسترى دومينيك رااب سانكتسيا ەنگىزۋدىڭ باستى ماقساتى «الەمدەگى اۋقىمدى سىبايلاس جەمقورلىقتىڭ الدىن الۋ جانە ونىمەن كۇرەسۋ; جەمقورلىقپەن بايلانىسى بار جەكە تۇلعالاردىڭ نەمەسە ۇيىمداردىڭ اكتيۆتەرىن توقتاتۋ، سونداي-اق بىرىككەن كورولدىككە كىرۋگە تىيىم سالۋ» دەپ مالىمدەدى.

ماگنيتسكي ءىسى

2008 جىلدىڭ 24 قاراشاسىندا Firestone Duncan اۋديتورلىق كومپانياسىنىڭ 37 جاستاعى باسقارۋشى سەرىكتەسى، Hermitage Capital قورىنىڭ اۋديتورى سەرگەي ماگنيتسكي سالىق تولەۋدەن جالتارعانى ءۇشىن ۇستالدى. 26 قاراشادا ماسكەۋدىڭ تۆەر سوتىنىڭ شەشىمىمەن ول قاماۋعا الىندى.

2009 جىلى قازاندا قوردىڭ نەگىزىن قالاۋشى ۋيليام براۋدەرگە 522 ميلليون رۋبلدەن استام سالىق تولەۋدەن جالتارعانى ءۇشىن ايىپ تاعىلدى. «بۋتىركا» تەرگەۋ يزولياتورىندا 11 اي قاماۋدا بولعاننان كەيىن، ول 2009 جىلدىڭ 16 قاراشاسىندا «ماتروسسكايا تيشينا» تەرگەۋ يزولياتورىنىڭ رەانيماتسيا بولىمىندە قايتىس بولدى. ماگنيتسكيگە قاتىستى قىلمىستىق ءىس سول جىلدىڭ 30 قاراشاسىندا توقتاتىلدى.

"The Qazaq Times"