ۋكراينا «نورماند تورتتىگى» مۇشەلەرىنە (گەرمانيا، فرانتسيا، رەسەي) كەزەكتى ءسامميتتى وتكىزۋ تۋرالى ۇسىنىس ءبىلدىردى. سەبەبى كيەۆ ءۇشىن ماسكەۋدىڭ اگرەسسيالىق ساياساتىنا توتەپ بەرۋ ماڭىزدى. بۇل تۋرالى ۋكراينانىڭ سىرتقى ىستەر ءمينيسترى دميتري كۋلەبا حابارلادى.

«ءسامميتتى ونلاين رەجيمدە وتكىزۋ مۇمكىندىگى ءالى ايتارلىقتاي تالقىلانعان جوق. بىراق ءبىز ءسامميتتى وتكىزۋ ءۇشىن ءۇش ەلدىڭ، ەڭ الدىمەن فرانتسيا، گەرمانيا جانە رەسەيدىڭ كەلىسىمىن كۇتەمىز»، — دەدى ول.

بۇعان دەيىن رەسەي سىرتقى ىستەر ءمينيسترىنىڭ ورىنباسارى اندرەي رۋدەنكو «نورماند ءسامميتى» 2019 جىلدىڭ جەلتوقسانىندا پاريجدەگى كەزدەسۋدە قابىلدانعان شەشىمدەر ورىندالعاننان كەيىن عانا وتكىزىلەتىنىن ايتقان. باتىس تاراپى سامميتتە كەلىسىلگەندەي «دونباستاعى اتىستى توقتاتۋ، اسكەرلەردى شىعارۋ، جاڭادان وتكىزۋ پۋنكتتەرىن اشۋ، شتاينمايەر فورمۋلاسىن جۇزەگە اسىرۋ» تولىققاندى ورىندالعان جوق دەپ سانايدى.

الدىڭعى «نورماند فورماتى» ءسامميتى 9 جەلتوقساندا پاريجدە ءوتتى. جيىندا تاراپتار رەسەيگە ەنگىزىلگەن سانكتسيالار ءوز كۇشىن جويمايدى دەگەن شەشىمگە كەلگەن. تورتتىكتىڭ كەزەكتى ءسامميتى وتەتىن كۇن الداعى ۋاقىتتا بەلگىلى بولادى.

ايتا كەتەيىك، «نورماند تورتتىگى» نەمەسە «نورماند ءسامميتى» — ۋكراينانىڭ شىعىسىنداعى جانجالدى رەتتەۋ ماقساتىندا 2014 جىلدان بەرى جۇمىس ىستەپ كەلەدى. جىل سايىن گەرمانيا، فرانتسيا، رەسەي جانە ۋكراينا باسشىلارى مەن سىرتقى ىستەر مينيسترلەرى كەزدەسەدى. فرانتسيا مەن گەرمانيانىڭ ۇستانىمدارى تەڭ — ولار ءۇشىن دونباستاعى قاقتىعىستىڭ شەشىلۋى ماڭىزدى.

"The Qazaq Times"