كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟

6 قازاندا الماتى قالاسىندا 624 ۋچاسكەدە رەفەرەندۋم ءوتىپ جاتىر. QT ناۋرىزباي اۋدانىنداعى بىرنەشە ۋچاسكەگە باردى. كەي ۋچاسكەدە باقىلاۋشىلار مەن كوميسسيا ءتورايىمدارىنىڭ ەسەبىندە ەلەۋلى ايىرماشىلىق بايقالسا، كەيبىرىندە بيلىكتەن قارجىلاندىرىلاتىن ۇيىمداردىڭ باقىلاۋشىلارى مەن تاۋەلسىز باقىلاۋشىلاردىڭ ساناعى قايشى ءوربىپ جاتقانى كورىندى.

№200 مەكتەپتە ورنالاسقان №562 ۋچاسكەنىڭ كوميسسيا ءتورايىمى روزا زاكيريانوۆا ۋچاسكە تىزىمىندەگى 2778 ادامنىڭ نەشەۋى كەلىپ قاتىسقانىن ايتا المايمىز دەيدى.

–  ونى ناقتى ايتا المايمىز. ۋچاسكە ساعات 20:0-دە جابىلعاسىن، ساناقتان كەيىن باقىلاۋشىلارعا جاريا ەتەمىز. ءىشىنارا ءدال قازىر بەرە المايمىز، – دەيدى كوميسسيا ءتورايىمى.

توعىز ادامنان تۇراتىن كوميسسيا قۇرامىنان وزگە باقىلاۋشىلارمەن تىلدەستىك. «داۋىس» ۇيىمىنان قاتىسىپ وتىرعان باقىلاۋشى جۇرگىزىپ وتىرعان ەسەبىن «قۇپيا» ەكەنىن ايتادى. «ساناق جۇرگىزىپ وتىرمىن، بىراق بەرە المايمىن، مەن تەك باقىلايمىن» دەيدى ول.

№562 ۋچاسكەنىڭ باقىلاۋشىلارى. الماتى قالاسى، ناۋرىزباي اۋدانى. فوتو: QT / كۇلتەگىن اسپانۇلى

«تاۋەلسىز باقىلاۋشىلار» بىرلەستىگىنىڭ باقىلاۋشىسى نويان ومىرزاقۇلى «بۇل قۇپيا ەمەس، قازىرگە دەيىن 45 ادام كەلدى» دەپ مالىمدەدى.

العاشىندا «ساناپ وتىرمىن، بىراق بەلسەندىلىك ەسەبىن بولىسە المايمىن» دەگەن «ەر ازامات» ۇيىمىنىڭ تىلەگەن نۇرجاۋباەۆ كەيىننەن 50 شاقتى ادام قاتىسقانىن ايتتى.

بۇل ەسەپتى «ادام جانە قوعام» ۇيىمىنىڭ ارۋجان تولەگەنوۆا دا راستادى. «ازاماتتىق اليانس» وكىلى ءاسيا تىلەپوۆا،  «ەل داۋىسى» ۇيىمىنىڭ باقىلاۋشىسى جانە AMANAT پارتياسىنىڭ مۇشەسى ۋچاسكەگە كەلگەن 60 شاقتى ادامدى بايقاعان.

وسىلايشا، ءتورايىم مەن «داۋىس» وكىلى «ءىشىنارا ەسەپتى» جاسىرعانىمەن، «تاۋەلسىز باقىلاۋشىلار» وكىلى قاس قاقپاي كۇزەتكەننىڭ وزىندە 45 ادام قاتىسقانىن جەتكىزدى.

№592 ۋچاسكەدەگى رەفرەندۋمنىڭ بارىسى. الماتى قالاسى، ناۋرىزباي اۋدانى. فوتو: QT / كۇلتەگىن اسپانۇلى

№592 ۋچاسكەنىڭ ءتورايىمى ازيزا وتەگەنوۆا تىزىمدە 2710 ازامات بارىن، سۇقبات الارعا دەيىنگى ۋاقىتتا 60 ادامنىڭ كەلگەنىن باياندادى. بىراق باقىلاۋشىلاردىڭ ەسەبى ايتارلىقتاي كوبىرەك.

«داۋىس» ۇيىمىنان داۋلەتقازى «بارلىعى تالاپقا ساي وتۋدە، قازىر 78 ادام كەلدى» دەيدى. ءدال وسىعان ۇقساس ەسەپتى «ءبارى ءادىل ءوتىپ جاتىر، تاماشا» دەگەن «ادام جانە قوعام» ۇيىمىنىڭ باقىلاۋشىسى اقەركە سەيىلحان دا اتادى. مۇنى قايتالاعان «ەر ازامات» ۇيىمىنىڭ وكىلى نازگۇل سۇلۋقاشوۆانىڭ ايتۋىنشا، «ەشقانداي قۇقىق بۇزۋشىلىق تىركەلمەدى، ءادىل وتۋدە». AMANAT پارتياسىنىڭ اسەل قۇرماناەۆا دا 77-78 ادام كەلگەنىن ايتتى. «ازاماتتىق اليانس» ۇيىمىنان وتىرعان لاۋرا تولەپوۆانىڭ ەسەبى دە وسى شامادا.

№627 ۋچاسكە. الماتى قالاسى. فوتو: QT / كۇلتەگىن اسپانۇلى

اۋماعىندا 2801 ازاماتى بار №627 ۋچاسكە ءتورايىمى فاريدا ساتۋعانوۆا «جۇزگە جۋىق ادام كەلدى» دەدى. بىراق ءوزىن كاميلا دەپ تانىستىرعان «ازاماتتىق اليانس» ۇيىمىنىڭ باقىلاۋشىسى «ساعات 9:00-دەگى قاتىسقاندار مالىمەتى 47 ادام» دەيدى.

AMANAT پارتياسىنىڭ وكىلى سايا ءالىمبايدىڭ دەرەگى ءتورايىمنىڭ اقپاراتىنان ەكى ەسە از.

«سايلاۋ ويداعىداي ءوتىپ جاتىر. بارلىعىن باقىلاۋدا ۇستاپ وتىرمىز. قۇقىق بۇزۋشىلىق بولىپ جاتقان جوق. ءبارى جاقسى. ...مەنىڭ ساناۋىم بويىنشا، شامامەن 50-دەن جوعارى، 50-گە جۋىق بولىپ تۇر»، – دەدى بيلىك پارتياسىنىڭ بايقاۋشىسى.

«داۋىس» ۇيىمىن پارتيا دەپ شاتاسقان باقىلاۋشى گۇلبارشىن الدابەرگەنوۆا ەلۋگە تارتا تۇرعىن كەلگەنىن جەتكىزدى.

«ادام جانە قوعام» وكىلى اقتولقىن قۇدايبەرگەن تاڭعى 6:00-دەن بەرى «-45 ادام كەلىپ داۋىسىن بەردى» دەيدى. وسى ۇيىمنىڭ ەكىنشى باقىلاۋشىسى دارىن اسقاروۆ «47 ادام بيۋللەتەن العانىن» ايتتى.

The Qazaq Times