«نۇر وتان، ءتول مەرەكەڭ قۇتتى بولسىن». الماتىدا جالعىز ادامدىق پيكەت ءوتتى

1 ءساۋىر بەلسەندى بەسجان كۇمىسبەكتەگى «نۇر وتان» پارتياسى الماتى قالالىق فيليالىنىڭ عيماراتىنا بارىپ، جالعىز ادامدىق پيكەت وتكىزدى. ول قولىنا ۇستاپ شىققان پلاكاتتا «نۇر وتان،  ءتول مەرەكەڭ قۇتتى بولسىن!» دەگەن جازۋ بار.

بەلسەندى پارتيا عيماراتىنا كىرىپ،  پيكەتتى ادەيى «1 ءcاۋىر — كۇلكى كۇنىنە» وراي ۇيىمداستىرعانىن ايتتى. ونىڭ سوزىنشە،  1 ءساۋىر — «نۇر وتان» پارتياسىنىڭ ءتول مەرەكەسى.

— قازاقستاندا مەرەكە كوپ قوي. بۇگىن، 1 ءساۋىر وتكەن سوۆەت كەزەڭىندە كۇلكى، الداۋ كۇنى بولعان ەكەن. «پەرۆىي اپرەل نيكومۋ نە ۆەر» دەيدى. ال ءبىز قازىر كىمگە الدانىپ ءجۇرمىز؟ بيلىكتى يەمدەنىپ الىپ، حالىقتى الداپ، توناپ وتىرعان بيلىك باسىنداعىلار. ولاردىڭ كوشباسشىسى — «نۇر وتان». سوندىقتان دا بۇگىنگى كۇندى «نۇر وتاننىڭ» تول مەرەكەسى دەپ ەسەپتەيمىن. ولار رەنجىمەسىن، قالعان 365 كۇن دە سولاردىڭ مەرەكەسى. قازاقستاندا نە جاسالسا دا، «نۇر وتاننىڭ» ۇرانىمەن جاسالادى. مىسالى پاۆلوداردا سوڭعى التى اكىمنىڭ تورتەۋى سوتتالدى. ولاردىڭ ءبارى نۇروتاندىق. بۇلار قىلمىسكەرلەردى جاساۋشى جانە سىرتقا ۇرىلاردى ەكسپورتتاۋشى پارتيا، — دەدى بەسجان كۇمىسبەكتەگى پارتيا عيماراتىنىڭ ىشىندە.

ول سودان كەيىن «عيمارات الدىنان ءوتىپ جاتقان ادامدار پلاكاتتاعى جازۋدى كورسىن، ولارعا بۇل پارتيانىڭ قانداي ەكەنىن ايتايىن» دەپ سىرتقا شىقتى.  سول كەزدە ءوزىن الماتى اكىمدىگىنىڭ وكىلىمىن تانىستىرعان ادام بەلسەندىگە «بۇل ارەكەتىڭىز زاڭعا قايشى، توقتاتۋىڭىزدى تالاپ ەتەمىز» دەپ ەسكەرتۋ جاساپ، عيمارات ىشىنە كىرىپ كەتتى.

بەلسەندى بەسجان كۇمىسبەكتەگى اكىمدىك وكىلىنە پيكەتكە نە سەبەپتى شىققانىن ايتىپ جاتىر. الماتى.  2021 جىل 1 ءcاۋىر  فوتو: QT / ميات كاشىباي

ال بەسجان كۇمىسبەكتەگى اكىمدىك وكىلىنىڭ ەسكەرتۋىنە ءوز ءۋاجىن ايتتى.

— مەن قازاقستان ازاماتى رەتىندە ءوز قارسىلىعىمدى ءبىلدىرۋ ءۇشىن بىرەۋدەن رۇقسات سۇراۋعا مىندەتتىمىن دەپ ەسەپتەمەيمىن. ويتكەنى مەنىڭ نارازىلىعىم بيلىككە، باسشىلارعا. ولاردان رۇقسات سۇراپ نە قاجەتى بار؟ ولارعا مەنىڭ نارازىلىعىم ءتيىمسىز بولعاندىقتان، رۇقسات بەرمەيتىنى بەلگىلى عوي، — دەدى بەلسەندى.

مۇنان كەيىن پارتيا وكىلى شىعىپ، بەلسەندىدەن قانداي تالابى بارىن سۇراپ، عيمارات ىشىنە كىرىپ سويلەسۋگە شاقىردى. ءوز كەزەگىندە كۇمىسبەكتەگى «مەنىڭ سىزدەرگە تالابىم جوق. بۇگىن سىزدەردىڭ مەرەكەلەرىڭىز ەكەنىن ايتۋعا كەلگەنمىن. عيمارات ىشىنە كىرمەيمىن، اۋلادا جۇرگەن ادامدار مەنىڭ پلاكاتىمدى كورسىن. مەرەكەلەرىڭىز قۇتتى بولسىن» دەدى.

بەلسەندى بەسجان كۇمىسبەكتەگىمەن تىلدەسۋگە تىرىسقان ەكىنشى شەنەۋنىك. الماتى. 2021 جىل 1 ءcاۋىر  فوتو: QT / ميات كاشىباي

بەلسەندى پلاكاتىن ۇستاپ پارتيا عيماراتىنىڭ سىرتىندا جارتى ساعاتتاي ءجۇرىپ، ءوز اكتسياسىن اياقتادى. ول سول ماڭنان ءوتىپ جاتقان ادامدارعا «بۇگىن — نۇر وتاننىڭ مەرەكەسى، بىلە جۇرىڭىزدەر» دەدى. ادامدار جىميىپ ءوتىپ كەتە بەردى. «دۇرىس، دۇرىس»  دەگەندەر دە بولدى.

27 جاستاعى بەسجان كۇمىسبەكتەگى — بيلىككە قارسى نارزىلىق اكتسيالارىنا ءجيى شىعاتىن بەلسەندىلەردىڭ ءبىرى. ول بۇعان دەيىن دە بىرنەشە رەت جالعىز ادامدىق پيكەت وتكىزگەن. 2019, 2020 جىلدارى "بەيبىت جيىن وتكىزۋ ءتارتبىن بۇزدى" دەگەن ايىپپەن بىرنەشە مارتە اكىمشىلىك جازاعا تارتىلعان.

1 ءcاۋىر بۇرىنعى سوۆەت ەلدەرىندە جانە الەمنىڭ كەيبىر مەملەكەتتەرىندە بەيرەسمي تۇردە كۇلكى كۇنى سانالادى. بۇل كۇنى ادامدار ءبىر-ءبىرىن الداپ، ازىلدەسەدى.

«نۇر وتان» — 1999 جىلى قازاقستاننىڭ سول كەزدەگى پرەزيدەنتى نۇرسۇلتان نازارباەۆتىڭ باستاماسىمەن قۇرىلعان پارتيا. بۇل ساياسي ۇيىم ءوزىن  حالىقتىق، دەموكراتيالىق پارتيا رەتىندە دارىپتەيدى. الايدا ەلدە وعان قارسىلار كوپ. قۇرىلعاندا «وتان» پارتياسى دەپ اتالعان ۇيىم 2006 جىلى نازارباەۆتىڭ ەسىمىنىڭ العاشقى بۋىنىن قوسىپ، «نۇر وتان» اتاندى. قازاقستاندى 30 جىلعا جۋىق ۇزدىكسىز بيلەپ، 2019 جىلى پرەزيدەنتتىكتەن كەتكەن نازارباەۆ ءالى دە پارتيانى ءوزى باسقارىپ وتىر.

"The Qazaq Times"