فوتو: ازاتتىق راديوسى

شىمكەنتتە قاڭتار وقيعاسىنا بايلانىستى "جاپپاي تارتىپسىزدىك" بابىمەن سوتتالعان بەلسەندىلەر جانمۇرات اشتاەۆ جانە ءلاززات دوسمامبەتوۆا تۇرمەدەن حات جولداپ، ەۋروپا وداعىنىڭ دەپۋتاتتارى مەن بۇۇ-دان اراشا سۇرادى. بۇل تۋرالى ازاتتىققا ولاردىڭ تۋىستارى حابارلادى دەپ جازدى ورتالىق ازيا جاڭالىقتار قىزمەتى.

ءال-فارابي اۋداندىق سوتىنىڭ شەشىمىمەن كەلىسپەي اپەللياتسيالىق شاعىم تۇسىرگەن بەلسەندىلەر شىمكەنتتىڭ "ساۋلە" ىقشام اۋدانىنداعى يچ 167/11 تەرگەۋ يزولياتورىندا جاتىر. ونىڭ ءبىرى، كوپبالالى ايەل ءلاززات دوسمامبەتوۆانىڭ دەنساۋلىعى ناشارلاعان.

- انامنىڭ جۇرەگى مەن باسى اۋىرىپ ءجۇر. قولىن كوتەرە المايدى. ءبىر اپتا بۇرىن اناليز تاپسىردىق. ناتيجەسى كەلمەي جاتىر. حاتتى قورعاۋشىسى ارقىلى بەرىپ جىبەردى، - دەدى دوسمامبەتوۆانىڭ قىزى ايجان نادىربەك.

دوسمامبەتوۆا حاتىندا "زاڭسىز سوتتالعانىن، قاڭتارداعى جاپپاي نارازىلىق كەزىندە كونستيتۋتسيالىق قۇقىعىن پايدالانىپ جۇمىسسىزدىق، جالاقىنىڭ ازدىعى، قىمباتشىلىق سياقتى الەۋمەتتىك ماسەلەلەردى ايتۋ ءۇشىن ميتينگىگە شىققانىن، قىلمىس جاساماعانىن ايتقان".

"ەۋروپا وداعىنىڭ دەپۋتاتتارى مەن بۇۇ وكىلدەرى! سىزدەردەن قاڭتار وقيعاسىنا بايلانىستى تۇرمەگە كەسىلگەن ساياسي تۇتقىنداردى بوساتۋعا ىقپال ەتۋدى، ويدان قۇراستىرىلعان قىلمىستىق ىستەرگە حالىقارالىق تەرگەۋ جۇرگىزۋدى سۇرايمىن" دەيدى بەلسەندى حاتىندا.

27 شىلدەدە جازىلعان حاتتى قىزى ايجان نادىربەك 2 تامىزدا Facebook پاراقشاسىندا جاريالاعان.

بەلسەندى جانمۇرات اشتاەۆ تا ايەلى ءمولدىر نۇرانوۆانىڭ الەۋمەتتىك جەلىدەگى پاراقشاسىندا جاريالانعان حاتىندا بۇۇ مەن ەۋروپا وداعىنان كومەك سۇراپ، ساياسي بەلسەندىلىگى ءۇشىن تۇرمەگە تۇسكەنىن ايتقان. قازاقستاندا قۇقىق قورعاۋشىلار ءۇش بەلسەندىنى "ساياسي تۇتقىن" دەپ تانىعان ەدى.

15 شىلدەدە شىمكەنت قالاسىنىڭ ءال-فارابي اۋداندىق سوتى قاڭتار وقيعاسىنا بايلانىستى قىلمىستىق كودەكستىڭ "جاپپاي تارتىپسىزدىك" بابى بويىنشا ايىپتالعان بەلسەندىلەر جانمۇرات اشتاەۆتى 3 جىل ءبىر ايعا، ءلاززات دوسمامبەتوۆاگى 3 جىل 7 ايعا تۇرمەگە كەسكەن. بەلسەندىلەر ۇكىممەن كەلىسپەي، اپەللياتسيالىق شاعىم تۇسىرگەن.

51 جاستاعى ءلاززات دوسمامبەتوۆا مەن 44 جاستاعى جانمۇرات اشتاەۆ 8 قاڭتاردا قاماۋعا الىنعان. ولار بۇل ءىستى ساياسي بەلسەندىلىگىمەن بايلانىستىرادى.

كەيىنگى ءۇش جىلدان بەرى قوعامدىق-ساياسي ماسەلەلەرگە پىكىرىن اشىق ايتىپ جۇرگەن بەلسەندىلەر بىلتىر "تىيىم سالىنعان ۇيىمنىڭ ىسىنە ارالاستى" دەگەن ايىپپەن سوتتالىپ، ارقايسىسىنىڭ بوستاندىعى ءارتۇرلى مەرزىمگە شەكتەلگەن ەدى. سول كەزدە قازاقستاننىڭ تاۋەلسىز قۇقىق قورعاۋشىلارى ولاردى "ساياسي تۇتقىندار" قاتارىنا قوسقان.

شىمكەنتتە 4-6 قاڭتار ارالىعىندا جاپپاي نارازىلىق بولىپ، سوڭى جاپپاي دۇربەلەڭگە ۇلاسقان. رەسمي اقپارات بويىنشا، شىمكەنتتەگى قاڭتار وقيعاسىندا 20 ادام ءولىپ، 200-دەن استام ادام جارالانعان.