فوتو: ەرا

اقش پرەزيدەنتى دجو بايدەننىڭ اكىمشىلىگى كەلەسى اپتادا رەسەيگە سانكتسيا ەنگىزۋى مۇمكىن. بۇل تۋرالى CNN حابارلادى.

وسى اپتادا اقش ۇلتتىق بارلاۋ قىزمەتى 2020 جىلعى پرەزيدەنتتىك سايلاۋعا رەسەي مەن يراننىڭ ارالاسپاق بولعانى تۋرالى بايانداما جاريالاعان بولاتىن. وسىدان كەيىن بايدەن اكىمشىلىگى ەكى ەلگە سانكتسيا ەنگىزۋ ماسەلەسىن كوتەرگەن.

باياندامادا پۋتين دجو بايدەننىڭ بەدەلىن ءتۇسىرۋ تۋرالى بۇيرىقا بەرگەنى جازىلعان. سونىمەن قاتار، اۆتورلار: «2020 جىلى بىردە-ءبىر شەتەلدىك دەرجاۆا رەسەيدىڭ سياقتى سايلاۋعا اسەر ەتۋ ماقساتىندا كەڭ اۋقىمدى ناۋقان جۇرگىزۋگە تىرىسپادى. ال رەسەي دەموكراتيالىق پارتيانىڭ ەلەكتروندىق پوشتاسىنا حاكەرلىك شابۋىل جاساپ، الەۋمەتتىك جەلىلەردە فەيك حابار تاراتتى»، – دەيدى.

رەسەيدىڭ 2020 جىلى اقش-تاعى سايلاۋ كامپانياسىنا ارالاسقانى جايلى تۇجىرىمدار 16 ناۋرىزدا جارىق كورگەن اقش ۇلتتىق بارلاۋ قىزمەتى جاريالاعان 15 بەتتىك باياندامادا ايتىلادى. قۇجاتتا ترامپتىڭ وداقتاستارى ماسكەۋ مۇددەسىنە ساي ارەكەت ەتىپ، رەسەيشىل قىزمەتكەرلەردىڭ بايدەندى سىناۋىنا اتسالىسقانى جازىلعان. ازىرگە، رەسەي تاراپى بۇعان قاتىستى مالىمدەمە جاساعان جوق.

اقش بارلاۋ قىزمەتى رەسەيدەن بولەك، وزگە دە بىرقاتار ەلدەردىڭ سايلاۋ قورىتىندىسىنا ىقپال ەتپەك بولعانىن انىقتاعان. اتاپ ايتقاندا، يران ترامپ جاقتاستارىنىڭ سەنىمسىزدىگىن ارتتىرۋعا تىرىسقان. تەھران اقش-تى يرانمەن جاسالعان يادرولىق كەلىسىمنەن شىعارىپ، يرانعا جاڭا سانكتسيا سالعانى ءۇشىن ترامپتان ەسە قايتارماقشى بولعان.

"The Qazaq Times"