ءبىرىنشى – ماسكەۋ، سوسىن – استانا: جاپاروۆ قازاقستانعا ىسساپارمەن كەلەدى

قىرعىزستان پارلامەنتىنە سايلاۋ بيىل كۇزدە وتەدى. ال وسى اپتادا ەلدىڭ جاڭا پرەزيدەنتى سادىر جاپاروۆ قازاقستانعا رەسمي ىسساپارمەن كەلمەك.

ەل پرەزيدەنتى سادىر جاپاروۆ سۇحباتىندا: «جاقىندا جەرگىلىكتى سايلاۋ وتەدى. رەفەرەندۋم وتكىزۋ داتاسى بەلگىلەندى. سايلاۋ اشىق، ءارى ءادىل وتەدى. ال كۇزدە پارلامەنتتىك سايلاۋ وتەدى»، – دەدى.

سونىمەن قاتار، جاپاروۆ كورشىلەس مەملەكەتتەرگە ساپارى جونىندە دە پىكىر ءبىلدىردى. مالىمدەمەسىندە ول: «ءبىرىنشى ساپارىمنىڭ رەسەيگە بولعان سەبەبى – بىزدە تەز ارادا قول قويۋ ءۇشىن دايىن تۇرعان حاتتامالار، كەلىسىمدەر بار ەدى. ەندى 2-3 ناۋرىز قازاقستانعا مەملەكەتتىك ساپارمەن قوناققا بارايىن دەپ وتىرمىن. ودان كەيىن وزبەكستان مەملەكەتىنە ساپارىم جوسپارلانعان. كەيىن قىتاي مەملەكەتىنە، تۇركيا مەملەكەتىنە دە جوسپار بار. ءبىز بارلىق مەملەكەتپەن بايلانىسىمىزدى وتە جوعارى دەڭگەيگە جەتكىزۋ ءۇشىن ۇلكەن كۇش-ارەكەتىمىزدى جۇمساۋىمىز كەرەك. ساياساتىمىز سول»، – دەدى.

جاقىندا رەسەي قىرعىزستانعا س-300 زەنيتتىك-زىمىران كەشەندەرى مەن دروندارىن جەتكىزبەك. 24-25 اقپاندا رەسەيدە وتكەن كەزدەسۋ بارىسىندا قىرعىزستاننىڭ جاڭادان سايلانعان پرەزيدەنتى سادىر جاپاروۆ وسىنداي ۋاعدالاستىققا قول قويعان.

سەگىز جىل بۇرىن قىرعىزستان مەن رەسەي اراسىندا اسكەري-تەحنيكالىق سالاداعى ىنتىماقتاستىق تۋرالى ۇكىمەتارالىق كەلىسىمگە قول قويىلعان. كەلىسىم اياسىندا رەسەي قىرعىزستانعا 1 ميلليارد دوللارعا زاماناۋي قارۋ-جاراق پەن اسكەري تەحنيكا بەردى. ەكى مەملەكەت تە ۇجىمدىق قاۋىپسىزدىك تۋرالى شارت ۇيىمىنا مۇشە. قىرعىزستان اۋماعىندا رەسەيدىڭ بىرىككەن اسكەري بازاسى ورنالاسقان. ورتالىققا كانت قالاسىنداعى (شۋ وبلىسى) رەسەي فەدەراتسياسىنىڭ اۋە بازاسى كىرەدى.

قىرعىزستاندا قازىرگى دەپۋتاتتىق كورپۋستىڭ وكىلەتتىگى بىلتىر قازاندا اياقتالدى. وتكەن جىلدىڭ سوڭىندا ولار جاڭا پارلامەنتتىك سايلاۋدى «2021 جىلدىڭ 1 ماۋسىمىنان كەشىكتىرمەي» وتكىزۋدى كوزدەيتىن زاڭ قابىلدادى. بىلتىر 4 قازاندا قىرعىزستاندا وتكەن پارلامەنت سايلاۋىنىڭ قورىتىندىسىمەن كەلىسپەگەن جۇرت كوشەلەردە نارازىلىق وتكىزىپ، مۇنىڭ سوڭى مەملەكەتتىك عيماراتتاردى باسىپ الۋعا، ساياسي داعدارىسقا الىپ كەلگەن. حالىق نارازىلىعىنان سوڭ ۇكىمەت تە، پرەزيدەنت سوورونباي جەەنبەكوۆ تە وتستاۆكاعا كەتكەن.

ساياسي قارسىلاسىن ۇرلاپ اكەتكەنى ءۇشىن قاماۋدا وتىرعان سادىر جاپاروۆتى نارازىلىققا شىققان جۇرت 5 قازاندا تۇرمەدەن بوساتقان. كەيىن پارلامەنت مۇشەلەرى ونى پرەمەر-ءمينيستردىڭ مىندەتىن اتقارۋشى ەتىپ تاعايىندادى. جەەنبەكوۆ ورنىنان كەتكەن سوڭ ول پرەزيدەنت مىندەتىن دە قوسا اتقارۋعا كوشكەن. كەيىن ول پرەزيدەنت سايلاۋىنا ءتۇسۋ ءۇشىن ۋاقىتشا پرەزيدەنتتىكتەن باس تارتقان.

ەل باسقارۋ فورماسىن قازىرگى پارلامەنتتىك ۇلگىدەن پرەزيدەنتتىك ۇلگىگە كوشىرۋ ۇسىنىسىن دا سادىر جاپاروۆ ۇسىنعان.

"The Qazaq Times"