بىشكەكتە ىرىس جەكشەناليەۆ اتتى كوللەج ستۋدەنتى الەۋمەتتىك جەلىدەگى جەكە پاراقشاسىندا جەتىم-تاۋ  (جەتيم-توو) كەنىشىن قولدانۋعا قارسىلىق بىلدەرگەنى ءۇشىن قاماۋعا الىندى.

14 تامىز كۇنى 19 جاستاعى بلوگەردى ءىىم تەرگەۋ بولىمىندە 5 ساعاتتان استاپ ۋاقىت جاۋاپ الىپ ارتىنشا بىشكەك قالالىق پوليتسياسىنىڭ ۋاقىتتىق ۇستاپ اباقتىسىنا قاماعان.

قىرعىزدىڭ اقپارات كوزدەرىنىڭ حابارلاۋىنشا بلوگەر ءوزىنىڭ Facebook پاراقشاسىندا قىرعىز ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى باسشىسى ءابدىل سەگىزباەۆتىڭ ەكى جىلدىڭ الدىنداعى ەسكى ۇندەۋىن جاريالاعانى ءۇشىن قامالعان.

قىرعىز قۇقىق قورعاۋ ورگاندارى بۇل پوست تۋرالى «جاپپاي تارتىپسىزدىك» بابى بويىنشا ءىس قوزعاعان.

بۇعان بايلانىستى قىرعىز پوليتسياسى ءابدىل سەگىزباەۆتىڭ وزىنەن دە جاۋاپ العان.

سوڭعى كەزدەرى نارىنداعى جەتىم-تاۋ كەنىشىندەگى تەمىر رۋداسىن يگەرۋ بولماسا يگەرمەۋ تۋرالى قىزىۋ تالقىعا ۇلاسقان. بۇعان پرەزيدەنت جاپاروۆ تا ءوز پىكىرىن ءبىلدىرىپ قازىر بۇل كەنىشتىڭ پايدالانىلمايتىنىن، جەكەنىڭ قولىنا ءوتىپ كەتۋى مۇمكىن دەپ جالعان اقپارات تارقاتقانداردى قاتاڭ جازاعا تارتۋدى كۇشتىك قۇرلىمدارىنا مىندەتتەگەن.

سونداي-اق قىرعىز پرەزيدەنتى جەتىم تاۋدى يگەرۋ ويلارىندا جوقتىعىن. دەي تۇرعانمەن كەنىشتىڭ زاپاس قورىن انىقتاۋ ءۇشىن گەولوگيالىق جۇمىستار جۇرگىزىلىپ جاتقانىن ايتتى.

نارىن مەن ىستىقكول وبلىسىتارىنىڭ شەكاراسىنا ورنالاسقان جەتىم تاۋ كەنىشى 1956 جىلى اشىلعان. زاپاستاعى قورىندا 3-10 ملرد توننا ارالىعىندا تەمىر رۋداسى بار دەپ بولجانعان.

جاقتاستارى ىرىس جەكشەناليەۆتىڭ قاماۋىن ساياسي قۋدالاۋ دەپ سانايدى.

تۋرا وسى سەكىلدى جاعدايلار كەشەگى كەڭەستىڭ ەلدەردىڭ دەرلىگىنە ءتان. قازاقستان، بەلارۋس، تۇركىمەنستان، وزبەكستان سەكىلدى ەلدەردە ازاماتتىق قوعامنىڭ قالىپتاسۋىنا كۇش سالعان نەمەسە جۇيەگە قارسى شىققانداردى قۋدالاۋ ورتاق ءادىس تاسىلىنە اينالعان.

ن.بايتۇرسىن