نازارباەۆتار اۋلەتىنىڭ قۇداسى، بەلگىلى وليگارح قايرات بورانباەۆ پەن تاعى بىرقاتار كاسىپكەر يەلىك ەتەتىن، ۆاكتسينا وندىرىسىنە مۇمكىندىك العان قاراعاندى فارماتسەۆتيكالىق كەشەنى. فوتو: اشىق دەرەككوز

رەسەيلىك «سپۋتنيك V» كوروناۆيرۋس ۆاكتسيناسىنىڭ قازاقستانداعى وندىرىسىنە، قاراعاندى فارماتسەۆتيكالىق كەشەنىنە بيۋدجەتتەن 15 ملرد 175 ملن تەڭگە بولىنگەن.

بۇل تۋرالى رەداكتسيا ءتىلشىسىنىڭ قازاق تىلىندەگى سۇراعىنا ۆيتسە-مينيستر اجار عينياتقىزى كۇمىلجىپ، الىستان وراعىتتى. الايدا ازاتتىق ءجۋرناليسىنىڭ ورىسشا قويعان سۇراعىنا جاۋاپ بەرگەن دەنساۋلىق ساقتاۋ ءمينيسترى الەكسەي تسوي جوعارىداعى دەرەكتى كەلتىردى. ۇكىمەت مۇشەسى، ءمينيستردىڭ مەملەكەتتىك تىلگە جەتىك بولماۋى سەبەپتى وزەكتى سۇراقتار وسىلايگا جاۋاپسىز قالىپ قويادى، ال قازاقشا ۇعاتىن ورىنباسارلارى باستىق قاباعىنا قارايلاپ، يمەنشەكتەي بەرەدى.

10 اقپان سارسەنبى كۇنگى بريفينگتە مينيستر ۆاكتسينا باعاسى جايلى ءسوز ەتتى.

– العاشقى پارتياسى ەكى دوزاسىنا 26 دوللاردان كەلدى. رەسەي تىكە ينۆەستيتسيا قورىنان باعا ماسەلەسى قايتا قاراستىرىلۋى مۇمكىن ەكەندىگى تۋرالى حات كەلدى. اتالعان ءونىمنىڭ كوپتەپ شىعارىلۋىنا بايلانىستى باعاسى ارزانداۋى مۇمكىن. قازىرگى كەزدە باعاسى – 26 دوللار، – دەدى تسوي.

سوزىنە قاراعاندا، قاراعاندى فارماتسەۆتيكالىق كەشەنىنەن شىققان (ۆاكتسينا شيكىزاتىن رەسەي دايىن سۋبستانتسيا كۇيىندە جەتكىزەدى – QT) ەكپەنى مينيسترلىك قاراماعىنداعى بىرىڭعاي ديستريبيۋتور «سك-فارماتسيا» ءدال وسى باعادا ساتىپ الادى. بۇعان دەيىنگى ەكى بريفينگتە مينيسترلىك وكىلدەرى زاۋىتقا اۋدارىلاتىن قارجىنىڭ كولەمى جونىندەگى ساۋالعا جاۋاپ بەرمەگەن.

مينيستر الەكسەي تسويدىڭ «الەم سۇرانىسىنا» يە، «تەكسەرىلگەن» دەگەن ۆاكتسيناسىن اقپارات قۇرالدارى  ءالى كۇنگە دەيىن رەسمي تىركەۋدەن وتپەگەنىن جازعان. وزگە تاڭداۋ بولماعاندىقتان، تەحنولوگيالىق مۇمكىندىگىنەن ءارى بارلىق تالاپقا ساي كەلگەندىكتەن تاڭداپ الىندى دەلىنگەن قاراعاندى فارماتسەۆتيكالىق كەشەنىنە يەلىك ەتەتىن كاسىپكەرلەردىڭ ءبىرى بەلگىلى وليگارح قايرات بورانباەۆ. ول ازاتتىق تىلشىسىنە ەكس-پرەزيدەنت نازارباەۆ اۋلەتىمەن تۋىستىعىنىڭ بيزنەسىنە ەش اسەر ەتپەگەنىن ايتىپ حابارلاسقان.

تسويدىڭ  ايتۋىنشا، كەيبىر پارتيالارى رەسەيدىڭ وزىندە وندىرىلەتىن سپۋتنيك V ەكپەسىنە 18 ملرد تەڭگە قاراستىرىلعان. الايدا قاڭتار ايىنىڭ سوڭىندا ۆيتسە-مينيستر مارات شورانوۆ ۆاكتسيناتسيا ناۋقانىنا بولىنگەن 50 ملرد تەڭگە قارجىنىڭ 16,8 ميللياردى كورشى ەلدىڭ سپۋتنيك V, قالعان بولىگى وتاندىق QazCovidIn ەكپەلەرىنە جۇمسالۋ جوسپارلانعانىن مالىمدەگەن ەدى.

"The Qazaq Times"