كەيىنگى كەزدە سالىق ورگاندارىنىڭ «ساياسي استارلى قىسىمىنا» ۇشىرادىق دەگەن MediaNet حالىقارالىق جۋرناليستيكا ورتالىعىنا قاتىستى اكىمشىلىك ءىس توقتاتىلدى.

بۇل جونىندە ورتالىق ديرەكتورى ءادىل جاليلوۆ مالىمدەدى. ۇيىم سالىق قىزمەتى وكىلدەرىنىڭ زاڭسىز ارەكەتىنە بايلانىستى شاعىم بويىنشا سوتى جالعاستىرادى.

«ءبىز سانالى اقىلدىڭ ۇستەمدىك قۇرعانىنا ريزامىز. ءبىزدى جاۋاپقا تارتۋعا تىرىسقان بۇل زاڭ – ابسۋرد. بۇل  رەسەيدىڭ شەتەلدىك اگەنتتەر تۋرالى زاڭىنا ۇقسايدى، 1937 جىلعى رەپرەسسيانىڭ كولەڭكەسى. تاپ وسى  جاعدايدا مەملەكەتتىڭ كەرى قايتارعانىنا قۋانىشتىمىز، ەندى تاۋەلسىز ۇيىمدارعا قاتىستى بارلىق ىستەر توقتاۋى كەرەك. سونىمەن قوسا، سالىق ورگاندارىنىڭ ارەكەتسىزدىگى تۋرالى شاعىم بويىنشا سوتقا جۇگىنۋدى جالعاستىرامىز. ەڭ بولماعاندا، زاڭنىڭ ساقتالۋى ءۇشىن سوڭىنا دەيىن بارۋىمىز ءتيىس»، – دەيدى جاليلوۆ Vlast.kz رەداكتسياسىنا بەرگەن پىكىرىندە.

ول ءسوز اراسىندا سالىق ورگاندارىنا «جوعارىدان» تاپسىرما بەرىلگەنىن ايتاپ ءوتتى :

«شىنداپ كەلگەندە، سالىق ورگاندارىن تۇسىنەمىن. ويتكەنى جوعارىدان وسىنداي پارمەن بەرىلگەن. ولار تاققان ايىپتىڭ سونشالىق ابسۋرد ەكەنىن، كوپتەگەن زاڭ بۇزۋشىلىقتارعا بارعانىن وزدەرى تۇسىنەتىنى انىق ءبىلىنىپ تۇر. مەنىڭشە، سالىق ورگاندارى «ابسۋرد اكىمشىلىك ءىستىڭ» اۋىرتپالىعىنان قۇتىلعانىنا قۋانعان دا بولار. «سۋىق اقىل» جەڭەر دەپ ۇمىتتەنەمىن. ءبىزدى قولداعان بارلىق جۋرناليستەر مەن حالىقارالىق ۇيىمدارعا زور العىس بىلدىرەمىز»، – دەپ تۇيىندەدى.

وسىمەن قاتار، MediaNet ورتالىعى مەن وعان قاراستى Factcheck.kz سايتى ارنايى مالىمدەمە تاراتتى:

«بۇگىن MediaNet حالىقارالىق جۋرناليستيكا ورتالىعىنا قاتىستى قوزعالعان اكىمشىلىك ءىس جۇرگىزۋ توقتاعانىن قۋانىشپەن حابارلايمىز! وزدەرىڭىز بىلەتىندەي و باستا زاڭ مەن ادىلدىكتىڭ ءبىز جاقتا ەكەنىنە سەنىمدى بولدىق. MediaNet – بارلىق زاڭداردى ساقتايتىن ۇيىم. ءبىز ءوزىمىزدىڭ تاۋەلسىزدىگىمىز بەن دەموكراتيالىق قۇندىلىقتارىمىزعا ادالمىز جانە ادال بولىپ قالا بەرەمىز. ءبىزدى قولداپ، قولتىعىمىزدان دەمەگەن بارشاڭىزعا العىسىمىز شەكسىز!»

قاڭتار ايىنىڭ سوڭىندا ادام قۇقىقتارىن قورعاۋمەن جانە ازاماتتىق ىسپەن اينالىساتىن جەتى بىردەي قوعامدىق ۇيىم سالىق قىزمەتىنىڭ تاراپىنان قىسىم جاسالعانىن جاريالاعان. سايلاۋ قارساڭى مەن جىل باسىندا ۇيىمدارعا كەيىنگى بىرنەشە جىلداعى سالىق ەسەبىنىڭ 17 جانە 18 فورمالارىن تولتىرۋ كەزىندە بۇزۋشىلىقتار بولعانى جايلى حابارلاما جىبەرىلگەن. سالدارىنان ۇكىمەتتىك ەمەس ۇيىمدارعا، سونىڭ قاتارىندا «ەحو» مەن «حالىقارالىق قۇقىقتىق باستاما» ۇيىمىنىڭ ارقايسىنا 400 اەك (1 166 800 تەڭگە) كولەمىندە ايىپپۇل سالىنىپ، ءۇش ايعا قىزمەتى توقتاتىلعان. تاعى ءبىرى قازاقستانداعى ادام قۇقىعى جانە زاڭدىلىقتى ساقتاۋ حالىقارالىق بيۋروسىنا 800 اەك (2 333 600 تەڭگە) مولشەرىندە ايىپپۇل كەسىلىپ، قىزمەتى 3 ايعا توقتادى. سايلاۋ بارىسىن باقىلايتىن «ەركىندىك قاناتى» ۇيىمىنا 100 اەك (277 800 تەڭگە) شاماسىندا ايىپپۇل سالىنعان. وسىلايشا ءتورت قانا بەيۇكىمەتتىك ۇيىمعا كەسىلگەن ايىپپۇل كولەمى 5 ميلليون تەڭگەگە جۋىقتاعان.

«بيلىكتىڭ تىقىرى تاياعانىن» دابىل قاعا ەسكەرتكەن MediaNet حالىقارالىق جۋرناليستيكا ورتالىعى مەن ورتالىق ازياداعى فاكتىلەردى تەكسەرۋ بويىنشا العاشقى رەسۋرس Factcheck.kz سايتىنا دا 5,5 ميلليون تەڭگە ايىپپۇل سالۋ جانە بىرنەشە ايعا جۇمىسىن شەكتەۋ قاۋپى تونگەن. قوعامدىق ۇيىمداردىڭ قىسىمعا سايلاۋ قارساڭىندا ۇشىراعانىن ايتقان اقپارات قۇرالى مۇنى «ساياسي قىسىم» دەپ باعالاعان.

"The Qazaq Times"