«رەسەي بيلىگىنىڭ ەركىندىككە جاساعان اۋىر سوققىسى»: كرەمل سىنشىسى ناۆالنىي سوتتالدى

ماسكەۋدىڭ سيمونوۆسكي اۋداندىق سوتى الەكسەي ناۆالنىيدىڭ «يۆ روشە» ءىسءى بويىنشا العان شارتتى جازاسىن تۇرمە جازاسىنا الماستىردى. تەرگەۋ يزولياتورى مەن ۇيقاماقتاعى مەرزىمىن ەسەپتەگەندە وپپوزيتسيونەر كولونيادا 2 جىل 8 اي وتىرادى.

سوتقا ەۋروپانىڭ 20 شاقتى مەملەكەتىنىڭ ديپلوماتتارى قاتىستى. كەشە تاڭەرتەڭنەن باستاپ كوشەلەر جابىلىپ، ناۆالنىيدى قولداۋعا كەلگەن 350 جاقتاسى ۇستالدى.

ۇكىم شىققاننان كەيىن باتىس ەلدەرى رەسەي بيلىگىنىڭ بۇل ارەكەتىن «ەركىندىك قۇقىعى مەن زاڭ ۇستەمدىگىنە جاسالعان اۋىر سوققى» دەپ سىنعا الىپ، ناۆالنىيدى بوستاۋدى تالاپ ەتتى.

اقش مەملەكەتتىك حاتشىسى ەنتوني بلينكەن ءوزىنىڭ Twitter-دەگى پاراقشاسىندا: «اقش رەسەيدىڭ الەكسەي ناۆالنىيعا قاتىستى ارەكەتىنە قاتتى الاڭداۋلى. ءبىز تاعى دا ونى دەرەۋ شارتسىز بوساتۋعا شاقىرامىز، سونىمەن بىرگە ءوز قۇقىقتارىن جۇزەگە اسىرعانى ءۇشىن زاڭسىز ۇستالعانداردىڭ بارلىعى دا بوساتىلۋى ءتيىس»، – دەپ جازدى.

بۇعان دەيىن بىرقاتار حالىقارالىق ۇيىمدار مەن اقش كرەملدىڭ ناۆلالنىيعا قارسى ارەكەتىن قاتاڭ سىنعا العان. Amnesty International ۇيىمى مەن ەۋروكەڭەس وكىلدەرى دە رەسەي بيلىگىن قاتاڭ ايىپتاپ وتىر. «الەكسەي ناۆالنىي ساياسي بەلسەندىلىككە دەگەن قۇقىعىنان جانە ءسوز ەركىندىگى قۇقىعىنان ايىرىلدى. Amnesty International ونى ار-ۇجدان تۇتقىنى دەپ قاراستىرادى جانە ونى ەشقانداي شارتسىز دەرەۋ بوساتۋدى تالاپ ەتەدى» دەلىنگەن ۇيىمنىڭ ءباسپاسوز حابارلاماسىندا.

2014 جىلى الەكسەي ناۆالنىي مەن ونىڭ اعاسى ولەگ «يۆ روشە» ىسىندە الاياقتىق پەن قارجى جىمقىرۋ ءۇشىن كىنالى دەپ تانىلدى. ولەگ ناۆالنىي ءۇش جارىم جىلعا جالپى رەجيمدەگى كولونياعا، الەكسەي ءۇش جارىم جىلعا شارتتى تۇردە سوتتالدى. ونىڭ سىناق مەرزىمى بىلتىر 30 جەلتوقساندا اياقتالدى.

بيىل 20 تامىزدا تومسك قالاسىنان ماسكەۋگە بەت العان وپپوزيتسيونەر ساياساتكەر الەكسەي ناۆالنىي بورتتا جاعدايى ناشارلاپ، ۇشاق دەرەۋ ومبى قالاسىنا قونۋعا تۋرا كەلگەن. كەيىن جەدەل جاردەممەن وپپوزيتسيونەردى ومبىداعى اۋرۋحاناعا جەتكىزگەن. كەيىن گەرمانيا ناۆالنىيدى بەرليندەگى اۋرۋحاناعا اكەتۋ ءۇشىن ارنايى ساناۆياتسيا جىبەرگەن. باسىندا ومبى دارىگەرلەرى ناۆالنىيدى ورنىنان قوزعاۋعا بولمايدى دەپ ونى گەرمانياعا جىبەرۋدەن باس تارتقان. كەيىن ومبىلىق دارىلەرلەر ناۆالنىيدى اۋرۋحانادان اكەتۋگە رۇقسات بەرىپ، ناۆالنىي 22 تامىزدا بەرلينگە جەتكىزىلگەن.

17 قاڭتاردا ناۆالنىي بەرليننەن ورالعاننان كەيىن بىردەن شەرەمەتەۆو اۋەجايىندا ۇستالدى. ونى حيمكي پوليتسيا بولىمىنە الىپ كەتتى جانە كەلەسى كۇنى سوت وتىرىسى ءوتتى. سوت وپپوزيتسيونەردىڭ قامالۋ مەرزىمىن 30 كۇنگە ۇزارتىپ، «ماتروسسكايا تيشينا» تەرگەۋ يزولياتورىنا جىبەردى.

23 جانە 31 قاڭتاردا رەسەيدىڭ كوپتەگەن قالالارىندا ناۆالنىيدى قولداۋ ماقساتىندا نارازىلىق اكتسيالارى ءوتتى. «ءىىو-ينفو» ەسەبى بويىنشا ءبىرىنشى اكتسيادا 4 مىڭنان استام، ال ەكىنشى اكتسيادا 5,5 مىڭنان استام ادام ۇستالعان. پوليتسيا نارازىلاردى كۇشپەن تاراتىپ، سوققىعا جىقتى.

"The Qazaq Times"