فوتو: static.mk

قىتايدا كوروناۆيرۋستىڭ شىعۋ تەگىن زەرتتەۋگە بارعان دۇنيەجۇزىلىك دەنساۋلىق ساقتاۋ ۇيىمىنىڭ ماماندارى وتكەن ايدا 2 اپتاعا كارانتينگە جابىلدى. 28 قاڭتاردا عانا كارانتيننەن شىققان ماماندار ۋحانعا، كەيىننەن وسى قالاداعى تەڭىز ونىمدەرى بازارىنا باردى. ولاردىڭ ماقساتى – كوروناۆيرۋستىڭ شىعۋ سەبەبىن انىقتاۋ. الايدا، زەرتتەۋشىلەردىڭ ءار قادامىن قىتاي بيلىگى قاتاڭ باقىلاپ وتىر.

بەيجىڭ 2,1 ميلليون ادامنىڭ ءومىرىن قيعان ۆيرۋستىڭ پايدا بولۋىن زەرتتەگىسى كەلگەن حالىقارالىق توپتىڭ ۇسىنىسىن نارازى كۇيدە قابىلداعان. حالىقارالىق عالىمدار توبىنا قويعان تالاپتارى ءۇشىن جانە ءتۇرلى بولجامدى العا تارتىپ، ايىپتان جالتارۋعا تىرىسقانى ءۇشىن دە قىتاي سىنعا ۇشىرادى.

ۋحان ۆيرۋسولوگيا ينستيتۋتى 2003 جىلى قىتايدان كوپتەگەن ەلدەرگە تارالعان SARS پاندەمياسىنان بەرى جارقاناتتار كوروناۆيرۋستارىنىڭ گەنەتيكالىق ۇلگىلەرىنىڭ كەڭ مۇراعاتىن ساقتاپ وتىر. ددسۇ توبىنىڭ مۇشەلەرى وسى زەرتحانالىق جۋرنالدارمەن، مالىمەتتەرمەن تانىسۋدان، كىشى جانە اعا زەرتتەۋشىلەرمەن كەزدەسۋدەن، سونداي-اق سىنامالاردى جيناۋ، ساقتاۋ، تالداۋ تۋرالى قاۋىپسىزدىك حاتتامالارىن زەرتەمەك.

وسى اپتادا ۇيىم ماماندارى ۋحانداعى «كوروناۆيرۋس تاراعان» بازارعا باردى. بىراق، ساراپشىلار قىتاي ۇكىمەتى حۋانان بازارىن دا تولىقتاي سانيتارلىق تازالاۋدان وتكىزگەنىن ەسكەرسەك، مۇندا كورنوناۆيرۋستىڭ قالاي تارالعانى تۋرالى اقپارات جيناۋ قيىنعا سوعۋى مۇمكىن دەيدى.

ءۋحانىڭ جاڭا بولىگىندە ورنالاسقان حۋانان تەڭىز ونىمدەرى بازارىندا ءتىرى قۇستاردان باستاپ بالىق، باۋىرىمەن جورعالاۋشىلار، تىپتەن جابايى اڭدارعا دەيىن ساتىلعان. بىراق 2019 جىلى جەلتوقساننىڭ سوڭعى اپتالارىندا ۆيرۋستىڭ ءورشۋى تۋرالى ەسكەرتۋلەر كۇشەيگەن كەزدە دارىگەرلەر الدىمەن جاڭا زاڭدىلىققا نازار اۋداردى – پاتسيەنتتەردىڭ كوپشىلىگى حۋانانداعى تەڭىز ونىمدەرى بازارىندا جۇمىس ىستەگەن. 31 جەلتوقساندا ۋحان دەنساۋلىق ساقتاۋ كوميسسياسى بەيجىڭگە العاشقى رەسمي ەسەپتى ۇسىندى. كەلەسى كۇنى بازار كارانتينگە جابىلدى.

بازارداعى ادامداردان دا، ءتىرى جانۋارلاردان دا الىنعان COVID-19 سىنامالارى وڭ ناتيجە بەرگەنىن ەسكەرۋىمىز كەرەك. الايدا ۋحانداعى مەديتسينا ماماندارىنىڭ ايتۋىنشا، ادامدار اراسىندا كوروناۆيرۋستىڭ ەڭ ءبىرىنشى جاعدايى ىندەت تولىق تاراماي تۇرىپ ءتورت اپتا بۇرىن انىقتالعان. قىتاي ۇكىمەتى رەسمي مالىمەت رەتىندە ۇسىنعان العاشقى دەرەك 1 جەلتوقساندا تىركەلگەن.

"The Qazaq Times"