دەموكراتتار ۇسىنىسى سەناتتا قولداۋ تاپپادى: ترامپ رەسمي كەزدەسۋ وتكىزدى

سەناتتاعى رەسپۋبليكاشىلداردىڭ باسىم بولىگى اقش-تىڭ بۇرىنعى پرەزيدەنتى دونالد ترامپقا يمپيچمەنت جاريالاۋعا قارسى شىعىپ، دەموكراتتار ۇسىنىسىنىڭ قولداۋ تاپپايتىنىن كورسەتتى. كەيىننەن ترامپ كونگرەستەگى وكىلدەر پالاتاسىنداعى رەسپۋبليكالىق پارتيا ليدەرى كەۆين ماككارتيمەن كەزدەسۋ وتكىزدى.

قاراشادا ترامپ قۇرعان «Save America» ساياسي جاعدايلار كوميتەتى (Political Action Committee) كەزدەسۋ بارىسىندا رەسپۋبليكالىقتاردىڭ ۇستەمدىگىن ارتتىرۋ تاقىرىبى ءسوز بولدى دەيدى. رەسپۋبليكالىق پارتيا كوشباسشىسى ماككارتيدىڭ باستاماسىمەن وتكەن كەزدەسۋ كەلەر جىلى وتەتىن كونگرەسارالىق سايلاۋدا تومەنگى پالاتاداعى رەسپۋبليكالىق پارتيانىڭ وكىلدەرىن تارتۋ ماسەلەسىنە ارنالعان.

ەكس-پرەزيدەنت ءوزىنىڭ پارتيا مۇشەلەرىنە قولداۋ كورسەتۋگە دايىن ەكەنىن ايتتى. 3 قاراشادا اقش-تا وتكەن جالپى سايلاۋدىڭ ناتيجەلەرى بويىنشا دەموكراتتار كونگرەسس سەناتىندا كوپشىلىك داۋىس الدى، سونىمەن قاتار وكىلدەر پالاتاسىنداعى باقىلاۋدى ساقتاپ قالدى.

ماككارتي بۇعان دەيىن ترامپتىڭ يمپيچمەنتىنە قارسى شىعىپ، بۇل پروتسەستى قاتە دەپ اتاعان بولاتىن. ونىڭ ايتۋىنشا، مۇنداي قادام اقش قوعامىن ەكىگە بولەدى.

سەيسەنبىدە اقش سەناتىندا دونالد ترامپقا يمپيچمەنت جاريالاۋ بويىنشا سوت پروتسەسىن جالعاستىرۋ ماسەلەسى داۋىسقا سالىندى. سەناتورلاردىڭ باسىم بولىگى (55-ءى قولداپ، 45-ءى قارسى داۋىس بەرگەن) پروتسەستى باستاۋدى قولداسا دا، رەسپۋبليكاشىلداردىڭ كوبى بۇرىنعى پرەزيدەنت دونالد ترامپقا يمپيچمەنت جاريالاۋعا قارسى بولعان. داۋىس بەرۋ ناتيجەسى ترامپتى «تارتىپسىزدىككە يتەرمەلەدى» دەپ ايىپتاعان دەموكراتتاردىڭ ۇسىنىسى سەناتتا قولداۋ تاپپايتىنىن كورسەتتى.

ترامپقا يمپيچمەنت جاريالاۋ تۋرالى قاراردى وكىلدەر پالاتاسى 13 قاڭتاردا قابىلدادى. ال 25 قاڭتاردا كونگرەسسمەندەر قۇجاتتى سەناتقا تاپسىردى. ايىپتاۋدىڭ ءبىر بابى – نارازىلىق شەرۋلەرىن ۇيىمداستىرىپ، بۇلىككە يتەرمەلەۋ. يمپيچمەنت ءراسىمى ترامپتىڭ 6 قاڭتاردا جاساعان مالىمدەمەلەرىنە بايلانىستى باستالدى. سول كۇنى ۆاشينگتوندا ونى قولداۋ ءۇشىن مىڭداعان دەمونسترانتتار كونگرەسكە كىرىپ، پرەزيدەنت سايلاۋىنىڭ ناتيجەلەرىن جاريالاۋعا جول بەرمەۋگە تىرىستى.

"The Qazaq Times"