شىڭجاڭداعى گەنوتسيد: Twitter اقش-تاعى قىتاي ەلشىلىگىنىڭ رەسمي اككاۋنتىن بۇعاتتادى

بەيجىڭ شىڭجاڭ ماسەلەسى جونىندەگى ساياساتىن تۇسىندىرەتىن حابارلاما جاريالانعاننان كەيىن Twitter قىتايدىڭ اقش-تاعى ەلشىلىگىنىڭ رەسم اككاۋنتىن بۇعاتتادى. بۇل تۋرالى Bloomberg حابارلادى.

حابارلاما 7 قاڭتاردا جاريالانعان. Twitter كومانياسى رەسمي مالىمدەمەسىندە: «ءبىز بۇل تۆيت بويىنشا ادامگەرشىلىككە قاتىستى ساياساتىمىزدى بۇزعانى ءۇشىن ءتيىستى شارالار قابىلدادىق»، – دەدى. ەندى ەلشىلىكتىڭ رەسمي اككاۋنتى بۇعاتتا بولادى.

سەيسەنبىدە دونالد ترامپ اكىمشىلىگىندە اقش مەملەكەتتىك حاتشىسى قىزمەتىن اتقارعان مايك پومپەو قىتايدىڭ شىڭجاڭ ساياساتىن «گەنوتسيد جانە ادامزاتقا قارسى قىلمىس» دەپ دەپ اتادى. اقش مەملەكەتتىك حاتشىسى لاۋازىمىنا ۇمىتكەر ەنتوني بلينكەن بۇل باعالاۋمەن كەلىسەتىنىن ايتتى.

پومپەو مالىمدەمەسىندە: «گەنوتسيد ءالى دە بار. ءبىز قىتاي كوممۋنيستىك پارتياسىنىڭ تىكەلەي باقىلاۋىمەن ۇيعىرلاردى جويۋ ءۇشىن جۇيەلى تۇردە تالپىنىس جاسالىپ جاتقانىنىڭ كۋاسى بولىپ وتىرمىز»، – دەدى.

بەيجىڭ بيلىگىنىڭ شىڭجاڭداعى ارەكەتتەرىن گەنوتسيد دەپ تانۋ – ترامپ ۇكىمەتىنىڭ بيلىكتەن كەتەر الدىندا قىتايعا قارسى سوڭعى شاراسى. شىڭجاڭداعى از ساندى ۇلتتارعا جاسالعان قىسىمدار مەن بەيجىڭنىڭ ادام قۇقىقتارىن اۋىر دارەجەدە بۇزۋ ارەكەتتەرى كوپتەگەن ەلدەردە تالقىلانىپ كەلدى.

ال قحر ءسىم وكىلى حۋا چۋنين پومپەونى سىنعا الىپ، «الەمگە كۇلكى بولدى» دەدى. ءسويتىپ قىتاي ءسىم ترامپ اكىمشىلىگىندە قىزمەت ەتكەن 28 اقش ازاماتىنا سانكتسيالار ەنگىزەتىنىن ايتتى. ولاردىڭ قاتارنىدا اق ءۇي جانىنداعى ۇلتتىق ساۋدا كەڭەسىنىڭ باسشىسى پيتەر ناۆاررو، پرەزيدەنتتىڭ ۇلتتىق قاۋىپسىزدىك جونىندەگى كومەكشىسى روبەرت و ' برايەن، اقش-تىڭ بۇۇ جانىنداعى تۇراقتى وكىلى كەللي كرافت، اقش دەنساۋلىق ساقتاۋ مينيسترلىگىنىڭ بۇرىنعى باسشىسى الەكس ازار جانە ترامپتىڭ ۇلتتىق قاۋىپسىزدىك جونىندەگى بۇرىنعى كەڭەسشىسى دجون بولتون بار.

2018 جىلدىڭ تامىزىندا بۇۇ ادام قۇقىقتارى جونىندەگى جوعارعى كوميسسار باسقارماسىنىڭ وكىلدەرى شىڭجاڭداعى تۇزەتۋ لاگەرلەرىندە 1 ملن-عا جۋىق مۇسىلمانجاردىڭ زاڭسىز ۇستالعانىن جانە ادام قۇقىقتارىنىڭ تاپتالعانىن مالىمدەدى. باسقارما بۇل جاعدايعا الاڭداۋشىلىق ءبىلدىرىپ، وسى ايماققا باقىلاۋشىلار جىبەرۋدى ۇسىندى.

قىتاي بيلىگى شىڭجاڭدا پەنيتەنتسيارلىق مەكەمەلەردىڭ اۋقىمدى جەلىسىن قۇرۋ تۋرالى اقپاراتتى بىرنەشە رەت جوققا شىعاردى. سونىمەن قاتار، 2018 جىلدىڭ سوڭىندا ولار وڭىردە ءبىلىم بەرۋ جانە كاسىپتىك دايارلاۋ ورتالىقتارى جۇمىس ىستەيتىنىن حابارلاعان. قىتاي شەنەۋنىكتەرىنىڭ مالىمدەۋىنشە، وندا تەرروريزم مەن ەكسترەميزم يدەيالارىنىڭ ىقپالىنا تۇسكەن، قىتاي ءتىلىن، جازۋ نەگىزدەرىن، كوممۋنيكاتيۆتىك داعدىلاردى جانە قحر زاڭناماسىنىڭ نەگىزدەرىن وقيتىن ادامدار بار. بۇل ورتالىقتارداعى ادامداردىڭ ناقتى سانىن قىتاي بيلىگى جاسىرىن ۇستاپ وتىر.

"The Qazaq Times"