Körneki suret. Foto: twimg.com

Beyjiñ Şıñjañ mäselesi jönindegi sayasatın tüsindiretin habarlama jariyalanğannan keyin Twitter Qıtaydıñ AQŞ-tağı Elşiliginiñ resm akkauntın bwğattadı. Bwl turalı Bloomberg habarladı.

Habarlama 7 qañtarda jariyalanğan. Twitter komaniyası resmi mälimdemesinde: «Biz bwl tvit boyınşa adamgerşilikke qatıstı sayasatımızdı bwzğanı üşin tiisti şaralar qabıldadıq», – dedi. Endi elşiliktiñ resmi akkauntı bwğatta boladı.

Seysenbide Donal'd Tramp äkimşiliginde AQŞ Memlekettik hatşısı qızmetin atqarğan Mayk Pompeo Qıtaydıñ Şıñjañ sayasatın «genocid jäne adamzatqa qarsı qılmıs» dep dep atadı. AQŞ Memlekettik hatşısı lauazımına ümitker Entoni Blinken bwl bağalaumen kelisetinin ayttı.

Pompeo mälimdemesinde: «Genocid äli de bar. Biz Qıtay kommunistik partiyasınıñ tikeley baqılauımen wyğırlardı joyu üşin jüyeli türde talpınıs jasalıp jatqanınıñ kuäsi bolıp otırmız», – dedi.

Beyjiñ biliginiñ Şıñjañdağı äreketterin genocid dep tanu – Tramp ükimetiniñ bilikten keter aldında Qıtayğa qarsı soñğı şarası. Şıñjañdağı az sandı wlttarğa jasalğan qısımdar men Beyjiñniñ adam qwqıqtarın auır därejede bwzu äreketteri köptegen elderde talqılanıp keldi.

Al QHR SİM ökili Hua Çun'in Pompeonı sınğa alıp, «älemge külki boldı» dedi. Söytip Qıtay SİM Tramp äkimşiliginde qızmet etken 28 AQŞ azamatına sankciyalar engizetinin ayttı. Olardıñ qatarnıda Aq üy janındağı Wlttıq sauda keñesiniñ basşısı Piter Navarro, prezidenttiñ wlttıq qauipsizdik jönindegi kömekşisi Robert O ' Brayen, AQŞ-tıñ BWW janındağı Twraqtı ökili Kelli Kraft, AQŞ Densaulıq saqtau ministrliginiñ bwrınğı basşısı Aleks Azar jäne Tramptıñ wlttıq qauipsizdik jönindegi bwrınğı keñesşisi Djon Bolton bar.

2018 jıldıñ tamızında BWW Adam qwqıqtarı jönindegi Joğarğı Komissar basqarmasınıñ ökilderi Şıñjañdağı tüzetu lagerlerinde 1 mln-ğa juıq mwsılmanjardıñ zañsız wstalğanın jäne adam qwqıqtarınıñ taptalğanın mälimdedi. Basqarma bwl jağdayğa alañdauşılıq bildirip, osı aymaqqa baqılauşılar jiberudi wsındı.

Qıtay biligi Şıñjañda penitenciarlıq mekemelerdiñ auqımdı jelisin qwru turalı aqparattı birneşe ret joqqa şığardı. Sonımen qatar, 2018 jıldıñ soñında olar öñirde bilim beru jäne käsiptik dayarlau ortalıqtarı jwmıs isteytinin habarlağan. Qıtay şeneunikteriniñ mälimdeuinşe, onda terrorizm men ekstremizm ideyalarınıñ ıqpalına tüsken, qıtay tilin, jazu negizderin, kommunikativtik dağdılardı jäne QHR zañnamasınıñ negizderin oqitın adamdar bar. Bwl ortalıqtardağı adamdardıñ naqtı sanın Qıtay biligi jasırın wstap otır.

"The Qazaq Times"