قازاقستان قارۋلى كۇشتەرى شابۋىلعا قارسى دايارلىقتان وتۋدە

قازاقستان قارۋلى كۇشتەرىنىڭ اسكەرلەرىندە قىسقى وقىتۋ كەزەڭىنىڭ قورىتىندىسى بويىنشا باقىلاۋ تەكسەرىس جالعاسۋدا. بۇگىنگى تاڭدا ەكىنشى كەزەڭ باستالدى. ونىڭ شەڭبەرىندە اقك اۋە شابۋىلىنا قارسى قورعانىس اسكەرلەرى، سونداي-اق، قر قك قۇرلىق اسكەرلەرى جاۋىنگەرلىك جانە ماتەريالدىق-تەحنيكالىق قامتاماسىز ەتۋدىڭ قۇرامالارى مەن اسكەري بولىمدەرى تەكسەرىلۋگە جاتادى. بۇل تۋرالى قازاقستان قارۋلى كۇشتەرىنىڭ رەسمي سايتىندا جاريالاندى.

قر قورعانىس ءمينيسترى گەنەرال-پولكوۆنيك ساكەن جاسۇزاقوۆتىڭ تاپسىرماسى بويىنشا ەلىمىزدىڭ بارلىق وڭىرلەرىندە جۇمىس جاسايتىن كەشەندى كوميسسيا قۇرىلدى. ەكىنشى كەزەڭدەگى جالپى باسشىلىققا الۋ مەن باقىلاۋ قر قك باس شتابى باستىعىنىڭ ورىنباسارلارىمەن جۇزەگە اسىرىلادى.

وڭتۇستىك باعىتتاعى تەكسەرىس باس شتابى باستىعىنىڭ ءبىرىنشى ورىنباسارى گەنەرال-مايور ءامىر حاليكوۆتىڭ، شىعىس باعىتىندا باس شتابى باستىعىنىڭ ورىنباسارى گەنەرال-مايور مۇحامەدجان تالاسوۆتىڭ جالپى باسشىلىق ەتۋى جانە باقىلاۋىمەن وتەدى. وڭتۇستىك-شىعىس باعىتىندا تەكسەرىس بارىسىن باسشىلىققا الۋ مەن باقىلاۋدى باس شتابى باستىعىنىڭ ورىنباسارى اۆياتسيا گەنەرال-مايورى نۇرلان كاربەنوۆ، باتىستا باس شتابى باستىعىنىڭ ورىنباسارى گەنەرال-مايور ادىلبەك الدابەرگەنوۆ، ورتالىق باعىتتا قر قك بش ستراتەگيالىق جوسپارلاۋ دەپارتامەنتىنىڭ باستىعى گەنەرال-مايور رۋسلان شپەكباەۆ جۇزەگە اسىرادى.

قازاقستان قارۋلى كۇشتەرىنىڭ اسكەرلەرىندە باقىلاۋ تەكسەرىس باستالدى. فوتو: mod.gov.kz

اسكەري قىزمەتشىلەر جاۋىنگەرلىك دايارلىقتىڭ نەگىزگى پاندەرى بويىنشا وزدەرىنىڭ شەبەرلىكتەرى مەن ماشىقتارىن دالەلدەۋى ءتيىس. بۇل تاكتيكالىق، ارنايى، اتىس، دەنە، ساپتىق جانە مەملەكەتتىك-قۇقىقتىق دايىندىق، جالپىاسكەري جارعىلار، سونداي-اق، اسكەري توپوگرافيا. ساباقتار كورسەتىلگەن اۋدانعا جىلجۋ، باتالوننىڭ (روتانىڭ) كوماندالىق-باقىلاۋ پۋنكتىن ورىستەتۋ، جاۋىنگەرلىك تاپسىرمالاردى قويۋ، كىرىسپە جانە جاۋىنگەرلىك وق اتۋلاردى وتكىزۋ بويىنشا قويىلعان تاپسىرمالاردى ورىنداۋ بارىسىندا بولىمشەلەردى باسقارۋ ماسەلەلەرىن پىسىقتاي وتىرىپ، كۇندىزگى جانە تۇنگى ۋاقىتتا وتكىزىلەدى.

باقىلاۋ تەكسەرىسى جەكە قۇرامنىڭ داعدىسىن، جاۋىنگەرلىك دايىندىقتىڭ شىنايى دەڭگەيى مەن ۆزۆودتاردىڭ، روتالاردىڭ، قۇرامالار مەن بولىمدەر باتالوندارى باسقارمالارىنىڭ ۇيلەسىمدىلىك دەڭگەيىن، بولىمشەلەردىڭ قىسقا مەرزىمدە قويىلعان جاۋىنگەرلىك تاپسىرمالاردى ورىنداۋ ازىرلىگىن ايقىنداۋعا، سونداي-اق، جاۋىنگەرلىك دايارلىق جوسپارلارى مەن باعدارلامالارىنىڭ ورىندالۋىن باعالاۋعا كوزدەلگەن.

ودان باسقا، كوميسسيا قارۋ-جاراق پەن اسكەري تەحنيكانىڭ جاي-كۇيىن، باعىنىستى قۇرامالاردا جاۋىنگەرلىك دايارلىقتى باسشىلىققا الۋ بويىنشا لاۋازىمدى ادامداردىڭ جۇمىسىن ۇيىمداستىرۋ جۇيەسىن، جاۋىنگەرلىك جانە جۇمىلدىرۋ ازىرلىكتى تەكسەرەتىن بولادى.

“The Qazaq Times”