گەرمانيادا لوكداۋن مەرزىمى ۇزارتىلدى

گەرمانياداعى گارميش-پارتەنكيرحەن قالاسىنداعى اۋرۋحانادا جاتقان 35 پاتسيەنتتەن كوروناۆيرۋستىڭ «بريتاندىق» ءتۇرى انىقتالدى. وسىعان بايلانىستى ەلدەگى لوكداۋن مەرزىمى اقپانعا دەيىن ۇزارتىلدى.

گەرمانيا كانتسلەرى انگەلا مەركەل مالىمدەمەسىندە: «ءبىز فەدەرالدى ايماق باسشىلارىمەن بۇرىن جوسپارلانعانداي 25 قاڭتاردا ەمەس، ەرتەرەك كەزدەسۋگە شەشىم قابىلدادىق. ناۋقاستار قاتارىن قىسقارتۋ ءۇشىن قوسىمشا شەكتەۋلەر ەنگىزۋگە كەلىستىك. جۇقتىرۋشىلار سانى ازايسا، مۋتاتسيالانعان ۆيرۋستىڭ تارالۋ قارقىنى تەجەلەدى. قاتاڭ شارالاردى ءبىرىنشى كەزەكتە، ازاماتتارىمىزدىڭ دەنساۋلىعى ءۇشىن، سونداي-اق ارينە، ەل ەكونوميكاسىن تۇراقتاندىرۋ ءۇشىن ەنگىزىپ وتىرمىز»، – دەيدى.

ۆيرۋستىڭ جاڭا شتامى ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. جاڭا شتامم الدىڭعى كوروناۆيرۋسقا قاراعاندا ادامدارعا تەز جۇعاتىنى انىقتالعان.

ازىرگە «بريتاندىق» ۆيرۋس ناقتى وسى ەلدە وزگەرىسكە ۇشىراعان با، ول دا بەلگىسىز. ونىڭ وسى ەلدە يممۋنيتەتى ءالسىز، ۆيرۋسپەن كۇرەسۋگە دارمەنسىز ناۋقاستىڭ اعزاسىندا پايدا بولعانىن نەمەسە بولماسا سىرتتان كەلگەنىن ءالى ەشكىم انىقتاعان جوق.

8 قاڭتاردا ۆيرۋستىڭ مۋتاتسياعا ۇشىراعان ءتۇرى ەۋروپانىڭ 22 ەلىندە تىركەلگەن. كەيىننەن رەسەيدە دە تىركەلدى. سوڭعى اپتادا جاڭا شتامم كەز كەلگەن جاستاعى ادامداردان انىقتالىپ جاتىر.

سوندىقتان ول بۇكىل الەمگە تاراپ، ۇلىبريتانياداعىداي باستى كوروناۆيرۋسقا اينالۋ قاۋپى بار. ددسۇ ەۋروپالىق بيۋروسىنىڭ ديرەكتورى حانس كليۋگە: «كوروناۆيرۋسپەن كۇرەستە ۇجىمدىق يممۋنيتەت ماڭىزدى ءرول ويناۋى ءتيىس. بىراق بۇل ناتيجەگە جەتپەس ءۇشىن الدىمەن ۆيرۋستىڭ تارالۋىن ازايتۋ قاجەت. سەبەبى ۆاكتسينا دەرتكە قانشالىقتى ۇزاق توسقاۋىل قويا الاتىنى ءالى بەيمالىم»، – دەيدى.

"The Qazaq Times"