«وزگەرمەيتىن كادرلار»: نازارباەۆ ۇسىندى، توقاەۆ قوستادى، ءماجىلىس ماقۇلدادى

جۇما كۇنگى پارلامەنت ءماجىلىسىنىڭ جالپى وتىرىسىندا اسقار مامين ۇكىمەت باسشىسى، نۇرلان نىعماتۋللين تومەنگى پالاتا توراعاسى  لاۋازىمىندا قالا بەرەتىنى بەلگىلى بولدى.

نازارباەۆ وتستاۆكاسىنان ءبىر اي الدىن ساعىنتاەۆتىڭ ورنىنا تاعايىندالعان اسقار ءماميندى توقاەۆ پرەمەر-مينيستر قىزمەتىنە قايتا ۇسىندى. ءماميننىڭ كانديداتۋراسىن ءماجىلىستىڭ باسىم بولىگى، 76 دەپۋتاتى بار Nur Otan-نىڭ تۇگەل دەرلىگى  ماقۇلدادى.

ءماجىلىس سپيكەرى نۇرلان نىعماتۋليننىڭ مالىمەتىنشە،  ماجىلىس وتىرىسىنا قاتىسقان 99 دەپۋتاتتىڭ 78-ءى جاقتاپ داۋىس بەرگەن، باسقا 21-ءى قالىس قالعان. قالىس قالعاندار – وزدەرىن پارلامەنتتەگى «وپپوزيتسيا» دەپ اتايتىن «اق جول» مەن «قازاقستاننىڭ حالىق پارتياسى» مۇشەلەرى.

بۇگىن توقاەۆ تۇستەن كەيىنگى جيىندا بىلتىر ىندەتپەن كۇرەسكە 500 ملرد تەڭگە، كاسىپكەرلىكتى قولداۋعا 1 ترلن تەڭگە جۇمسالعانىن ايتتى. «مەديتسينالىق قىزمەتكەرلەردىڭ جالاقىسى، ءدارى-دارمەك، ينفەكتسيالىق اۋرۋحانالار سالۋعا 225 ملرد تەڭگە جۇمسالدى» دەدى ول. ۇكىمەتتىڭ «ءتيىمدى ستراتەگياسىنىڭ» ارقاسىندا قازاقستان ءجىو-ءنىڭ كەمۋىن (2,8% بولدى) توقتاتا الدى، ينفلياتسيا دەڭگەيى 7,3% دەڭگەيىندە قالدى دەدى. ءدارى-دارمەك، جەڭىل ونەركاسىپ، قۇرىلىس تاعى باسقا سالالاردا ىلگەرىلەۋشىلىك بايقالدى دەدى پرەزيدەنت. وسىنى ىسكە اسىرىپ وتىرعان ۇكىمەت قۇرامىن مەڭزەدى. الايدا قازاقستان ورتا ازيادا كوروناۆيرۋستان زارداپ شەككەن ەلدەردىڭ قاتارىندا، الەمدە اۋىرعاندار سانى بويىنشا 51-ءشى ورىندا تۇر.

كۇنى كەشە، 14 قاڭتار بيلىكتە ىقپالى زور ەكس-پرەزيدەنت نازارباەۆ Nur Otan فراكتسياسىنىڭ جيىنىندا  «ساباقتاستىقتى ساقتاي وتىرىپ، توقاەۆ ءماميندى ۇسىنعان جاعدايدا ونىڭ كانديداتۋراسىن قولداۋدى سۇرايمىن» دەپ پىكىر بىلدىرگەن.

پارتيا-اسسامبلەيا كوسەمى بىلتىر «ماۋسىم-شىلدە قىرعىنىنا» جول بەرىپ العان ۇكىمەتتىڭ باسشىسىنىڭ ەڭبەگىن وڭ باعالايدى:

«بارلىق قيىندىققا قاراماستان، ۇكىمەت ءوز جۇمىسىن جاقسى اتقاردى. باسقا ەلدەرگە قاراعاندا ءبىز جامان ناتيجە كورسەتكەنىمىز جوق».

قوعامدا رەزونانس تۋدىرعان استاناداعى بەس بالانىڭ ولىمىنەن كەيىن نارازىلىق كوڭىل-كۇي ورشىگەن 2019 جىلعى 25 اقپاننان بەرى پرەمەر-مينيستر لاۋازىمىندا. ۇزاق جىلدار بويى استانادان ۇزاپ كورمەگەن، ءارتۇرلى مەملەكەتتىك قىزمەت (استانا اكىمى-ورىنباسارى، ۆيتسە-مينيستر), «قازاقستان تەمىر جولى» اق پرەزيدەنتى ورىندا بولعان.

سونىمەن قوسا، پارلامەنت ءماجىلىسىنىڭ VII شاقىرىلىمداعى دەپۋتاتتارى جاڭا سپيكەردى سايلاردا ەكس-پرەزيدەنتتىڭ ۇسىنىسىن ەسكەرگەن سياقتى.

نازارباەۆ اۋلەتىنە قۇدا رەتىندە تۋىستىق بايلانىسى بار ورتالىق سايلاۋ كوميسسياسىنىڭ توراعاسى بەرىك يماشەۆ ءماجىلىس جەتەكشىسىن سايلاۋ جيىنىندا مودەراتور بولدى. بار بولعانى ءبىر عانا كانديدات ۇسىنىلدى. ون جىلدان استام ۋاقىت نازارباەۆقا جاقىن باسشىلىق قىزمەتتەرىندە بولعان نىعماتۋلليندى Nur Otan فراكتسياسىنىڭ مۇشەسى دارحان مىڭباي باستاعان بىرنەشە دەپۋتات اسىپ تا، توگىپ تە ماقتاي سويلەدى. جاڭا قىزمەتىنە سەنەر-سەنبەسىن بىلمەي اپتىعىپ جۇرگەن دەپۋتاتتار جاسىرىن داۋىس بەرۋ ارقىلى ءبىراۋىزدان نۇرلان نىعماتۋليندى سپيكەر ەتىپ سايلادى.

بۇل دا نازارباەۆتىڭ بەيسەنبىدەگى تىلەگى بولاتىن. ول ءماجىلىس توراعاسىنا نۇرلان نىعماتۋليندى، ال ۆيتسە-سپيكەرلىككە بالايىم كەسەباەۆا مەن پاۆەل كازانتسەۆتى ۇسىنعان ەدى. ايتقانى ايداي كەلىپ، ۇسىنىس تا، شەشىم دە ەش شاشاۋسىز ىسكە استى.

پاندەميا العاش جاريالانعان كەزدە ۇكىمەتتىڭ كوكتەمگى باعدار-بولجامى قاتە، قامدانىسى جەتكىلىكسىز بولعاندىقتان، ەل اۋىر جاعدايعا ۇشىرادى. ىندەت ءورشىپ، قازا ادەتتەن كوبەيىپ، مىڭداعان قازاقستاندىق ومىردەن وتكەن «ماۋسىم-شىلدە قىرعىنى» ەسىمىزدە. بىلتىر شىلدەدە (10-ى جانە 18-ءى كۇندەرى) توقاەۆ  بارلىق سالا بويىنشا جاعدايعا دايىن بولماي شىققان «ۇكىمەت مۇشەلەرى دە، اكىمدەر دە «توقمەيىلسۋدىڭ، ماسايراۋدىڭ قاقپانىنا تۇسكەنىن» ايتىپ،  ولاردىڭ جۇمىسىن قاتاڭ سىنعا العان. ول ورنى تولماس شىعىن-قايعىعا جەتكىزگەن «ۇكىمەتتىڭ كاسىبي شەبەرلىگىنىڭ كەمدىگىنەن» كورىپ ەدى. ءتىپتى جاعدايدى ۋىستان شىعارىپ العان ۇكىمەتكە وتستاۆكا تۋرالى ەسكەرتۋ جاساپ، ماسەلەنى شەشۋگە ەكى اپتا ۋاقىت بەرگەن. دەگەنمەن كۇزدەن بەرى توقاەۆ مامين مەن ونىڭ مينيسترلەر كابينەتىنىڭ جۇمىسىن ءجيى ماقتاپ، جاعىمدى پىكىر ءبىلدىرىپ كەلەدى.

"The Qazaq Times"