فوتو: Vlast.kz

پاۆلودار وبلىسىنىڭ ءماسليحاتىنا "نۇر وتان" پارتياسى اتىنان سايلانعان دەپۋتات قايرات ابىشەۆ 15 كۇنگە قامالدى. بۇل تۋرالى بۇگىن، 26 مامىردا پاۆلودار اكىمشىلىك سوتىنىڭ مالىمەتىنە سۇيەنگەن قازتاگ اگەنتتىگى حابارلادى.

اقپاراتقا قاراعاندا، 25 مامىردا پاۆلودار قالاسىنىڭ مامانداندىرىلعان اكىمشىلىك سوتى ونى اكىمشىلىك كودەكستىڭ 613-باپ 4-بولىگى بويىنشا ("اسكەري پوليتسيا ورگان قىزمەتكەرلىنىڭ تالاپتارىن ورىنداماۋ، الكوگولدىك، ەسىرتكىلىك جانە (نەمەسە) ماساڭ كۇيىن كۋالاندىرۋدان وتۋدەن جالتارۋ") كىنالى دەپ تانىپ، 15 كۇنگە قاماعان، سونىمەن بىرگە 8 جىل كولىك جۇرگىزۋگە تىيىم سالعان.

سوت قاۋلىسىندا 1979 جىلعى جاۋاپكەردىڭ "دانەكەر" شارۋا قوجالىعى مەن "Food Mix" كومپانياسىن باسقاراتىنى جازىلعان.

ءىس ماتەريالدارىنا سۇيەنسەك، 25 مامىردا تاڭەرتەڭگى ساعات 5-تەر شاماسىندا ول Toyota Camry كولىگىمەن ءجۇرىپ، پوليتسيا نازارىنا ىلىنگەن. پوليتسيا قىزمەتكەرلەرى پلانشەتتەن ونىڭ كولىگىنىڭ تەحنيكالىق تەكسەرۋدەن وتپەگەنىن بايقاپ، توقتاتقان. ودان ىشىمدىكتىڭ ءيىسى شىعىپ تۇرعان. ارتىنشا كولىك باسقارۋدان شەتتەتىلىپ، ىشىمدىكتى انىقتاۋ ءۇشىن وبلىستىق پسيحيكالىق ساۋلىق ورتالىعىنا جىبەرىلگەن. بىراق دەپۋتات پوليتسيا تالابىن ورىنداماعان.

ول سوت كەزىندە كىناسىن مويىنداماي، ۇيىقتار الدىندا وتتەگى تاستى ەرىتەتىن سپيرت قوسىلعان تۇنبا ىشكەنىن ايتقان. تاڭەرتەڭ بالالارىنا ءدارى-دارمەك ساتىپ الۋ ءۇشىن باسقا كولىكپەن كەتىپ قالعانىن جەتكىزگەن. ول سوتتان ءوزىن قاماماۋدى، جۇمىسشىلارىنا جالاقى تولەۋ قاجەتتىگىن العا تارتقان.

"نۇر وتان" مۇشەسى قايرات ابىشەۆ 2016 جىلى ناۋرىز ايىندا پاۆلودار وبلىسىنىڭ 6 شاقىرىلىم دەپۋتاتتارىنىڭ قۇرامىنا كىرگەن. بيىل دا ءماسليحات قۇرامىنا وتكەن.

"نۇر وتان" – قازاقستان پارلامەنتىندە باسىم داۋىسقا يە پارتيا. ونىڭ توراعاسى – قازاقستاندى 30 جىلعا جۋىق ۇزدىكسىز بيلەگەن نۇرسۇلتان نازارباەۆ. ەلدە باسشىلىق قىزمەتتەگى شەنەۋنىكتەردىڭ كوبى وسى پارتيانىڭ مۇشەسى.

"The Qazaq Times"