«سايلاۋ سيقىرى»: الماتىداعى احۋال & اتىراۋدا تەست تاپسىرماعان باقىلاۋشىدان «كوروناۆيرۋس انىقتالعان»

بيىل 10 قاڭتارعا بەلگىلەنگەن ءماجىلىس جانە ءماسليحاتتار سايلاۋىن باقىلايتىن كەيبىر باقىلاۋشىلاردان «كوروناۆيرۋس» تابىلعانى حابارلاندى. الماتىلىق بەلسەندى نەگىزسىز سەبەپپەن شەتتەتىلگەنىن، ال اتىراۋ وبلىسىنىڭ تۇرعىنى «تاپسىرماعان» تەستىدەن كوروناۆيرۋس انىقتالعانىن ايتادى. بۇل وسك قاۋلىسىنان كەيىن ازاماتتىق قوعامنىڭ ارەكەت ەتۋ ارەالى باقىلاۋ ينستيتۋتىنا قاتىسۋشىلار قاتارىن سيرەتىپ قانا قويماي، ەندى «سايلاۋ ۋچاسكەسىنە جولاتپاۋدىڭ» جاڭا وپەراتسياسى ەمەس پە؟   

الماتى قالاسىنىڭ قوعامدىق دەنساۋلىق باسقارماسى رەداكتسيا سۇراعىنا بەرگەن جاۋابىنداعى دەرەككە قاراعاندا، 8 قاڭتار ساعات 10.00-دەگى جاعداي بويىنشا، قالاداعى سايلاۋ پروتسەسىنە قاتىساتىن 11 700 ادامنىڭ 10 503-ءى (89,7%) پتر تەستىن تاپسىرعان. ايماقتىق سايلاۋ كوميسسياسى قۇرامىنداعى 4665 مۇشە مەن رەزەرۆتەگى مامانداردىڭ 4802-سىنەن، تاعى پارتيالاردىڭ 1557 سەنىمدى وكىلىنىڭ 1347-سىنەن سىناما الىنعان.

سايلاۋدا ماڭىزدى ءرول اتقاراتىن، وسك قابىلداعان قاۋلىنىڭ كەسىرىنەن قاتارى كەمىپ، كوپتەگەن كەدەرگىگە ۇشىراپ جاتقان بايقاۋشىلاردىڭ باسىم بولىگى تەستىلەنگەن. 5458 بايقاۋشىنىڭ 4354-ءى، ياعني 79,7%-ى پتر تاپسىرعان.

10,5 مىڭنان استام ادامنىڭ 21-ىنەن كوروناۆيرۋس انىقتالعان كورىنەدى. ونىڭ 7-ەۋى سايلاۋ كوميسسياسىنان، 9-ى بايقاۋشىلاردان جانە بىرەۋى سەنىمدى وكىل. قاڭتار ايى باستالعالى بەرى «سارى» ايماقتا تۇرعان الماتى قالاسىندا 800-دەن استام ادامنان كوروناۆيرۋس انىقتالدى. جانە بۇل ايماقتاردىڭ اراسىنداعى ەڭ جوعارى كورسەتكىش.

الماتىلىق بەلسەندى سامال كۇزەمباەۆا ازاتتىققا ايتقان سوزىندە «كوروناۆيرۋس جۇقتىرعانداردىڭ بىرىمەن بايلانىس ورناتقانى ءۇشىن» باقىلاۋدان شەتتەتىلگەنىن ايتادى.

ونىڭ سوزىنشە، دارىگەرلەر كونتاكتىدە بولدى دەگەن ادامنىڭ قاسىندا بولماعان، مۇلدەم تانىمايدى.

«7 قاڭتاردا جولداسىما اۋىلدىق اۋرۋحانادان (الماتى قالاسى ماڭىنداعى اۋىلداردىڭ ءبىرى) حابارلاسىپ، وتەگەن باتىر كەنتىنەن بىزگە اقپارات كەلدى دەدى. ايتۋلارىنشا، مەن جاپەك باتىر دەگەن اۋىلدىڭ مۇلدە تانىمايتىن ادامىمەن (اتى-ءجونىن ايتادى) اكىمدىكتە كەزەكتە تۇرعان كەزدە «كونتاكتىدە» بولىپپىن. سونداي كۋالىك بەرگەن ادام 6 قاڭتاردا كارانتينگە جىبەرىلگەن ەكەن. مەن وسىعان دەيىن اۋىلدىق اكىمدىككە بارعانمىن. بىراق مەنىڭ جانىمدا ەشكىم بولعان ەمەس»، – دەيدى ازاماتتىق بەلسەندى كۇزەمباەۆا.

بۇدان وزگە ازاتتىق سايلاۋدى باقىلاۋعا ىنتالى بەلسەندىنىڭ پتر تەستىن تاپسىرماسا دا اتىراۋ وبلىسىنىڭ اۋداندىق سەس-تەن «وڭ قورتىندىمەن  ۆيرۋس انىقتالعانى» تۋرالى حابار العانىن جازادى. وتباسىنا قىسىم جاسالۋى ىقتيمال دەگەن الاڭداۋشىلىقپەن اتى-ءجونىن اتاماعان ەرىكتى باقىلاۋشى

«بۇرىن «ەرىكتى باقىلاۋشىمىز» دەپ تىلدەي ءبىر قاعاز بەن كۋالىكپەن كىرە بەرۋشى ەدىك. قازىر ونى قيىنداتىپ جىبەردى. ءتىپتى «ءشريفتى 14 بولۋ كەرەك» دەگەن سياقتى سىلتاۋلار ايتىپ، فوتو-ۆيدەوگە شەكتەۋ قويىپ جاتىر. سايلاۋدىڭ شىنايى بولمايتىنى باقىلاماي-اق بەلگىلى بولىپ جاتىر»، - دەيدى اتىراۋ وبلىسىنىڭ تۇرعىنى ازاتتىق راديوسىنا.

2019 جىلعى پرەزيدەنت سايلاۋىندا فالسيفيكاتسيا فاكتىلەرى تۋرالى فوتو-ۆيدەو ماتەريالدار ينتەرنەتتە كەڭىنەن تاراعان سوڭ وسك وتكەن ايدا ۇكىمەتتىك ەمەس ۇيىمدار مەن تاۋەلسىز باقىلاۋشىلاردىڭ «قىزمەتىن شەكتەيتىن» قاۋلى قابىلداعان. بۇل ازاماتتىق قوعام، بەلسەندىلەر مەن قۇقىق قورعاۋشىلاردىڭ سىنىنا ۇشىرادى. ولار جوعارعى سوت پەن باس پروكۋراتۋرادان قاۋلىنىڭ كۇشىن جويۋدى سۇراعان. بيلىكتىڭ «تاۋەلسىز تارماعى» سانالاتىن جوعارعى سوت  قاۋلىعا بايلانىستى تۇسكەن 32 شاعىمدى «تەحنيكالىق تالاپقا ساي بولماۋى سەبەپتى» كەرى قايتارعان. ال سايلاۋ ناۋقانى تاياپ قالدى...

وسى جەكسەنبىدە وتەتىن ساياسي وقيعاعا «Nur Otan»، «اقجول»، «ادال»، «اۋىل» جانە «قازاقستان حالىق پارتياسى» قاتىسادى. وسك مالىمەتىنشە، بەس پارتيا ءماجىلىس سايلاۋىنا – 312 كانديدات (90 ايەل، 222 ەر ادام), ماسليحاتقا 832 كانديدات ۇسىنعان. سايلاۋ وسك ۇيىمداستىرۋىمەن 232 ايماقتىق سايلاۋ كوميسسيا وكىلدىك ەتەتىن 10 مىڭنان استام سايلاۋ ۋچاسكەسىندە وتەدى.

“The Qazaq Times”