Saylau kezinen. Foto: Kazpravda.kz / Adil'bek Tauekelov

Biıl 10 qañtarğa belgilengen mäjilis jäne mäslihattar saylauın baqılaytın keybir baqılauşılardan «koronavirus» tabılğanı habarlandı. Almatılıq belsendi negizsiz sebeppen şettetilgenin, al Atırau oblısınıñ twrğını «tapsırmağan» testiden koronavirus anıqtalğanın aytadı. Bwl OSK qaulısınan keyin azamattıq qoğamnıñ äreket etu arealı baqılau institutına qatısuşılar qatarın siretip qana qoymay, endi «saylau uçaskesine jolatpaudıñ» jaña operaciyası emes pe?   

Almatı qalasınıñ Qoğamdıq densaulıq basqarması redakciya swrağına bergen jauabındağı derekke qarağanda, 8 qañtar sağat 10.00-degi jağday boyınşa, qaladağı saylau procesine qatısatın 11 700 adamnıñ 10 503-i (89,7%) PTR testin tapsırğan. Aymaqtıq saylau komissiyası qwramındağı 4665 müşe men rezervtegi mamandardıñ 4802-sinen, tağı partiyalardıñ 1557 senimdi ökiliniñ 1347-sinen sınama alınğan.

Saylauda mañızdı röl atqaratın, OSK qabıldağan qaulınıñ kesirinen qatarı kemip, köptegen kedergige wşırap jatqan bayqauşılardıñ basım böligi testilengen. 5458 bayqauşınıñ 4354-i, yağni 79,7%-ı PTR tapsırğan.

10,5 mıñnan astam adamnıñ 21-inen koronavirus anıqtalğan körinedi. Onıñ 7-eui saylau komissiyasınan, 9-ı bayqauşılardan jäne bireui senimdi ökil. Qañtar ayı bastalğalı beri «sarı» aymaqta twrğan Almatı qalasında 800-den astam adamnan koronavirus anıqtaldı. Jäne bwl aymaqtardıñ arasındağı eñ joğarı körsetkiş.

Almatılıq belsendi Samal Küzembaeva Azattıqqa aytqan sözinde «koronavirus jwqtırğandardıñ birimen baylanıs ornatqanı üşin» baqılaudan şettetilgenin aytadı.

Onıñ sözinşe, därigerler kontaktide boldı degen adamnıñ qasında bolmağan, müldem tanımaydı.

«7 qañtarda joldasıma auıldıq auruhanadan (Almatı qalası mañındağı auıldardıñ biri) habarlasıp, Ötegen batır kentinen bizge aqparat keldi dedi. Aytularınşa, men Jäpek batır degen auıldıñ mülde tanımaytın adamımen (atı-jönin aytadı) äkimdikte kezekte twrğan kezde «kontaktide» bolıppın. Sonday kuälik bergen adam 6 qañtarda karantinge jiberilgen eken. Men osığan deyin auıldıq äkimdikke barğanmın. Biraq meniñ janımda eşkim bolğan emes», – deydi azamattıq belsendi Küzembaeva.

Bwdan özge Azattıq saylaudı baqılauğa ıntalı belsendiniñ PTR testin tapsırmasa da Atırau oblısınıñ audandıq SES-ten «oñ qortındımen  virus anıqtalğanı» turalı habar alğanın jazadı. Otbasına qısım jasaluı ıqtimal degen alañdauşılıqpen atı-jönin atamağan erikti baqılauşı

«Bwrın «erikti baqılauşımız» dep tildey bir qağaz ben kuälikpen kire beruşi edik. Qazir onı qiındatıp jiberdi. Tipti «şrifti 14 bolu kerek» degen siyaqtı sıltaular aytıp, foto-videoge şekteu qoyıp jatır. Saylaudıñ şınayı bolmaytını baqılamay-aq belgili bolıp jatır», - deydi Atırau oblısınıñ twrğını Azattıq radiosına.

2019 jılğı prezident saylauında fal'sifikaciya faktileri turalı foto-video materialdar internette keñinen tarağan soñ OSK ötken ayda ükimettik emes wyımdar men täuelsiz baqılauşılardıñ «qızmetin şekteytin» qaulı qabıldağan. Bwl azamattıq qoğam, belsendiler men qwqıq qorğauşılardıñ sınına wşıradı. Olar joğarğı sot pen bas prokuraturadan qaulınıñ küşin joyudı swrağan. Biliktiñ «täuelsiz tarmağı» sanalatın joğarğı sot  qaulığa baylanıstı tüsken 32 şağımdı «tehnikalıq talapqa say bolmauı sebepti» keri qaytarğan. Al saylau nauqanı tayap qaldı...

Osı jeksenbide ötetin sayasi oqiğağa «Nur Otan», «Aqjol», «Adal», «Auıl» jäne «Qazaqstan halıq partiyası» qatısadı. OSK mälimetinşe, bes partiya mäjilis saylauına – 312 kandidat (90 äyel, 222 er adam), mäslihatqa 832 kandidat wsınğan. Saylau OSK wyımdastıruımen 232 aymaqtıq saylau komissiya ökildik etetin 10 mıñnan astam saylau uçaskesinde ötedi.

“The Qazaq Times”