دونالد ترامپ جاقتاستارىنىڭ اقش كونگرەسى عيمراتىن باسىپ الۋ ءساتى. فوتو: REUTERS/Leah Millis

كەشە كونگرەستىڭ سەنات جانە وكىلدەر پالاتاسىنىڭ بىرىككەن وتىرىسىندا 50 شتاتتىڭ اتىنان كەلگەن داۋىس بەرۋشىلەر القاسى پرەزيدەنتتىك سايلاۋدىڭ قورىتىندىسىن جاريالاۋ كەرەك بولاتىن. الايدا اقش-تىڭ قازىرگى پرەزيدەنتى دونالد ترامپتىڭ جاقتاستارى ۆاشينگتونداعى كاپيتوليدەگى پوليتسيا قورشاۋىنان ءوتىپ، كونگرەسس عيماراتىنا باسىپ كىردى. دجوزەف بايدەندى جەڭىمپاز دەپ تانۋعا نارازى توپ اقش پارلامەنتىنىڭ قاراشاداعى پرەزيدەنت سايلاۋىنىڭ نءاتيجەسىن كۋءالاندىرۋعا ارنالعان ورتاق وتىرىسىن توقتاتىپ تاستادى.

ناتيجەسىندە داۋىستاردى ساناۋ كەيىنگە قالدىرىلىپ، كونگرەسس مۇشەلەرى ەۆاكۋاتسيالاندى. مىڭداعان ادام نارازىلىققا شىققاندىقتان، ەلدە كومەندانتتىق ساعات ەنگىزىلدى. ۆيردجينيا گۋبەرناتورى ۇلتتىق گۆارديانىڭ 200 اسكەرىن جۇمىلدىرۋدى تاپسىردى. ال ۆاشينگتون مەرى مۋريەل بوۋزەر ۇلتتىق گۆارديا بولىمشەلەرىن كونگرەسس عيماراتىنا جىبەرۋدى سۇرادى. دەمونسترانتتاردىڭ شەرۋىنە دەيىن اقۇيدىڭ قازىرگى باسشىسى دونالد ترامپ رەسمي مالىمدەمە جاساعان. ول ناتيجەلەردى مويىنداۋدان باس تارتىپ، «ادىلەتسىز سايلاۋ» وتكەنىن ايتتى.

پوليتسيا كونگرەسس عيماراتىندا دەمونستراتسياعا قاتىسۋشىلاردى ۇستادى. فوتو: ۆۆس

اتالعان جاعدايعا بايلانىستى مالىمدەمە جاساعان اقش پرەزيدەنتى ترامپ: «قۇرمەتتى وتانداستار، بۇل سايلاۋدىڭ ادىلەتسىز وتكەنى راس، بىراق ءدال قازىر بىزگە تىنىشتىق قاجەت. بىزگە بەيبىت ءومىر كەرەك. سول سەبەپتى بارلىقتارىڭىزدان سۇرايتىنىم، تارتىپسىزدىكتەردى دوعارىپ، ۇيلەرىڭىزگە قايتىڭىزدار. سىزدەردىڭ ءدال قازىر قانداي سەزىمدە ەكەندەرىڭىزدى بىلەمىن. بىراق تارتىپسىزدىك ارقىلى ەشنارسە وزگەرمەيدى»، – دەيدى.

Facebook پەن YouTube وزدەرىندە جاريالانعان ترامپتىڭ ۆيدەوسىن ءوشىرىپ تاستادى. Facebook اكىمشىلىگى ترامپ اككاۋنتى 24 ساعاتقا بۇعاتتالعانىن حابارلادى. Twitter اكىمشىلىگى ترامپ سارسەنبىدە جاريالاعان ءۇش ءتۆيتىن جويمايىنشا، ونىڭ اككاۋنتىنا 12 ساعات شەكتەۋ قوياتىنىن ايتتى. Instagram جەلىسى دە ترامپتىڭ اككاۋنتىن 24 ساعاتقا بۇعاتتادى.

نيۋ-يورك شتاتىنىڭ بيلىگى ۇلتتىق گۆارديانىڭ 1 مىڭ مۇشەسىن ۆاشينگتونعا جىبەردى. قۇقىق قورعاۋ ورگاندارىنىڭ قىزمەتكەرلەرى تارتىپسىزدىكتەر سالدارىنان ۆاشينگتوندا ەنگىزىلگەن كومەندانتتىق ساعاتتى بۇزعان 30 ادامدى ۇستادى. قاقتىعىس كەزىندە ءتورت ادام قازا تاپتى. پوليتسيا نارازىلارعا كوز جاساۋراتاتىن گاز قولدانۋعا ءماجبۇر بولدى.

كۇتپەگەن جاعدايدان كەيىن دەموكرات دجوزەف بايدەن: «كاپيتوليدە بولىپ جاتقان تارتىپسىزدىكتەر اقش-تىڭ شىنايى كورىنىسى ەمەس. ءبىز وسىنشالىقتى تومەن دەڭگەيگە تۇسكەنىمىز بە؟ ءدال قازىر ءبىزدىڭ دەموكراتيامىز ءۇشىن قاۋىپ-قاتەر ءتونىپ تۇر. بۇل جاي عانا حاوس، بۇل قىلمىس. ءدال قازىر بىزگە بۇكىل الەم قاراپ وتىر. ءبىزدىڭ دەموكراتيامىز وسىنداي تومەن دەڭگەيگە جەتتى. بىراق ءبىز بۇل قيىندىقتان دا وتەمىز. ءبىزدىڭ كەلەسى ءتورت جىلداعى جۇمىسىمىز دا وسىعان باعىتتالادى»، – دەدى.

نارازىلىق بىلدىرۋشىلەردىڭ شابۋىلىنا بايلانىستى كونگرەسس قىزمەتكەرلەرى ەۆاكۋاتسيالاندى. فوتو: ار

بۇگىن ۆاشينگتون مەرى توتەنشە جاعداي رەجيمىن 15 كۇنگە ۇزارتاتىنىن مالىمدەدى. اقش كونگرەسىنىڭ وكىلدەر پالاتاسى اريزوناداعى پرەزيدەنت سايلاۋىنىڭ ناتيجەلەرىن ماقۇلداۋعا قارسى نارازىلىقتى قابىلدامادى. اقش وكىلدەر پالاتاسى پرەزيدەنتتىك سايلاۋ ناتيجەلەرى بويىنشا پىكىرتالاستى قايتا باستادى.

ترامپتىڭ جاقتاستارى 10-نان استام شتاتتا (اريزونا، ۆاشينگتون، ۆيسكونسين، گاۆاي، دجوردجيا، كاليفورنيا، كانزاس، كولورادو، نەۆادا، نيۋ-مەكسيكو، وگايو، وكلاحوما، ورەگون، وڭتۇستىك كارولينا جانە يۋتا) قولداۋعا شىقتى.

قازىر پرەزيدەنتتىڭ ۇلتتىق قاۋىپسىزدىك جونىندەگى كومەكشىسى روبەرت و ' برايەن ۆاشينگتونداعى تارتىپسىزدىكتەر اياسىندا وتستاۆكاعا كەتۋدى قاراستىرۋدا.

ۆاشينگتونداعى نارازىلىقتار كەزىندە توكيوداعى اكتسيالار باعامى 1990 جىلمەن سالىستىرعاندا ەڭ جوعارى دەڭگەيگە كوتەرىلدى. «Nikkei»-ءدىڭ نەگىزگى يندەكسى 27 519,5 پۋنكت بەلگىسىنە دەيىن ءوستى.

3 قاراشادا وتكەن پرەزيدەنت سايلاۋىندا رەسمي ناتيجە بويىنشا 306-232 (ەلەكتورلار داۋىسى) ەسەبىمەن دجو بايدەن جەڭىسكە جەتكەن. بىراق ترامپ سايلاۋ ناتيجەسىن مويىنداۋدان باس تارتىپ، «سوڭىنا دەيىن بەرىلمەيتىنىن» ايتتى.

كەشە رەسپۋبليكالىقتار مەن دەموكراتتاردىڭ كونگرەستەگى ورىندار ءۇشىن باسەكەسى اياقتالۋى ءتيىس ەدى. سەناتتا دەموكراتتىق پارتيانىڭ باسىمدىققا يە بولۋى ءۇشىن كەم دەگەندە ەكى داۋىستى الۋى ءتيىس. ەگەر دەموكراتتار جەڭىسكە جەتسە، ەلدىڭ كەلەسى ۆيتسە-پرەزيدەنتى كامالا حاريس قوسىمشا داۋىسىمەن دەموكراتتارعا باسىمدىق بەرە الادى. ال رەسپۋبليكاندىقتار ءبىر داۋىسپەن-اق جەڭىسكە جەتە الادى. ەگەر سەنات رەسپۋبليكالىقتاردىڭ ەنشىسىندە كەتسە، بايدەن اكىمشىلىگىنىڭ ۋادە ەتكەن باعدارلامالارىن جۇزەگە اسىرۋدا قيىندىقتار تۋىنداۋى مۇمكىن.

"The Qazaq Times"