وتكەن سايلاۋعا قاراعاندا ەكى ەسەگە كەم – بيىل نەبارى 398 حالىقارالىق بايقاۋشى

10 قاڭتارعا بەلگىلەنگەن 10 مىڭنان استام ۋچاسكەدە وتەتىن ءماجىلىس جانە ءماسليحات سايلاۋىن 400-گە جۋىق حالىقارالىق بايقاۋشى باقىلايدى. بۇل تۋرالى دۇيسەنبى كۇنى ورتالىق سايلاۋ كوميسسياسى وكىلدەرى حابارلادى. 

سول كۇنى كەشكىسىن، 4 قاڭتاردا ساعات 18.00-دە حالىقارالىق بايقاۋشىلاردى تىركەۋ پروتسەسى اياقتالعان. الداعى سايلاۋدى باقىلايتىن شەتەلدىك بايقاۋشىلاردىڭ سانى وتكەن ءماجىلىس سايلاۋىنا قاراعاندا الدەقايدا از، ەكى ەسەگە كەم. 2016 جىلى 20 ناۋرىزدا وتكەن پارلامەنتتىك سايلاۋعا قاتىسۋعا شەتەلدەر مەن حالىقارالىق ۇيىمداردان 817 باقىلاۋشى اككرەديتتەلگەن، ال بيىل 400-گە جەتەر-جەتپەس.

وسك-نىڭ رەسمي دەرەگىنە قاراعاندا، بارلىعى 398 حالىقارالىق بايقاۋشىنىڭ 322-ءسى – 10 حالىقارالىق ۇيىمنىڭ اتىنان قاتىسادى: تمد پارلامەنتارالىق اسسامبلەياسى (48), تمد اتقارۋ كوميتەتى (179), يسلام ىنتىماقتاستىق ۇيىمى (4), ەقىۇ دەموكراتيالىق ينستيتۋتتار مەن ادام قۇقىعى بيۋروسى (42), ەقىۇ پارلامەنتتىك اسسامبلەياسى (9), شانحاي ىنتىماقتاستىق ۇيىمى (15), تۇركىتىلدى مەملەكەتتەر ىنتىماقتاستىق كەڭەسى (7), ۇجىمدىق قاۋىپسىزدىك شارتى ۇيىمىنىڭ پارلامەنتتىك اسسامبلەياسى (7), تۇركىتىلدى ەلدەر پارلامەنتتىك اسسامبلەياسى (9), ەۋرووداقتىڭ قازاقستانداعى وكىلدىگى (2). ودان وزگە، 31 مەملەكەتتەن (يوردانيا، قىرعىزستان، مالديۆ، مولدوۆا، تۇركيا، ءازىربايجان، ارمەنيا، يندونەزيا، وزبەكستان، رەسەي، رۋمىنيا، ءۇندىستان، فيليپپين، ۆەنگريا، يسپانيا، نورۆەگيا، فرانتسيا، شۆەيتساريا، پولشا، چەحيا، يتاليا، ەستونيا، ۋكراينا، گەرمانيا، بەلگيا، پالەستينا، ۇلىبريتانيا، موڭعوليا، شۆەتسيا، كانادا، فينليانديا) 76 بايقاۋشى قاتىسادى.

2019 جىلعى پرەزيدەنت سايلاۋىندا فالسيفيكاتسيا فاكتىلەرى تۋرالى فوتو-ۆيدەو ماتەريالدار ينتەرنەتتە كوپتەپ تاراعان سوڭ وسك وتكەن ايدا ۇكىمەتتىك ەمەس ۇيىمدار مەن تاۋەلسىز باقىلاۋشىلاردىڭ «قىزمەتىن شەكتەيتىن» قاۋلى قابىلداعان. بۇل ازاماتتىق قوعام، بەلسەندىلەر مەن قۇقىق قورعاۋشىلاردىڭ سىنىنا ۇشىرادى. ولار جوعارعى سوت پەن باس پروكۋراتۋرادان قاۋلىنىڭ كۇشىن جويۋدى سۇراعان. بيلىكتىڭ «تاۋەلسىز تارماعى» سانالاتىن جوعارعى سوت  قاۋلىعا بايلانىستى تۇسكەن 32 شاعىمدى «تەحنيكالىق تالاپقا ساي بولماۋى سەبەپتى» كەرى قايتارعان. ال سايلاۋ ناۋقانى تاياپ قالدى...

وسى جەكسەنبىدە وتەتىن ساياسي وقيعاعا «Nur Otan»، «اقجول»، «ادال»، «اۋىل» جانە «قازاقستان حالىق پارتياسى» قاتىسادى. وسك مالىمەتىنشە، بەس پارتيا ءماجىلىس سايلاۋىنا – 312 كانديدات (90 ايەل، 222 ەر ادام), ماسليحاتقا 832 كانديدات ۇسىنعان. سايلاۋ وسك ۇيىمداستىرۋىمەن 232 ايماقتىق سايلاۋ كوميسسيا وكىلدىك ەتەتىن 10 مىڭنان استام سايلاۋ ۋچاسكەسىندە وتەدى.

"The Qazaq Times"