دەنساۋلىق ساقتاۋ مينيسترلىگىنىڭ ءباسپاسوز قىزمەتى رەداكتسيا سۇراۋى بويىنشا 1 ناۋرىز بەن 30 قاراشا ارالىعىندا كوروناۆيرۋستىڭ جاناما اسەرىنەن 816 ادام قايتىس بولعانىن حابارلادى.

بيلىك اتالعان ساناتتاعى پاتسيەنتتەن پتر تەستى ارقىلى كوروناۆيرۋس انىقتالعانىنا قاراماستان، «باسقا اۋرۋلاردىڭ سەبەبىنەن قايتىس بولعانىن» العا تارتا وتىرىپ ورتاق ەسەپكە قوسپايدى. ۆەدومستۆو بۇل ينديكاتورعا تيەسىلى دەرەكتى تۇراقتى تۇردە ەمەس، تىلشىلەردىڭ سۇراۋىمەن عانا جاريالايدى.

مينيسترلىك ولاردىڭ ءولىمىن «باسقا دەرتتەردەن بولدى، كوروناۆيرۋس تىكەلەي اسەر ەتپەيدى» دەپ سانايدى. جاۋاپتى ماماندار بۇل جايلى سيرەك ءسوز ەتەدى، ونىڭ وزىندە جۋرناليستەردىڭ سۇراۋىمەن. اقپارات اۆتوماتتاندىرىلماعان. 18 ماۋسىم 54 جاعداي، 2 شىلدە 101, 23 شىلدە 319, 11 قىركۇيەك 576,15 قازان 672, 9 قاراشا 709, 15 جەلتوقسان 764, 26 جەلتوقسان 816 جاعداي بولعانى ايتىلدى.

اقپارات جاڭارماعالى ءبىر ايدان استام ۋاقىت ءوتتى. رەداكتسيا ءجۋرناليسى ۆيتسە-مينيستر عينياتقىزىنىڭ ۋادەسىن (قاراشا ايىنىڭ باسىندا عينياتقىزى اتالعان اقپاراتتى ايىنا ءبىر رەت جاريالاۋدى جولعا قويۋعا ۋادە بەرگەن – QT) ەسكە سالىپ، قايتا سۇراۋ جولدادى. دەر كەزىندە جاۋاپ بولماعاسىن وتكەن سارسەنبىدە باس سانيتار-دارىگەر ەرلان قياسوۆقا بريفينگ بارىسىندا قويىلدى. ەشبىر سۇراعىمىزعا جاۋاپ بەرە الماعان ول مالىمەتتى جازباشا نۇسقادا جولداۋعا ۋادە ەتكەن. ءباسپاسوز جيىنىنان كەيىن تۇششىمدى اقپارات بەرىلمەدى. اقىرى ورىنداۋسىز قالعان ۆيتسە-ءمينيستردىڭ ۋادەسى ءارى پرەزيدەنتتىڭ تاپسىرماسىن رەداكتسيا تاباندى تۇردە تالاپ ەتىپ ءجۇرىپ جاۋاپ الدى.

«مينيستىرلىككە قاراستى «رەسپۋبليكالىق ەلەكتروندىق دەنساۋلىق ساقتاۋ ورتالىعى» شجق رمك دەرەكتەرىنە سايكەس، 2020 جىلدىڭ 1 ناۋرىزى مەن 30 قاراشاسىنىڭ ارالىعىندا كوروناۆيرۋس ينفەكتسياسى ىلەسپە دياگنوزى بولعان 816 ءولىم جاعدايى تىركەلدى»، – دەلىنگەن رەسمي مالىمەتتە.

قاراشادا 107 ءولىم تىركەلىپ، قايتا كۇرت وسكەن. ونىڭ 50-ءى تىنىس الۋ ورگاندارىنىڭ، 33-ءى قاناينالىم جۇيەسى اۋرۋلارىنان.

وسى سانات بويىنشا ومىردەن وتكەندەردىڭ دەرەگى جالپى ەسەپكە ەنگىزىلمەيدى. ساراپشىلار مەن ماماندار بۇعان قارسى. مۇنى «ستاتيستيكانى مەيىلىنشە جاقسارتۋدىڭ امالى» دەپ ەسەپتەيدى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى مەن تىنىس الۋ جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرادى. 816 كەيستىڭ اۋرۋلار توبى جىكتەلىمىن ۆەدومستۆو بىلاي تاراتادى:

  • تىنىس الۋ جۇيەسىنىڭ اۋرۋلارى – 382 (47%)
  • قاناينالىم جۇيەسىنىڭ اۋرۋلارى – 268 (32,8%)
  • ەندوكريندىك جۇيەنىڭ اۋرۋلارى جانە مەتابوليزمنىڭ – 40 (4,9%)
  • جاڭا وسكىندەر – 37 (4,5%)
  • نەسەپ-جىنىس جۇيەسنىڭ اۋرۋلارى – 26 (3,2%)
  • اس قورىتۋ اعزاسى اۋرۋلارى – 20 (2,5%)
  • جۇيكە جۇيەسىنىڭ اۋرۋلارى – 13 (1,6%)
  • جۇقپالى جانە پارازيتتىك اۋرۋلار – 11 (1,3%)
  • باسقا جاعدايلار – 19 (2,3%)

سونىمەن قوسا، وتكەن ايدا ەڭ كوبى قوستاناي وبلىسىندا 36, سقو-دا 33, شقو-دا 19 (بويىندا ۆيرۋس تابىلعان – QT) ادام قايتىس بولعان. 1 ناۋرىز بەن 30 قاراشا ارالىعىنداعى توعىز ايداعى جيىنتىق ەسەپپەن ءبىر شقو-دا 102, قوستانايدا 90, سقو-دا 88 جاعدايعا جەتكەن. ەڭ كەمى – اقتوبە (4), ماڭعىستاۋ (6) مەن اتىراۋ (6) وبلىستارىنا تيەسىلى.

پاندەميا جاريالانىپ، كارانتين قولعا الىنعان كوكتەمدە تورتەۋ، «ماۋسىم-شىلدە قىرعىنى» ورىن العان جازدا 600-گە جۋىق، كۇزدە 200-دەن استام ادام ومىردەن ءوتتى. جەلتوقسان ايىنىڭ ەسەبى كەلەسى ايدا بەلگىلى بولادى.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 153 مىڭنان، 1 تامىزدان بەرگى كوروناۆيرۋس پنەۆمونياسى 45 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 196 مىڭنان اسسا، ال ۇلتتىق ستاتيستيكادا 198,5 مىڭعا جەتكەن. سونداي-اق، پاندەميا باستالعالى جالپى ۆيرۋس جۇققانداردىڭ 3576-سى (كۆي+ / U07.1 – 2267, كۆي- / U07.2 – 493, ىلەسپە اۋرۋلاردان – 816) قايتىس بولعان. قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 49-شى ورىندا تۇر.

"The Qazaq Times"