Oral qalasınıñ mañındağı koronavirustan qaytıs bolğandardı jerleuge arnalğan oqşau zirat basında. 30 mausım 2020 jıl. Foto: tengrinews.kz

Densaulıq saqtau ministrliginiñ baspasöz qızmeti redakciya swrauı boyınşa 1 naurız ben 30 qaraşa aralığında koronavirustıñ janama äserinen 816 adam qaytıs bolğanın habarladı.

Bilik atalğan sanattağı pacientten PTR testi arqılı koronavirus anıqtalğanına qaramastan, «basqa aurulardıñ sebebinen qaytıs bolğanın» alğa tarta otırıp ortaq esepke qospaydı. Vedomstvo bwl indikatorğa tiesili derekti twraqtı türde emes, tilşilerdiñ swrauımen ğana jariyalaydı.

Ministrlik olardıñ ölimin «basqa dertterden boldı, koronavirus tikeley äser etpeydi» dep sanaydı. Jauaptı mamandar bwl jaylı sirek söz etedi, onıñ özinde jurnalisterdiñ swrauımen. Aqparat avtomattandırılmağan. 18 mausım 54 jağday, 2 şilde 101, 23 şilde 319, 11 qırküyek 576,15 qazan 672, 9 qaraşa 709, 15 jeltoqsan 764, 26 jeltoqsan 816 jağday bolğanı aytıldı.

Aqparat jañarmağalı bir aydan astam uaqıt ötti. Redakciya jurnalisi vice-ministr Ğiniyatqızınıñ uädesin (qaraşa ayınıñ basında Ğiniyatqızı atalğan aqparattı ayına bir ret jariyalaudı jolğa qoyuğa uäde bergen – QT) eske salıp, qayta swrau joldadı. Der kezinde jauap bolmağasın ötken särsenbide bas sanitar-däriger Erlan Qiyasovqa brifing barısında qoyıldı. Eşbir swrağımızğa jauap bere almağan ol mälimetti jazbaşa nwsqada joldauğa uäde etken. Baspasöz jiınınan keyin twşımdı aqparat berilmedi. Aqırı orındausız qalğan vice-ministrdiñ uädesi äri prezidenttiñ tapsırmasın redakciya tabandı türde talap etip jürip jauap aldı.

«Ministirlikke qarastı «Respublikalıq elektrondıq densaulıq saqtau ortalığı» ŞJQ RMK derekterine säykes, 2020 jıldıñ 1 naurızı men 30 qaraşasınıñ aralığında koronavirus infekciyası ilespe diagnozı bolğan 816 ölim jağdayı tirkeldi», – delingen resmi mälimette.

Qaraşada 107 ölim tirkelip, qayta kürt ösken. Onıñ 50-i tınıs alu organdarınıñ, 33-i qanaynalım jüyesi aurularınan.

Osı sanat boyınşa ömirden ötkenderdiñ deregi jalpı esepke engizilmeydi. Sarapşılar men mamandar bwğan qarsı. Mwnı «statistikanı meyilinşe jaqsartudıñ amalı» dep esepteydi. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı men tınıs alu jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtıradı. 816 keystiñ aurular tobı jiktelimin vedomstvo bılay taratadı:

  • Tınıs alu jüyesiniñ auruları – 382 (47%)
  • Qanaynalım jüyesiniñ auruları – 268 (32,8%)
  • Endokrindik jüyeniñ auruları jäne metabolizmniñ – 40 (4,9%)
  • Jaña öskinder – 37 (4,5%)
  • Nesep-jınıs jüyesniñ auruları – 26 (3,2%)
  • As qorıtu ağzası auruları – 20 (2,5%)
  • Jüyke jüyesiniñ auruları – 13 (1,6%)
  • Jwqpalı jäne parazittik aurular – 11 (1,3%)
  • Basqa jağdaylar – 19 (2,3%)

Sonımen qosa, ötken ayda eñ köbi Qostanay oblısında 36, SQO-da 33, ŞQO-da 19 (boyında virus tabılğan – QT) adam qaytıs bolğan. 1 naurız ben 30 qaraşa aralığındağı toğız aydağı jiıntıq eseppen bir ŞQO-da 102, Qostanayda 90, SQO-da 88 jağdayğa jetken. Eñ kemi – Aqtöbe (4), Mañğıstau (6) men Atırau (6) oblıstarına tiesili.

Pandemiya jariyalanıp, karantin qolğa alınğan köktemde törteu, «Mausım-şilde qırğını» orın alğan jazda 600-ge juıq, küzde 200-den astam adam ömirden ötti. Jeltoqsan ayınıñ esebi kelesi ayda belgili boladı.

13 naurızdan beri COVID-19 infekciyasın jwqtırğandar qatarı 153 mıñnan, 1 tamızdan bergi koronavirus pnevmoniyası 45 mıñnan asqan. DDSW mälimetinşe, Qazaqstanda auırğandardıñ sanı 196 mıñnan assa, al Wlttıq statistikada 198,5 mıñğa jetken. Sonday-aq, pandemiya bastalğalı jalpı virus jwqqandardıñ 3576-sı (KVI+ / U07.1 – 2267, KVI- / U07.2 – 493, ilespe aurulardan – 816) qaytıs bolğan. Qazaqstan virus taraluı boyınşa älemde Worldometers derekqorı jäne DDSW tiziminde 49-şı orında twr.

"The Qazaq Times"