ترامپ اسكەري بيۋدجەتكە ۆەتو قويدى

اقش پرەزيدەنتى دونالد ترامپ كونگرەس ماقۇلداعان اسكەري بيۋدجەت جوباسىنا ۆەتو قويدى.

زاڭ شىعارۋشى ورگاننىڭ تومەنگى پالاتاسىنا جولدانعان حابارلامادا: «مەن 2021 جىلعا ارنالعان اسكەري بيۋدجەت جوباسىن ماقۇلدامايمىن. اسكەري بيۋدجەت قۇجاتىنىڭ امەريكا قاۋىپسىزدىگى ءۇشىن ماڭىزى جوعارى. وكىنىشكە وراي، قۇجات ۇلتتىق قاۋىپسىزدىكتىڭ ماڭىزدى ەرەجەلەرىن قامتىمايدى. قۇجاتتاعى كوپتەگەن ەرەجەلەر اقش-تىڭ ۇلتتىق قاۋىپسىزدىك پەن سىرتقى ساياساتىنا قايشى كەلەدى. بۇل – قىتاي مەن رەسەيگە سىيلىق»، – دەلىنگەن.

پرەزيدەنت 1996 جىلعى «بايلانىس ەتيكاسى تۋرالى» زاڭنىڭ 230-ءبولىمىن جويۋدى دا تالاپ ەتىپ وتىر. ترامپتىڭ ايتۋىشا، «230-ءبولىم جەلىدە شەتەلدىك جالعان اقپاراتتىڭ تارالۋىنا ىقپال ەتەدى. ال بۇل ۇلتتىق قاۋىپسىزدىك پەن سايلاۋدىڭ ادالدىعىنا ۇلكەن قاۋىپ توندىرەدى».

قۇجاتتىڭ بۇعاتتالۋىنا تاعى ءبىر سەبەپ – ازاماتتىق سوعىس كەزەڭىندەگى (1861-1865) كونفەدەراتيۆتى شتاتتارداعى ارداگەرلەردىڭ ەسىمىن اسكەري نىساندارعا بەرۋ جانە وڭتۇستىكتەگى قۇلدىق تۋرالى دەرەكتەردى جويۋ. وسى ەكى تارماققا بايلانىستى ترامپ: «ساياسي ارەكەتتەر ارقىلى تاريحتى جوققا شىعارۋعا جول بەرمەيمىن»، – دەگەن.

اق ءۇي باسشىسى، سونىمەن قاتار، اۋعانستانداعى، كورەيا رەسپۋبليكاسىنداعى جانە گەرمانياداعى اقش اسكەرلەرىن ازايتۋ تۋرالى تارماقتى دا قۇپتامايدى. «كوپتەگەن ەرەجەلەر مەنىڭ اكىمشىلىگىمنىڭ سىرتقى ساياساتىنا، اتاپ ايتقاندا ساربازداردى ەلگە قايتارۋ ارەكەتتەرىنە تىكەلەي قايشى كەلەدى»، – دەدى ترامپ.

"The Qazaq Times"