اقش-رەسەي كونفليكتى: باس كونسۋلدىقتاردىڭ جابىلۋى جانە كيبەرشابۋىل

Associated Press مالىمەتىنشە، دونالد ترامپ اكىمشىلىگى كونگرەستە اقش-تىڭ رەسەيدەگى ەكى باس كونسۋلدىعىن جابۋ تۋرالى ءسوز قوزعادى. الداعى كۇندەرى ۆلاديۆوستوك پەن ەكاتەرينبۋرگتەگى كونسۋلدىقتار جابىلۋى مۇمكىن. بۇل – امەريكانىڭ رەسەيدەگى سوڭعى ەكى كونسۋلدىعى. سانكت-پەتەربۋرگتە ورنالاسقان عيمارات 2018 جىلى جابىلعان.

كونسۋلدىقتاردى جابۋ تۋرالى اقپاراتتان كەيىن 3 كۇن وتكەن سوڭ، اقش تاريحىنداعى ەڭ ءىرى كيبەرشابۋىل – Sunburst ورىن الدى. ساراپشىلاردىڭ پايىمداۋىنشا، قاۋىپتى كيبەرشابۋىل رەسەي تاراپىنان جاسالعان. مەملەكەتتىك حاتشى مايك پومپەو مەن سەناتورلار دا كرەملدى ايىپتاپ، قاتاڭ شارا قولداناتىنىن حابارلادى.

وتكەن اپتادا اقش مەملەكەتتىك دەپارتامەنتى زاڭ شىعارۋشىلارعا ۆلاديۆوستوكتاعى كونسۋلدىقتى ءبىرجولا جاۋىپ، ەكاتەرينبۋرگتەگى كونسۋلدىقتىڭ جۇمىسىن ۋاقىتشا توقتاتۋ كەرەكتىگىن ايتقان. رەسمي قۇجات 10 جەلتوقساندا اقش كونگرەسىنە جىبەرىلگەن.

حابارلامادا كونسۋلدىقتاردىڭ جابىلۋى رەسەي بيلىگىنىڭ 2017 جىلى ەلدە جۇمىس ىستەۋگە رۇقسات ەتىلگەن امەريكالىق ديپلوماتتار سانىنا ەنگىزگەن شەكتەۋلەرىمەن بايلانىستى ەكەندىگى ايتىلعان. سونىمەن قاتارب بۇل قادامدار «رەسەيدىڭ 2017 جىلى قىزمەتكەرلەردى شەكتەۋگە جانە ناتيجەسىندە ديپلوماتيالىق ۆيزالاردىڭ توقتاپ قالۋىنا بايلانىستى رەسەيدەگى اقش وكىلدىكتەرىنىڭ كادرلىق پروبلەمالارىن» جاۋاپ دەلىنگەن.

ديپلوماتيالىق قاقتىعىس

2016 جىلدىڭ جەلتوقسانىندا ماسكەۋ مەن ۆاشينگتون اراسىندا ديپلوماتيالىق قاقتىعىس باستالدى. سول كەزدەگى پرەزيدەنت باراك وباما 35 رەسەيلىك ديپلوماتتى جانە ولاردىڭ وتباسى مۇشەلەرىن اقش-تان شىعارۋ تۋرالى شەشىم قابىلدادى.

2017 جىلدىڭ شىلدەسىندە رەسەي اقش-تان ديپلوماتيالىق ميسسيا قىزمەتكەرلەرىنىڭ سانىن 755 ادامنان 455 ادامعا دەيىن قىسقارتۋدى، ال ۆاشينگتون سان-فرانتسيسكوداعى رەسەي كونسۋلدىعىن جابۋدى تالاپ ەتتى.

2018 جىلى ناۋرىزدا 60 رەسەيلىك ديپلوماتتار قۋىلىپ، سكريپالدىڭ ۋلانۋىنا بايلانىستى سيەتتلدەگى رەسەي كونسۋلدىعى جابىلدى.

كرەمل وكىلى دميتري پەسكوۆتىڭ مالىمدەۋىنشە، ەكاتەرينبۋرگ پەن ۆلاديۆوستوكتاعى اقش باس كونسۋلدىقتارىنىڭ جابىلۋى رەسەي-امەريكا قاتىناستارىنا ەشقانداي اسەر ەتپەيدى. بۇل شارا «كوروناۆيرۋستىڭ كەڭ تارالۋىنا بايلانىستى بولۋى دا مۇمكىن». پەسكوۆ: «كونسۋلدىقتاردىڭ نەگىزگى قىزمەتى – كونسۋلدىق جانە ۆيزالىق قىزمەتتەر كورسەتۋ. سوندىقتان ديپلوماتيالىق بايلانىسقا سونشالىقتى اسەرى جوق»، – دەيدى.

الايدا ترامپتىڭ رەسەيدەگى كونسۋلدىقتاردى جابۋ تۋرالى مالىمدەمەسىنەن كەيىن امەريكادا ورىن العان ءىرى كيبەرشابۋىل رەسەي تاراپىنان ماقساتتى تۇردە جاسالدى دەگەن گيپوتەزا بار.

21 جەلتوقساندا اقش ۇلتتىق بارلاۋ دەپارتامەنتى، فبر، ينفراقۇرىلىمدىق جانە كيبەرقاۋىپسىزدىك اگەنتتىگى فەدەرالدى ۇكىمەتتىڭ كومپيۋتەرلىك جەلىلەرىنە قاتتى شابۋىل جاساعانىن حابارلاعان. مەملەكەتتىك حاتشى مايك پومپەو دا كيبەرشابۋىلدارعا ماسكەۋدىڭ قاتىسى بار ەكەنىن ايتتى. ال پرەزيدەنت دونالد ترامپ بۇل جاعدايعا قىتايدىڭ قاتىسى بولۋى دا مۇمكىن دەيدى. وسىعان بايلانىستى اقش سەناتورلارى مەملەكەتتىك ورگاندارعا جاسالعان كيبەرشابۋىلعا بايلانىستى ۋاشينگتوننان ماسكەۋگە قارسى شارا قابىلداۋدى تالاپ ەتتى.

"The Qazaq Times"