جسدپ جالاۋى. فوتو: osdp.kz

2007 جىلى تىركەلگەن جالپىۇلتتىق سوتسيال دەموكراتيالىق پارتياسى الداعى ءماجىلىس جانە ءماسليحات سايلاۋىنا بويكوت جاريالاۋعا شەشىم قابىلدادى. وسىلايشا ءماجىلىس سايلاۋىنا بەس پارتيا قاتىساتىن بولدى. جەتىنشى سايلانىمداعى دەپۋتاتتار ەسكى پارتيالاردان سايلانباق.  

بۇگىنگى جيىن 13 قاراشادا ءوتۋى ءتيىس بولعان. الايدا پارتيا توراعاسى اسحات راحىمجانوۆتىڭ باستاماسىمەن XVI سەز جۇما، قاراشانىڭ 27-سىنە اۋىستىرىلعان.

22 قازان راحىمجانوۆ «سايلاۋ ارقىلى مەملەكەتتى باسقارۋ قۇقىعى جۇزەگە اسىرىلادى، سوندىقتان كەز-كەلگەن ساياسي پارتيالار سياقتى جسدپ دا بۇل پروتسەستەرگە قاتىسۋى كەرەك» دەگەنىنە قاراماستان، شەشىم كۇرت وزگەردى.

رەسمي تىركەلگەن التى پارتيانىڭ اراسىنداعى «جالعىز وتكىر وپپوزيتسيامىز» دەپ سانايتىن جسدپ جەتەكشىسى راحىمجانوۆ استانا تورىندەگى جيىندا كوكتەمدە وزگەرگەن سايلاۋ تۋرالى زاڭنان ساياسي احۋال جاقسارماعانىن العا تارتىپ، بويكوت جاريالاۋعا شاقىردى. ءتىپتى باقىلاۋدان دا باس تارتۋعان ۇندەدى.

ءسوز العان سپيكەرلەردىڭ قاتارىندا پارتيا توراعاسىنىڭ ورىنباسارى تالعات اليەۆ، پرەزيديۋم مۇشەسى، ەكونوميست ايدار الىباەۆ، الماتى قالالىق فيليالىنىڭ توراعاسى تازابەك سامبەتباي «ءۇمىتسىز سايلاۋعا قاتىسپاعان ءجون» دەپ ۇگىتتەپ باقتى. سەزدە پارتيانىڭ سايلاۋعا ءۇش مارتە (2007, 2012 جانە 2016 جىلدارى) قاتىسسا دا ەشقانداي ناتيجە بەرمەگەنى ايتىلدى. 100 مىڭنان استام مۇشەسى بار دەلىنەتىن پارتيا بىلتىرعى پرەزيدەنت سايلاۋىنا دا بويكوت جاريالاعان.

ناتيجەسىندە دەلەگاتتاردىڭ 5-ەۋى قالىس قالىپ، 32-ءسى بويكوت دەسىپ، 3-ەۋى قارسى داۋىس بەردى. باسىم داۋىستىڭ ەسەبىنەن كەلەسى جىلعى 10 قاڭتارعا بەلگىلەنگەن پارلامەنت ءماجىلىسى مەن ءماسليحاتتار سايلاۋىنا قاتىسپاۋعا شەشىم شىعارىلدى.

بۇعان دەيىن، وتكەن اپتادا فرانتسيادا تۇراتىن، قازاقستان بيلىگىنىڭ قۋىعىنىنداعى وپپوزيتسيالىق ساياساتكەر مۇحتار ءابليازوۆ جاقتاستارىن جسدپ-عا وتۋگە، داۋىس بەرۋگە شاقىرعان. ول وسى ارقىلى بيلىك ارەكەتىن اشكەرەلەۋدى كوزدەيتىنىن مالىمدەگەن. پارتيا باسشىسى بۇعان 18 قاراشا كۇنى «ارانداتۋ» دەپ باعا بەرگەن.

استانا سوتىنىڭ شەشىمىمەن «ەكسترەميستىك» دەپ تانىلعان «قازاقستاننىڭ دەموكراتيالىق تاڭداۋى» قوزعالىسىن ەۋروپارلامەنت «بەيبىت وپپوزيتسيالىق قوزعالىس» دەپ اتاعان. قۇقىق قورعاۋشىلار قدت-عا قاتىستى شىققان سوت ۇكىمدەرىنىڭ  قيسىندى ەكەنىنە كۇمان كەلتىرەدى. وسىعان دەيىن ەلدە «قدت-مەن بايلانىسى ءۇشىن» ونداعان بەلسەندى قىلمىستىق جاۋاپكەرشىلىككە تارتىلعان.

“The Qazaq Times”