سۋرەتتە: باراك وباما، دونالد ترامپ، دجو بايدەن. فوتو: https://cdn

اقش-تاعى پرەزيدەنتتىك بيلىكتىڭ دونالد ترامپتان دەموكرات دجو بايدەنگە ءوتۋ پروتسەسى باستالدى. اق ءۇي بارلاۋ قىزمەتىنىڭ قۇپيا ەسەبىن بايدەنگە بەرۋدى ماقۇلدادى.

وسىعان بايلانىستى سايلاۋدا جەڭىسكە جەتكەن دجو بايدەن ءوزىنىڭ اكىمشىلىگىندەگى ديپلوماتيا جانە قاۋىپسىزدىك كانديداتتاردى تانىستىردى. ولاردىڭ قاتارىندا بولاشاق مەملەكەتتىك حاتشى ەنتوني بلينكەن مەن ۇلتتىق قاۋىپسىزدىك جونىندەگى پرەزيدەنت كەڭەسشىسى دجەيك سالليۆان بار. ولار ەندى قاڭتاردا بايدەن انت بەرگەن ساتتەن كەيىن قىزمەتىنە كىرىسەدى. سونىمەن قاتار بايدەن اۆريل حەينستى – ۇلتتىق بارلاۋ قىزمەتىنىڭ ديرەكتورى، الەحاندرو مايوركاستى – ىشكى قاۋىپسىزدىك ءمينيسترى، ليندا توماس-گرينفيلدتى – اقش-تىڭ بۇۇ-داعى ەلشىسى، دجەيك سالليۆاندى ۇلتتىق قاۋىپسىزدىك بويىنشا كەڭەسشى ەتۋدى جوسپارلاپ وتىر.

دجو بايدەن مالىمدەمەسىندە: «اقش-تىڭ ۇلتتىق قاۋىپسىزدىگى مەن دامۋىنا جاۋاپتى جاڭا كابينەت مۇشەلەرىمەن تانىس بولىڭىزدار. بۇل ازاماتتار مەنىڭ ويعا العان ماقساتتارىمدى جۇزەگە اسىرۋعا كومەكتەسەتىنىنە سەنىمدىمىن. اقش-تىڭ مەملەكەتتىك حاتشىسى لاۋازىمىنا انتوني بلينكەندى تاڭدايمىن. ال ۇلتتىق قاۋىپسىزدىك حاتشىسى رەتىندە الەحاندرو مايوركاستى كورگىم كەلەدى. بۇل – وتە جاۋاپتى قىزمەت. ال ۇلتتىق بارلاۋ قىزمەتىنىڭ ديرەكتورى العاش رەت ايەل بولادى. ول جۇمىستى اۆريل حاينەس اتقارادى»، – دەدى.

كەشە قازىرگى پرەزيدەنت دونالد ترامپ بيلىك ءترانزيتىن باستاۋ تۋرالى شەشىم قابىلدادى. اقش-تىڭ بيلىك الماسۋ كەزىندەگى قىزمەتتەردى ۇيلەستىرەتىن جالپى قىزمەتتەر اگەنتتىگى (GSA) دەگەن قۇزىرەتتى ورگانى كەشە مالىمدەمە جاساپ، بايدەن كومانداسى بيلىكتى وتەرىپ الۋ پروتسەدۋراسىن باستاۋ ءۇشىن قاجەتتى رەسۋرستار مەن قىزمەتتەرگە قول جەتكىزە الاتىنىن حابارلادى. سونداي-اق، پرەزيدەنت ترامپ اتالعان ورگانعا ءوز جۇمىسىن اتقارۋعا تاپسىرما دا بەرگەن. وسىدان كەيىن بايدەن پرەزيدەنتتىڭ قاۋىپسىزدىك جانە بارلاۋ جونىندەگى كۇندەلىكتى بريفينگتەرىنە، سونداي-اق نەگىزگى شەنەۋنىكتەرگە بۇيرىق بەرۋ قۇقىعىنا يە بولدى.

"The Qazaq Times"