Surette: Barak Obama, Donal'd Tramp, Djo Bayden. Foto: https://cdn

AQŞ-tağı prezidenttik biliktiñ Donal'd Tramptan demokrat Djo Baydenge ötu procesi bastaldı. Aq üy barlau qızmetiniñ qwpiya esebin Baydenge berudi maqwldadı.

Osığan baylanıstı saylauda jeñiske jetken Djo Bayden öziniñ äkimşiligindegi diplomatiya jäne qauipsizdik kandidattardı tanıstırdı. Olardıñ qatarında bolaşaq memlekettik hatşı Entoni Blinken men wlttıq qauipsizdik jönindegi prezident keñesşisi Djeyk Sallivan bar. Olar endi qañtarda Bayden ant bergen sätten keyin qızmetine kirisedi. Sonımen qatar Bayden Avril Heynsti – wlttıq barlau qızmetiniñ direktorı, Alehandro Mayorkastı – işki qauipsizdik ministri, Linda Tomas-Grinfildti – AQŞ-tıñ BWW-dağı elşisi, Djeyk Sallivandı wlttıq qauipsizdik boyınşa keñesşi etudi josparlap otır.

Djo Bayden mälimdemesinde: «AQŞ-tıñ wlttıq qauipsizdigi men damuına jauaptı jaña kabinet müşelerimen tanıs bolıñızdar. Bwl azamattar meniñ oyğa alğan maqsattarımdı jüzege asıruğa kömektesetinine senimdimin. AQŞ-tıñ memlekettik hatşısı lauazımına Antoni Blinkendi tañdaymın. Al Wlttıq qauipsizdik hatşısı retinde Alehandro Mayorkastı körgim keledi. Bwl – öte jauaptı qızmet. Al Wlttıq barlau qızmetiniñ direktorı alğaş ret äyel boladı. Ol jwmıstı Avril Haynes atqaradı», – dedi.

Keşe qazirgi prezident Donal'd Tramp bilik tranzitin bastau turalı şeşim qabıldadı. AQŞ-tıñ bilik almasu kezindegi qızmetterdi üylestiretin Jalpı qızmetter agenttigi (GSA) degen qwziretti organı keşe mälimdeme jasap, Bayden komandası bilikti öterip alu procedurasın bastau üşin qajetti resurstar men qızmetterge qol jetkize alatının habarladı. Sonday-aq, prezident Tramp atalğan organğa öz jwmısın atqaruğa tapsırma da bergen. Osıdan keyin Bayden prezidenttiñ qauipsizdik jäne barlau jönindegi kündelikti brifingterine, sonday-aq negizgi şeneunikterge bwyrıq beru qwqığına ie boldı.

"The Qazaq Times"