فوتو: ار

شۆەتسيا بيلىگى كوروناۆيرۋسپەن كۇرەستە «شۆەد مودەلىنىڭ» تيىمسىزدىگىن مويىنداپ، شەكتەۋ شارالارىن قاتاڭداتا باستادى. باستاپقىدا شۆەتسيا كارانتيندى كۇشەيتپەي ۇجىمدىق يممۋنيتەت قالىپتاستىرۋدى ماقسات ەتكەنمەن، ىندەت ءورشي تۇسكەن.

قازىر مۇندا كىسى ءولىمىنىڭ ءۇش نەگىزگى سەبەبىنىڭ قاتارىنا  جۇرەك جانە قان-تامىرلارى اۋرۋلارى مەن قاتەرلى ىسىكتەن كەيىن كوروناۆيرۋس كىرىپ وتىر. قاتاڭ شەكتەۋلەر بويىنشا ەندى قوعامدىق ورىنداردا بۇرىنعىداي 50 ادام ەمەس، 8 ادامنان ارتىق جينالۋعا بولمايدى. بۇل ەرەجەنىڭ جەرلەۋ راسىمىنە قاتىسى جوق. وندا 20 ادامعا دەيىن جينالۋعا رۇقسات بەرىلەدى. تۇنگى 22:00-دەن كەيىن مەيرامحانالار مەن بارلاردا ىشىمدىك ساتۋعا بولمايدى. بۇل شارا كەلەر جىلدىڭ ناۋرىزىنا دەيىن كۇشىن جويمايدى. ەل استاناسى ستوكگولم مەن ءۇشىنشى ءىرى قالا مالميودە جىل سوڭىنا دەيىن مۇراجايلار، سپورتتىق زالدار مەن باسسەيندەر جۇمىس ىستەمەيدى.

وسىعان بايلانىستى مالىمدەمە جاساعان ەل پرەمەر-ءمينيسترى ستەفان ليوۆەن: «ادامداردىڭ ءومىرى مەن دەنساۋلىعىنا تونگەن قاۋىپ كۇن ساناپ كۇشەيىپ، كوروناۆيرۋستى جۇقتىرعاندار سانى ارتىپ بارادى. جانساقتاۋ بولىمىنە تۇسكەندەر دە كوپ. كىسى ءولىمىنىڭ كورسەتكىشتەرى دە كوڭىل كونشىتپەيدى. ءسىز ىندەتتىڭ جەڭىل فورماسىمەن اۋىردىڭىز، بىراق اۆتوبۋستا، مەيرامحانادا نەمەسە دۇكەندە باسقاعا جۇقتىردىڭىز دەلىك. ال ول قارت ادام بولۋى مۇمكىن. قاريالاردىڭ قاتتى اۋىراتىنىن بىلەمىز. سوندىقتان ساقتىققا سالعىرت قاراماي، جاۋاپكەرشىلىك تانىتايىق»، – دەدى.

العاش COVID-19 دەرەگى تىركەلگەن مەملەكەتتەر جاپپاي توتەنشە جاعداي ەنگىزىپ، قاۋىپسىزدىك شارالارىن كۇشەيتتى. ال شۆەتسيا بيلىگى كوروناۆيرۋستى جەڭۋدىڭ جالعىز جولى – ۇجىمدىق يمممۋنيتەت قالىپتاستىرۋ دەگەن. ياعني ىندەتتى مەيلىنشە كوپ حالىق جۇقتىرىپ، جازىلىپ شىعۋى كەرەك.

وسىلايشا ناۋرىزدا ەۋروپادا ۆيرۋستى جەڭۋ جولىندا ەكى باعىت قالىپتاستى: قاتاڭ كارانتين جانە ۇجىمدىق يممۋنيتەت. ەكىنشى باعىتتى ۇلىبريتانيا مەن شۆەتسيا بيلىگى تاڭداعان. بىراق تەز دەندەگەن ۆيرۋستى جەڭۋ قيىن بولعاندىقتان، ۇلىبريتانيا ەكىنشى باعىتتان باس تارتىپ، ەلدە توتەنشە جاعداي ەنگىزدى. ال شۆەتسيا باستاپقى ستسەناريگە ءۇمىت ارتتى.

ءتورت ايعا جۋىق ۋاقىتتا شۆەتسيادا قوعامدىق كولىك قوزعالىسىنا شەكتەۋ قويىلعان جوق، مەكتەپتەر مەن بالاباقشالار قالىپتى جۇمىستى جالعاستىردى. شۆەتسيا ۇكىمەتى ءدال وسىنداي ءتاسىل دەنساۋلىق ساقتاۋ سالاسىنا اۋىرتپالىق اكەلمەيتىنىن ايتتى. شۆەد دارىگەرلەرى تۇرعىنداردا ۆيرۋسقا توزىمدىلىك قالىپتاسادى دەپ بولجادى. الايدا ۇجىمدىق يممۋنيتەت پايدا بولعان جوق.

"The Qazaq Times"