فوتو: اشىق دەرەككوز

شۆەتسيا قوعامدىق دەنساۋلىق ساقتاۋ اگەنتتىگى كوروناۆيرۋستىڭ تارالۋ قاۋپىنىڭ ارتۋىنا بايلانىستى 3 ءتۇرلى ستسەناري ۇسىندى. قۇجات گيپوتەزاعا نەگىزدەلگەن.

ءبىرىنشى بولجالدى ستسەناري: ۆيرۋس كۇز بەن جاڭا جىلدا قايتا ءورشىپ، 5 مىڭ تۇرعىن قايتىس بولۋى مۇمكىن.

ەكىنشى بولجالدى ستسەناري: ەگەر شۆەتسيادا كوروناۆيرۋس جۇقتىرعاندار سانىنىڭ ازايۋى ساقتالسا، اتالعان ۋاقىت ارالىعىندا ىندەتتەن 2500 ادام قايتىس بولادى.

ءۇشىنشى بولجالدى ستسەناري: احۋال ەلدىڭ بارلىق ايماعىندا ۋشىعىپ، قۇرباندار سانى 7 مىڭنان اسۋى مۇمكىن.

رەسمي مالىمەتتەر بويىنشا، شۆەتسيادا كوروناۆيرۋس جۇقتىرعاندار سانى 78 مىڭنان اسىپ، 5600 ناۋقاس كوز جۇمعان. دەنساۋلىق ساقتاۋ اگەنتتىگى ۇسىنعان قۇجات كەلەسى جىلدىڭ 1 قىركۇيەگىنە دەيىن ساقتالادى. قازىرگى ۋاقىتتا تۇرعىندارعا ماسكا تاعۋ مىندەتتەلمەگەن، تەك قوعامدىق ورىنداردا اراقاشىقتىق ساقتاۋ تالابى بار.

بۇعان دەيىن سايتىمىزدا «كوروناۆيرۋس جانە الەم: شۆەد مودەلىنىڭ كۇنگەيى مەن كولەڭكەسى» تاقىرىبىندا ساراپتاما جاريالاعان بولاتىنبىز. كوروناۆيرۋستىق ينفەكتسيامەن كۇرەستە شۆەد بيلىگى وزگە ءتاسىل تاڭدادى: ۇجىمدىق يممۋنيتەت قالىپتاستىرۋ ماقساتىندا ەلدە كارانتين ەنگىزگەن جوق، تۇرعىندار اراسىندا قالىپتى ءومىر ءسۇرۋ فورماسى ساقتالدى. دەگەنمەن شۆەتسيانىڭ باس ەپيدەميولوگى اندەرس تەگنەلل ۇسىنعان بۇل تۇجىرىم ىندەتپەن كۇرەستە ايتارلىقتاي ناتيجە كورسەتكەن جوق. كەرىسىنشە، ءولىم-ءجىتىم سانى بويىنشا شۆەتسيا الەمدىك انتيرەكورد ورناتقان ەلدەر تىزىمىندە كوش باستادى.

پاندەميامەن كۇرەستە شۆەتسيا مەن الەمنىڭ وزگە ەلدەرى ەكىگە بولىنگەن. COVID-19 دەرەگى العاش تىركەلگەن مەملەكەتتەر جاپپاي توتەنشە جاعداي ەنگىزىپ، قاۋىپسىزدىك شارالارىن كۇشەيتتى. ال شۆەتسيا كوروناۆيرۋستى جەڭۋدىڭ جالعىز جولى – ۇجىمدىق يمممۋنيتەت قالىپتاستىرۋ ەكەنىن ايتتى.

"The Qazaq Times"