يلليۋستراتسيا: Aïda Amer/Axios

اقش پرەزيدەنتى دونالد ترامپتىڭ اكىمشىلىگى الداعى اپتالاردا قىتايعا قاتىستى بىرقاتار قاتاڭ شارالار قابىلداۋعا نيەتتى. بۇل تۋرالى Axios اقپاراتتىق پورتالى حابارلادى.

ترامپ بەيجىڭگە قارسى وسىنداي قاتاڭ شارالار قابىلداپ جاتقاندىقتان، پرەزيدەنتتىك سايلاۋعا قاتىسقان دەموكرات دجو بايدەن ءۇشىن قحر-عا قاتىستى قازىرگى باعىتتى وزگەرتۋ «ساياسي تۇرعىدان قولايسىز». قازىر اق ءۇي قحر قارۋلى كۇشتەرىمەن بايلانىسى بار قىتايلىق كومپانيالاردىڭ ءتىزىمىن ەسەلەگەن.

سونىمەن، ۋاشينگتون اكىمشىلىگى شىڭجاڭ-ۇيعىر اۆتونوميالىق اۋدانىندا جانە گونكونگتا ادام قۇقىقتارىن بۇزۋعا قاتىسقانى ءۇشىن نەمەسە اقش-تىڭ ۇلتتىق قاۋىپسىزدىگىنە قاۋىپ توندىرگەن قىتاي كومپانيالارى، مەملەكەتتىك قۇرىلىمدار مەن لاۋازىمدى تۇلعالارعا سانكتسيالار ەنگىزۋدى جوسپارلاپ وتىر. مۇنىمەن قاتار، ترامپ اكىمشىلىگى تايۋانمەن بايلانىستاردى قاراپ، اقش-تاعى قىتاي باس كونسۋلدىقتارىنىڭ جابىلۋن قاراستىرىپ جاتىر.

«ەگەر بەيجىڭ ءوز باعىتىن وزگەرتپەسە، اق ءۇي ترامپ ساياساتىن جالعاستىرادى. كەلەسى پرەزيدەنتتىككە بايدان تاعايىندالسا دا، قىتايعا قارسى باعىتتى ۇستانۋى كەرەك»، – دەيدى اق ءۇيدىڭ ۇلتتىق قاۋىپسىزدىك كەڭەسىنىڭ ءباسپاسوز قىزمەتىنىڭ جەتەكشىسى دجون ەلليوت. ال اقش ۇلتتىق بارلاۋ قىزمەتىنىڭ ديرەكتورى دجون راتكليفتىڭ حابارلاۋىنشا، جاقىن ارادا بەيجىڭگە قاتىستى تاعى ءبىر ايىپ تاعىلادى.

وتكەن اپتادا ترامپ «قىتاي قارۋلى كۇشتەرىمەن بايلانىسى بار قىتايلىق كومپانيالارعا بولىنەتىن اقش ينۆەستيتسيالارىنا تىيىم سالۋ تۋرالى» جارلىققا قول قويدى. جارلىققا سايكەس، 2021 جىلدىڭ 11 قاڭتارىنان باستاپ امەريكالىق جەكە جانە زاڭدى تۇلعالارعا جوعارىدا اتالعان تىزىمگە ەنگەن قىتاي كومپانيالارىمەن بايلانىس ورناتۋعا تىيىم سالىنادى.

وسى ماسەلەگە قاتىستى مالىمدەمە جاساعان قحر ءسىم رەسمي وكىلى ۆان ۆەنبين: «اقش ۇكىمەتى قىتاي كومپانيالارىنا قىسىم جاساپ وتىر. بۇل نارىقتىق باسەكەلەستىك پەن حالىقارالىق ساۋدا ەرەجەلەرىن ايتارلىقتاي بۇزادى، ەكى ەل اراسىنداعى ىسكەرلىك جانە ينۆەستيتسيالىق ىنتىماقتاستىققا ايتارلىقتاي نۇقسان كەلتىرەدى»، – دەيدى.

"The Qazaq Times"