تاۋلى قاراباق سوعىسىن توقتاتۋ كەلىسىمىنە ءازىربايجان حالقى جەڭىس قاتارىندا قۋاندى، ارمەنيا تارابىندا نارازىلىقتان مىڭداعان ادام ۇكىمەت ءۇيىن تالقاندادى. قاراباق شاعىن بولعانىمەن، وعان مۇددەلەس وڭىرلىك دەرجاۆالاردىڭ مۇددەسى باتپانداي. سوندىقتان بۇل كەلىسىمدە تەك باكۋ مەن ەرەۆان مۇددەسى عانا قاراستىرىلماعانى انىق.

سونداي ويدى ايتقان تاۋلى قاراباق بويىنشا باتىستىڭ بەلگىلى ەكسپەرتى توم دە باال بولدى، ول قاراباق كەلىسىمىندە ءازىربايجان مەن ارمەنيانىڭ مۇددەسى ەمەس، رەسەي مەن تۇركيا مۇددەسى قاناعاتتاندىرىلدى دەگەن The New York Times باسىلىمىنا بەرگەن پىكىرىندە. ول بىلاي تاراتادى: بىلاي قاراعاندا ءازىربايجان ۇتتى، ارمەنيا ۇتىلدى، تۇركيادا كاسپيگە شىعاتىن ءدالىز الىپ، ءوز مۇددەسىن قاناعاتتاندىردى. كوبىرەك ۇتقان رەسەي بولدى، ول ءوزىنىڭ ىقپالدى بولا الماي تۇرعان تاۋلى قاراباق وڭىرىنە اسكەرلەرىن ورنالاستىرۋعا مۇمكىندىك الدى.

راسىندا رەسەي بۇرىنعى كەڭەس وداعىنان شىققان وڭىرلەردەگى داۋ-دامايلاردىڭ كوبىندە ءوزىنىڭ باقىلاۋىنا الىپ كەلدى، تەك وسى تاۋلى قاراباقتا عانا اسكەري ارالاسۋعا مۇمكىندىگى بولماي كەلىپ ەدى. ەندى 20 ۇشاعىمەن بارىپ تۇسكەن ەكى مىڭعا جۋىق اسكەرى، جۇزدەگەن اسكەري تەحنيكاسىمە وڭتۇستىك كاۆكازدا ءوز ىقپالىن ءتىپتى دە كەڭەيتە الدى.

تاۋلى قاراباق سوعىسى 44 كۇنگە سوزىلدى. اتىس باستالعان ۋاقىتتاردا ساراپشىلار ەكى ەلدىڭ اسكەري قۋاتىن شامالاس دەپ باعالاپ جاتتى، بىراق، قاقتىعىس بارىسىندا ءازىربايجان ارمياسى باسىمدىق تانىتتى. شۋشا قالاسى ءازىربايجانداردىڭ قولىنا وتكەننەن كەيىن سوعىس ناتيجەسى دە بەلگىلى بولدى. بۇل شاھاردى ارميان جۋرناليستەرى «قاراباقتى جۇرەگى» نەمەسە «قاراباقتىڭ كىلتى» دەپ جازىپ جۇرگەن، ول قولدان كەتكەننەن كەيىن ارمەنيا كەلىسىمگە كەلمەۋگە امالسىز قالدى.

دە باالدىڭ ايتۋىنشا، تاۋلى قاراباق جانجالى ءبىرجولاتا شەشىم تاپپادى، ونداعى ءازىربايجاندار مەن ارميانداردىڭ جانجالسىز قاتار جاساۋى قيىن، بولماشى ماسەلەدەن قاقتىعىس قايتا تۋىنداۋى مۇمكىن. ال، ماسكەۋ مەن انكارا بۇعان باس قاتىرىپ جاتقان جوق دەپ قارايدى.

“The Qazaq Times”