اقش-تاعى پرەزيدەنت سايلاۋى. ونلاين

اقش-تا پرەزيدەنت پەن ۆيتسە-پرەزيدەنت سايلاۋى اياقتالۋعا جاقىن. بىرەر ۋاقىتتان كەيىن امەريكانىڭ 46-شى پرەزيدەنتى بەلگىلى بولماق. ءدال قازىر داۋىس سانىن ەسەپتەۋ جۇرگىزىلىپ جاتىر. رەسمي مالىمەت بويىنشا قوس كانديدات – رەسپۋبليكالىق پارتيا وكىلى دونالد ترامپ 145, ال دەموكرات دجوزەف بايدەن 223 داۋىس ناتيجە كورسەتىپ تۇر. ۇمىتكەر پرەزيدەنت بولۋ ءۇشىن سايلاۋشىلار القاسىنداعى 538 داۋىستىڭ كەمىندە 270-ءىن الۋى كەرەك.

امەريكالىقتار بۇگىن تەك اق ءۇي باسشىسىن عانا ەمەس، ۆيتسە-پرەزيدەنتتى، وكىلدەر پالاتاسىنىڭ بۇكىل 435 مۇشەسىن، 35 سەناتور جانە بىرنەشە شتات مەن ايماقتىڭ 13 باسشىسىن دا تاڭداۋى ءتيىس. دەگەنمەن الەم نازارى پرەزيدەنت سايلاۋىنا اۋىپ وتىر.

وسىعان دەيىن 97 ميلليون امەريكالىق مەرزىمىنەن بۇرىن داۋىس بەرگەن. بۇل – بۇرىن-سوڭدى بولماعان كورسەتكىش. جەرگىلىكتى زاڭ بويىنشا حالىق سانى 100-دەن از ەلدى مەكەندەرگە تۇنگى 00:00-دەن باستاپ داۋىس بەرۋگە بولادى. ءسويتىپ نيۋ-گەمپشير شتاتىنداعى ديكسۆيلل-نوتچ جانە ميللسفيلد جۇرتى ءوز تاڭداۋىن جاساپ ۇلگەرگەن. ءتىپتى داۋىس بەرۋ ناتجەلەرى دە سانالدى: ميللسفيلدتە 21 سايلاۋشىنىڭ 16-سى ترامپتى قولداسا، ديكسۆيلل-نوتچ ەلدى مەكەنىندە 5 داۋىس جيناعان دجو بايدەن جەڭىسكە جەتكەن.

Associated Press اگەنتتىگى سايلاۋ ناتيجەسى ءبىرشاما ايقىن دەلىنگەن شتاتتاردا ناقتى كىم جەڭەتىنىن بولجاي باستادى. ار اگەنتتىگىنىڭ مالىمەتىنشە، ماسكەۋ ۋاقىتىمەن تاڭعى ساعات 4-تە بايدەن 9 شتاتتا جەڭىسكە جەتكەن. ال ترامپ 7 شتاتتا باسىمدىققا يە بولعان.

پرەزيدەنتتىك سايلاۋدا ساراپشىلاردىڭ قورىتىندىسى بويىنشا قۇبىلمالى شتاتتاردىڭ سانى – 8. ولار: پەنسيلۆانيا، دجوردجيا، ۆيسكونسين، اريزونا، فلوريدا، سولتۇستىك-كارولينا، ميچيگان جانە ميننەسوتا. بۇل – ەڭ نەگىزگى جانە شەشۋشى شتاتتار. حالىقتىق ساۋالناما بويىنشا بايدەن الدا كەلەدى. ءتىپتى پەنسيلۆانيا، ميچيگان، اريزونا سياقتى قۇبىلمالى شتاتتاردىڭ تۇرعىندارى دا بايدەنىنڭ كانديداتۋراسىن قولداپ وتىر.

CNN-ءنىڭ زەرتەۋى بويىنشا بايدەن قازىردىڭ وزىندە ەلەكتورالدى كوللەدجدىڭ 279 داۋىسىن جيناپ وتىر. پرەزيدەنت اتانۋ ءۇشىن ونىڭ 270 جيناعانى دا جەتكىلىكتى. ال دونالد ترامپ بولسا، 20 شتاتتا كوش باستاپ كەلەدى. ەلەكتورالدى داۋىستاردىڭ سانى – 125. تەحاستى قوسساق، 163 داۋىس. دەگەنمەن بۇل تەك بەيرەسمي جانە الدىن الا جاسالىپ جاتقان اقپارات، قورىتىندى شەشىم ەمەس. بارلىعى 2016 جىلداعىداي سوڭعى ساتتە وزگەرىپ كەتۋى مۇمكىن.

مالىمەت

اقش پرەزيدەنتتىگىنە ءبىرىنشى ۇمىتكەر – رەسپۋبليكالىق پارتيانىڭ وكىلى دونالد ترامپ. رەسپۋبليكالىقتاردىڭ سوڭعى جىلدارداعى ۇستانىمى – سالىقتى ازايتۋ، قارۋدى ۇستاۋ قۇقىعىن قولداۋ جانە كوشى-قونعا قاتىستى قاتاڭ شەكتەۋلەر ەنگىزۋ. شالعاي وڭىرلەردە قولداۋشىلارى كوپ. رەسپۋبليكالىق ەكس-پرەزيدەنتتەردىڭ قاتارىندا رونالد رەيگان مەن دجوردج بۋش بار.

ەكىنشى ۇمىتكەر – دەموكرات دجو بايدەن. باراك وباما ەل باسشىسى بولعان كەزدە 8 جىل بويى ۆيتسە-پرەزيدەنت قىزمەتىن اتقارعان. ساياساتتاعى تاجىريبەسى 50 جىلعا جۋىقتايدى. دەموكراتتار پارتياسىنىڭ وكىلى. بۇل ساياسي ۇيىم ازاماتتىق قۇقىق، كوشى-قون جانە كليماتتىڭ وزگەرۋى سەكىلدى ماسەلەلەرگە دەگەن ليبەرالدىق كوزقاراسىمەن ەرەكشەلەنەدى. دەموكراتيالىق پارتيانىڭ ەكس-پرەزيدەنتتەرى قاتارىندا دجون كەننەدي، بيلل كلينتون مەن باراك وباما بار.

"The Qazaq Times"