اقش پرەزيدەنتتىگىنە ۇمىتكەرلەر. فوتو: ۆۆس

اقش-تاعى پرەزيدەنت سايلاۋىنا ساناۋلى ۋاقىت قالدى. الدىن الا ساۋالناما ناتيجەلەرى دەموكرات دجوزەف بايدەننىڭ جەڭىسىن بولجاپ وتىر. دەگەنمەن باستى تورەشى – ەرتەڭگى كۇن. سايلاۋدا جەڭىسكە جەتەتىنىنە تولىقتاي سەنىمدى اق ءۇي باسشىسى دونالد ترامپ ساۋالنامالاردىڭ «جالعان» ەكەنىن ايتتى.

ترامپ: «مەن جالعان ساۋالنامالاردى كوردىم. ءبىز ءبارىبىر جەڭىسكە جەتەمىز. شىنايى ساۋالناما بولسا، ءبىزدىڭ جەڭىسكە جەتەتىنىمىز ايتىلار ەدى. وسىدان ءتورت جىل بۇرىن حالىق امەريكانى دامىتقان اۋتسايدەرگە داۋىس بەردى. بۇل جولى دا ءبىز يۋەڭىسكە جەتەمىز»، – دەدى.

بۇعان دەيىن ۋاشينگتونداعى امەريكالىق ۋنيۆەرسيتەتتىڭ پروفەسسورى كەنديس نەلسون ترامپتىڭ بايدەننەن ارتتا قالۋىنا قاراماستان پرەزيدەنتتىك سايلاۋدا جەڭىسكە جەتۋ مۇمكىندىگى بار ەكەنىن ايتقان.

Real Clear Politics ساياسي جەلىلىك رەسۋرسىنىڭ سوڭعى مالىمەتتەرىنە سايكەس، بايدەن ترامپتان سايلاۋشىلار اراسىندا تانىمالدىعى بويىنشا ورتاشا ەسەپپەن 6,5% الدا كەلەدى. بۇگىنگە دەيىن 97 ملن بيۋللەتەن وتكىزىلگەن. ونىڭ 35 ميلليونى سايلاۋ ۋچاسكىلەرىندە جاسالعان داۋىستار بولسا، 62 ملن-عا جۋىعى پوشتامەن جاسالعان داۋىستار. بۇل – 2016 جىلعى بارلىق داۋىستاردىڭ ۇشتەن ەكى بولىگى جانە اقش تاريحىنداعى رەكوردتىڭ كورسەتكىش.

اقش پرەزيدەنتتىگىنە ءبىرىنشى ۇمىتكەر – رەسپۋبليكالىق پارتيانىڭ وكىلى دونالد ترامپ. رەسپۋبليكالىقتاردىڭ سوڭعى جىلدارداعى ۇستانىمى – سالىقتى ازايتۋ، قارۋدى ۇستاۋ قۇقىعىن قولداۋ جانە كوشى-قونعا قاتىستى قاتاڭ شەكتەۋلەر ەنگىزۋ. شالعاي وڭىرلەردە قولداۋشىلارى كوپ. رەسپۋبليكالىق ەكس-پرەزيدەنتتەردىڭ قاتارىندا رونالد رەيگان مەن دجوردج بۋش بار.

ەكىنشى ۇمىتكەر – دەموكرات دجو بايدەن. باراك وباما ەل باسشىسى بولعان كەزدە 8 جىل بويى ۆيتسە-پرەزيدەنت قىزمەتىن اتقارعان. ساياساتتاعى تاجىريبەسى 50 جىلعا جۋىقتايدى. دەموكراتتار پارتياسىنىڭ وكىلى. بۇل ساياسي ۇيىم ازاماتتىق قۇقىق، كوشى-قون جانە كليماتتىڭ وزگەرۋى سەكىلدى ماسەلەلەرگە دەگەن ليبەرالدىق كوزقاراسىمەن ەرەكشەلەنەدى. دەموكراتيالىق پارتيانىڭ ەكس-پرەزيدەنتتەرى قاتارىندا دجون كەننەدي، بيلل كلينتون مەن باراك وباما بار.

"The Qazaq Times"