بلينكەن: اقش رەسەيدىڭ اگرەسسيۆتى ساياساتىنا جاۋاپ بەرۋگە دايىن

امەريكا رەسەيدىڭ اگرەسسيۆتى ساياساتىنا جاۋاپ بەرۋگە دايىن. بۇل تۋرالى اقش مەملەكەتتىك حاتشىسى ەنتوني بلينكەن ۆۆس-گە سۇحباتىندا ايتتى.

لوندوندا ءوتىپ جاتقان «ۇلكەن جەتىلىك» ەلدەرىنىڭ جيىنىندا بلينكەن: «رەسەيدىڭ Solar Winds-تەگى كيبەرشابۋىل، پرەزيدەنتتىك سايلاۋعا ارالاسۋ جانە ناۆالنىيعا قارسى ۇيىمداستىرىلعان ارەكەتتەردىڭ بارلىعى اگرەسسيالىق ساياساتتىڭ ءبىر دالەلى. ەگەر رەسەي ادەتتەگىدەي بۇل ۇستانىمىنان تايماسا ءبىز دە سوعان ساي جاۋاپ قايتارامىز»، – دەدى.

بلينكەن رەسەي مەن گەرمانيانىڭ «سولتۇستىك اعىن-2» گاز قۇبىرىنا بايلانىستى دا پىكىر ءبىلدىردى. «دجو بايدەن پرەزيدەنت بولماي تۇرعاندا-اق «سولتۇستىك اعىن» جوباسىن سىنعا العان. سەبەبى بۇل جوبا رەسەيدىڭ مۇددەسىن العا تارتىپ، ەۋروپا مۇددەلەرىنە قايشى كەلەدى. جالپى ەۋرووداقتىڭ ەنەرگەتيكالىق قاۋىپسىزدىگىنە نۇقسان كەلتىرەدى. اسىرەسە، پولشا، ۋكراينا ءۇشىن قاۋىپتى»، – دەيدى.

مەملەكەتتىك حاتشى بۇل جولى دا اقش ۋكراينانى قولدايتىنىن ايتتى. سونداي-اق بلينكەن ۋكراينانىڭ شىعىسىنداعى قاۋىپسىزدىك جاعدايىنا الاڭداۋشىلىق ءبىلدىردى. ناۋرىزدىڭ ورتاسىندا اقش سەناتورلار توبى ۋكراينامەن قاۋىپسىزدىك سالاسىنداعى سەرىكتەستىك تۋرالى زاڭ جوباسىن ۇسىندى. اقش كونگرەسى سەناتىنىڭ حالىقارالىق ىستەر جونىندەگى كوميتەتىنىڭ قاراۋىنا ەنگىزىلگەن قۇجاتتا كيەۆكە جىلىنا 300 ملن دوللار اسكەري كومەك جانە ۋكراين اسكەري وفيتسەرلەرىن دايارلاۋعا جىلىنا 4 ملن دوللارعا (3,4 ملن ەۋرو) ءبولۋ قاراستىرىلعان.

بۇعان دەيىن The Wall Street Journal باسىلىمىندا اقش شەنەۋنىكتەرى رەسەيمەن قاراما-قايشىلىق تۋىنداعان جاعدايدا ۋكرايناعا قارۋ-جاراق بەرۋ جوسپارىن ازىرلەپ جاتقانى جازىلعان. بىراق بۇل شارالاردى اقش پرەزيدەنتى دجو بايدەن ازىرگە ماقۇلداعان جوق. باسىلىمنىڭ حابارلاۋىنشا، مۇنداي قولداۋعا زەنيتتىك جۇيەلەر كىرۋى مۇمكىن. سونىمەن قاتار، ماقالادا اقش اكىمشىلىگى رەسەيگە قارسى قوسىمشا ەكونوميكالىق سانكتسيالار ەنگىزۋ مۇمكىندىگىن قاراستىرىپ جاتىر.

"The Qazaq Times"