اقش تاريحىندا تۇڭعىش رەت پرەزيدەنتتىك سايلاۋدىڭ ناتيجەسى رەسمي داۋىس بەرۋ كۇنىنە دەيىن ياعني 3 قاراشادا الدىن الا شەشىلۋى مۇمكىن. بۇل جولى سايلاۋشىلاردىڭ جارتىسىنا جۋىعى مەرزىمىنەن بۇرىن داۋىس بەرگەن. ازىرگە، دجو بايدەن دونالد ترامپتان 9%-عا الدا. دەگەنمەن، ءتورت جىل بۇرىنعى ساۋالنامالار دا دونالد ترامپتىڭ جەڭىلەتىنىن بولجاعان.
قازىر ترامپ پەن بايدەن كۇمان تۋعىزاتىن، ياعني swing state دەپ اتالاتىن، ەلەكتوراتى قۇبىلمالى شتاتتاردى ارالاپ ءجۇر. سەبەبى پرەزيدەنت اتانۋ ءۇشىن قاجەتتى 270 ەلەكتورالدى كوللەدجدىڭ داۋىسىن جيناۋعا وتە ۇلكەن اسەر تيگىزەتىن شتاتتار. بۇل شتاتتاردىڭ قاتارىندا دجوردجيا، فلوريدا، پەنسيلۆانيا، ايوۆا، ميچيگان بار. سونداي اق وسى اپتادا كامالا حاريس، باراك وباما جانە مايك پەنس سياقتى ساياساتكەرلەر وزدەرىنىڭ جاقتاستارىن بارىنشا قولداپ، سايلاۋالدى ۇگىت-ناسيحاتتارعا كوپتەپ قاتىسۋعا تىرىستى.
رەسمي داۋىس بەرۋ كۇنىنەن ءۇش كۇن بۇرىن اقش-تاعى سايلاۋ كوميسسيالارى جاڭا رەكورد تۋرالى ەسەپ بەردى: 91,6 ميلليون سايلاۋشى مەرزىمىنەن بۇرىن داۋىس بەرىپ، بيۋللەتەندەردى پوشتا ارقىلى جىبەرگەن. بۇل سان ەلدەگى بارلىق تىركەلگەن سايلاۋشىلاردىڭ 43%-ى.
مالىمەتتەر بويىنشا، 35 شتات پەن كولۋمبيا وكرۋگىندە سايلاۋشىلاردىڭ جارتىسىنان كوبى داۋىس بەرگەن. فلوريدا، دجوردجيا جانە سولتۇستىك كارولينا قازاننىڭ سوڭىندا 70% -دان استام بيۋللەتەن تاپسىردى. تەحاستا بۇل كورسەتكىش 90%-دان استى.
Washington Post گازەتىنىڭ مالىمەتىنشە، سوڭعى ەكى اپتادا دەموكراتتىق كانديدات پەنسيلۆانيا، اريزونا، فلوريدا جانە ۋيسكونسين سياقتى ءتورت نەگىزگى جانە ەڭ شەشۋشى شتاتتاردا كوش باستاپ كەلەدى.
بىرنەشە اپتا بۇرىن «New York Post» گازەتىندە اقش-تىڭ بۇرىنعى ۆيتسە-پرەزيدەنتى جانە بيىلعى پرەزيدەنتتىك سايلاۋعا كانديدات دجوزەف (دجو) بايدەننىڭ ۇلى حانتەر بايدەن تۋرالى ماقالا شىقتى. ماتەريالدا بايدەن جانە ونىڭ ۇلىنا قاتىستى ايىپتاۋ حاتتارى مەن باسقا دا ماتەريالدار جاريالاندى. قاراشادا وتەتىن ءىرى ساياسي دوداعا ساناۋلى كۇندەر قالعاندا ءمالىم بولعان «قۇپيا حاتتاردان» كەيىن بايدەننىڭ رەيتينگىنە نۇقسان كەلگەن.
حانتەردىڭ نوۋتبۋگى 2019 جىلدىڭ ساۋىرىندە دەلاۆەردەگى جوندەۋ شەبەرحاناسىندا قالدىرىلعان. نوۋتبۋكتەگى ەلەكتروندىق حاتتاردا دەموكراتيالىق پارتيادان اقش پرەزيدەنتتىگىنە ۇمىتكەر دجو بايدەن 2015 جىلى ۋكراينالىق Burisma كومپانياسىنىڭ اعا قىزمەتكەرى ۆاديم پوجارسكيمەن كەزدەسۋ وتكىزگەنى جازىلعان. بۇعان دەيىن بايدەننىڭ ءوزى مۇنداي بايلانىستاردىڭ ەشقاشان بولماعانىن ايتقان.
امەريكاداعى پرەزيدەنت سايلاۋى بيىل 3 قاراشادا وتەدى. قىزۋ دودادا قوس كانديدات – قازىرگى 45-ءشى پرەزيدەنت دونالد ترامپ جانە دەموكرات دجو بايدەن باق سىنايدى. رەسپۋبليكالىق پارتيا وكىلى ترامپ الداعى سايلاۋدىڭ ناتيجەسىن تەك اقش جوعارعى سوتى انىقتايدى دەپ بولجاعان. اق ءۇي باسشىسى سوڭعى كەزدەرى دەموكراتتار پاندەمياعا بايلانىستى الداعى سايلاۋدا كەڭىنەن قولدانۋدى ۇسىناتىن پوشتا ارقىلى داۋىس بەرۋ ءادىسىن بىرنەشە رەت سىنعا العان. ترامپ سونىمەن بىرگە پوشتا ارقىلى داۋىس بەرۋ كەزىندە باسقا مەملەكەتتەردىڭ قاتىسۋ قاۋپى جوعارى دەيدى.
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
رەسەيدىڭ دونەتسك وبلىسى كونستانتينوۆكا قالاسىنداعى بازارعا شابۋىلىنان 16 ادام قازا تاپتى
سادىر جاپاروۆ ىستىقكولدەگى ءتورت پانسيوناتتى وزبەكستانعا بەرۋ سەبەبىن ءتۇسىندىردى
پيگوجيننىڭ «ۆاگنەر» توبى ماسكەۋ تۇبىنە كەلىپ شەگىنىپ كەتتى